Wararkii ugu Dambeeyay
ee Dagaalka Gaalkacyo, Faahfaahin wixii dhacay
Gaalkacyo: Waxaa
maanta magaalada Gaalkacyo ee xarunta gobolka Mudug ka bilowday
dagaal u dhexeeya laba beelood oo ka mid ah beelaha deegaanka
Mudug.
Ugu yaraan waxaa dagaalka maanta ku dhintay inta la og yahay
19 qof oo ay ku jirto qof haweenay ah oo ay dishay xabadaha
habowga ah ee wiiftada loo yaqaan, dhaawac labada dhinac ayaan
si rasmiya loo ogayn iyadoo Isbitaalka Gaalkacyo lagu dawaynayo
30 qof oo labada dhinacba ah.
Dagaalka ayaa ka bilowday nin ka mid ah beelaha Waqooyiga Mudug
oo la dhaawacay saaka, ninka la dhaawacay ayaa rag ka tirsan
beelaha Koonfurta Mudug ku dhaawaceen banaanka magaalada meel
dhagaxa laga jabsado , ninka la dhaawacay markii magaalada la
keenay ayaa beesha ninka laga dhaawacay weerar ku qaaday ceelal
biyood ay ku tuhmayeen inay joogaan ragga dhawaca gaystay, waxaana
halkaas ka bilowday dagaal socday ilaa lixdii maqribnimo wakhriga
Galkacyo.
Odoyaasha beelaha ayaa hadda wada dhaqdhaqaaq amaanka lagu
soo celinayo iyadoo caawa fiidkii ay is arkeen odoyaal ka kala
socda beelaha dirirtu dhexmartay, kuwaas oo isla gartay in uusan
dhicin gacan ka hadal dambe, odoyaasha labada dhinac ayaa aad
dadaal ugu jira inay ilaashadaan heshiiskii nabadeed 1993-kii
beelaha gobolka dhexmaray.
Ciidamada Daraawiishta Puntland ee fadhigoodu yahay Gaalkacyo
iyo Booliska Gaalkacyo ayaan iyagu wax faragalin ah ku samayn
dirirta beelaha ka dhex socotay, iyadoo aan la garanayn sababta
ay u kala dhex gali waayeen dirirta labada beelood ku dhexmartay
magaalada.
Maalmihii la soo dhaafay waxaa gobolka ka dhacay falal dilal
iyo dhaawacba leh oo labada dhinaca ay isaga dileen 4 qof lixna
isaga dhaawaceen, falalkaas oo salka ku haya aano qabiil.
Waxaa jira warar tilmaamaya in maamulka Cabdiqaasim saamayn
ku leeyahay falalkaan dhacayay maalmihii la soo dhaafay siddaas
oo ay ku warameen qaar ka mid ah odoyaasha Koonfurta Mudug oo
sheegay in falalka xagooda ka imaanayay ay gaysanayeen rag laga
soo diray Muqdisho.
Inkastoo ay marar dhacayeen falal dil iyo dhaawacba leh oo
salka ku haya xoolo la kala dhacayay haddana beelaha gobolka
Mudug ayaa nabadgalyo kuwada noolaa tan iyo 1993-kii wakhtigaas
oo heshiis nabadeed ay ku kala saxiixdeen Muqdisho dagaalo faraha
la isaga gubtay ka dib.
Warkii Hore ee dagaalka
Allpuntland.com
Warar Faahfaahsan oo
ku Saabsan Xaalada Baydhabo iyo Labadii Maalmood ee ugu dambeeyay
Baydhabo: Mar uu maanta galinkii hore furmay khadka
telefoonka Baydhabo oo marna hawada soo galayay marna ka baxayay
ayaa xarunta dhexe ee AllPuntland waxay telefoonka Baydhabo
kula hadashay wariye madax banaan oo ku sugan magalada, wuxuuna
wariyuhu AllPuntland uga waramay sidda tan iyo shalay wax uga
dhaceen magaalada Baydhabo.
Wariyihu wuxuu sheegay shalay subaxii in ay magaalada soo galeen
ilaa 13 tikniko ah oo ay wateen maleeshiyada labada gudoomiye
xigeen kuwaas oo aan kala kulmin dagaal weyn xoogaga Shaati-Gaduud,
wariyuhu wuxuu shegayaa in sababta sahashay in Baydhabo laga
qabsado Shaati-Gaduud ay ahayd iyadoo uu khilaaf ka dhex aloosnaa
maleeshiyadiisa horay u joogtay magaalada, khilaafkaas oo aan
la ogayn waxa uu ku salaysnaa ayaa si dhokhso badan waxaa uga
faa'iidaystay xoogaga ay hogaamiyaan labada gudoomiye xigeen
oo laba bilood ka hor laga saaray magaalada.
Lama cadayn karo inay magaalada soo galeen ciidamo Isbahaysiga
Dooxada Jubba oo taageeraya maleeshiyada labada gudoomiye xigeen,
waxa kaliya oo aan ku arkay magaalada waa maleeshiyooyinkii
RRA-da ee labada gudoomiye xigeen, inkastoo la ii sheegay in
maleeshiyo aan RRA-da ahayn la geeyay Garoonka diyaaradaha oo
ayan soo galin magaalada, warkaas buu yiri wariyuhu uma hayno
cadayn buuxda aadbaase magaalada looga hadal hayaa, waxaase
aad loo rumaysan yahay in xoogaga labada gudoomiye xigeen ay
taageero saanad iyo sahayda ciidanka ah ka heleen maamulka Cabdiqaasim,
iyadoo sababihii ugu waaweeynaa ee laba bilood ka hor magaalada
looga saray ay ahayd rasaasta oo ka dhamaatay maleeshiyadooda.
Magaalada waxaa ka dhacay bililiqo , waxaana boobka si gaara
loola beegsanayay dadka lagu tuhumayay inay gacansaar lahaayeen
Madaxweynaha Koonfur Galbeed Somaliya Shaati-Gaduud, labada
gudoomiye xigeen ayaa amray ciidamadoodu inay isugu tagaan Garoonka
Diyaaradaha, iyo labada Koontarool ee magaalada.
Xasan Maxamed Nuur Shaati-Gaduud ayaa ku sugan tuulada Ceel
Doon oo qiyaastii 20 KM dhinaca galbeed kaga taal Baydhabo,
waxaana halkaas isku urrursaday xoogag taageersan isaga, isagoo
doonaya inuu dagaal rogaal celis ah kusoo qaado magaalada Baydhabo.
Warar hadda isoo gaaraya ayaa sheegaya in Buurhakabo uu gaaray
Shiikh Aaden Madoobe laftigiisu la iima soo sheegin dagaal halkaas
ka dhacay inkastoo Buurhakaba ay ku xoogbadnaayeen taageeraysha
Shati-gaduud.
Col. Maxamed Ibraahim Xaabsade ayaa shir isugu yeeray barito
wixii ka joogay magaalada golaha SRRC iyadoo la ii xaqiijiyay
inuu joogo magaalada xoghayihii guud ee SRRC-da iyo waliba saraakiil
sare oo ka tirsan golahaas.
AllPuntland.com
Contact: webmaster@mudugonline.com
Copyright © Mudug
Online 2001
|