Dr Ghanim Alnajjar ayaa toddobaadkan u yimid gobolka 11 casho oo shaqo ah Sida laga soo xigtay qoraal saxafadeed ay sii daayeen xubnaha UN-ka ee daggan soomaaliya iyo isu duwayaasha xuquuqda aadanaha ee soomaaliya, waana booqashadiisii saddexaad tan iyo intii uu Kofi Anan u magacaabay howshan bishii june sannadkii 2001-dii.

Dr. Alnajjar ayaa war saxaafadeedkaasi ku sheegay in Waqti xaadirkan ay wax badan ku xiran yihiin wada hadalka nabadda, "wax badan oo xuquuqda aadanaha ahna ay tahay in laga tix galiyo wadahadalka, oo tan ugu sarraysaana ay tahay fursadda nabadda, waxaana sidoo kale uu sheegay in ay fursad u tahay soomaalida in ay soo bandhigaan ballanqaadkooda ku wajahan xuquuqda aadanaha.

Si kastaba, waxa uu intaa raaciyey inuu xasuusiyo xaaladda waqtigan ee xuquuqda aadanaha waddanka ay ahayd mid aan rajo fiican lahayn.

Dr Alnajjib waxa uu sheegay in "Woqooyi Galbeed soomaaliya [Somaliland] iyo waqoooyi bari soomaaliya [Puntland] laga arkay horumar sannadkii hore, laakiinse qodobka xuquuqda aadanaha ee soomaaliya uu wali yahay mid cakiran, inkastoo degaanada qaar ay hal sano horumar ka sameeyeen, halka kuwo kalena ay kaba sii dareen oo ay sii xumaadeen

Inta uu Dr. Alnajjib ku gudo jiro booqashadiisa waxaa uu Magalaada Nairobi caasimadda waddanka Kenya uu kula kulmayaa diblomasiyiin, mas’uliyiinta deegaanada, wakiillada bulshada rayidka ah, hay’adaha caalamiga ahba iyo waliba Maamulada Gobolada kala duwan oo soomaaliya ah.

Waxaa uu sidoo kale qoraal saxaafadeedkiisa ku sheegay datoorku, in uu baari doono qodobo la xiriira noocyada xuquuqda aadame ee jira, oo ay ku jiraan xaaladda Nidaamka Garsoorka, dabbakhaadda ama ku salaynta sharciga iyo xaaladaha xabsiyada, sida loo dabakhayo hub ka dhigista iyo carruurta askarta laga dhigto, dhaqaalaha, xuquuqaha bulsho, aqoonsiga ay bulshada ku dhex leeyihiin dumarku, aqoonta xuquuqda aadanaha, dhibaatooyinka soo wajahay tobaneeyada kun ee ku hoy la’ gudaha waddanka iyo xaaladaha la xiriiraba.

DHAMAAD

Weriye c/risaaq Sheekhaduun
Mudugonline.com

Taliyaha qaybta Booliiska Gobolka Mudug oo loo magacaabay Cismaan Salaad

Galkayo, [MOL] 28 August 2003- Taliyaha qaybta booliska gobolka mudug ayaa maanta waxaa loo magacaabay Cismaan Salaad Axmed oo ka mid ahaa saraakiishii jabhada mucaaradka GBB. Magacaabistaan ayaa ka danbaysay ka dib markii maamulku gartay inuu Cismaan yahay nin ku haboon jagadaasi oo dhalin yaro ah aqoona leh kuna fir fircoon hawlaha boliska.

Waxaa waayadaan oo dhan Puntland ka socday hawlo maamul isku dhaf ah ka dib markii maamulka Puntland heshiis la galay Jabhaddii mucaaradka Puntland ee GBB lagulana heshiiyay inay ku soo biiraan maamulka Puntland oo ay markii hore ka biyo diidsanaayeen. hawlaha isku dhafka ayaa bishaan ku socday xawli sare iyadoo qaar ka mida ciidamadii Jabhadda lagu kala daray ciidanka daraawiishta iyo kuwa Booliska.

Weriye c/risaaq Sheekhaduun
Mudugonline.com

Garoowe, [MOL] 28 August 2003- baarlamaanka Puntland ayaa maanta dood kulul ka ka yeeshay mushaarka iyo miisaaniyada ku baxda ciidanka Puntland iyagoo ka dooday inay suuragal tahay in la dhimo miisaaniyada ciidamada qataan iyo in kale. dood dheer ka dib iyo falanaqayn ay kaga doodeen miisaaniyada tirada badan ee cidmadu loo qoondeeyay ayaa waxay isku raceen in aan la fara gashan ciidamada oo loo daayo mushaahaarka iyo miisaaniyadii horay ugu qoondaysnaa.

Ciidamada Puntland ee boliska iyo daraawiishta ayaa ah kuwa ugu badan ee ay ku baxdo miisaaniyada maamulka puntland sababtuna tahay dadka reer Puntland oo garowsaday in nabadgalyadu tahay bilowga horumarka meel aan nabad iyo xasilooni ka jirina aysan horumar gaarayn.

Weriye c/risaaq Sheekhaduun
Mudugonline.com

Ururka YES oo maanta xaflad sagootin ah u sameeyay kooxdii Elman ee Muqdisho

Bosaaso, [MOL] 28 August 2003- Xaflad sagootin ah ayaa maanta waxaa u qabtay kooxdii Kubada Cagta ee Elman ee muqdisho ururka YES oo ah urur dhalinyaro oo caalami ah kana dhisan maamulka puntland. xafladaasi sagootinta oo ka dhacday xafiiska ururka dhalinyarada YES ayaa waxaa ka soo qaybgalay masuuliyiinta gobolka iyo dadweyne tiro badan oo la dhacsanaa qaabka xaflada iyo sagootinta kooxdaas ciyaartooyga ah.

Kooxda Elman ayaa beryahaan ciyaar saaxiibtinimo la lahaa ciyoortoyga gobolada Puntland iyagoo magaalo kasta oo ay yimaadaanba loogu soo dhaweeyay si xamaasad iyo niyad wanaag leh.

Weriye c/risaaq Sheekhaduun
Mudugonline.com

Gaalkacyo, (AllPuntland)- 4 qof ayaa ku dhaawacantay meel ku dhow koontoroolka koonfureed ee magaalada Gaalkacyo xalay ka dib markii halkaasi weerar ku soo qaadeen burcad hubaysan oo aan haybtooda illaa iyo haatan la garananay .
Dadkaan dhaawacmay oo ay ku jirto haweeney dhaawaceedu khatar yahay ayaa gabi ahaantooba ah dad ka soo barkacay koonfurta dalka Soomaaliya gaar ahaan magaalooyinka Baydhabo , Xudur iyo Saakoow.

Qaar kamid ah ehelada dhibaatadan Soo gaartay oo AllPuntland u waramayay ayaa sheegay in dhibaato isugu jirta kufsi iyo jirdil ay ku hayaan dad aysan haybtooda garanayn , waxay sheegeen in sadex sano oo ay daganaayeen maamulka Puntland uu dammaanad qaaday ammaankooda balse labadii maalmood ee ugu danbeeyay ay dhibaatan soo foodsaartay "Xaasaskeenna oo la kufsanayo iyo caruurteenna oo Beerka laga laadayo uma adkaysan karno" waxaa sidaasi yiri ninka lagu magacaabo Isaaq oo ka mid ah dhibbanayaasha.

Waxay maamulka gobolka , Booliska , Odayaasha iyo dawladda Puntlandba ka codsadeen in dhibaatadan wax lagala qabto isla markaana ay u baahan yihiin in laga soo raro halka ay daggan yihiin oo la dajiyo meel dhow oo ay ammaan ku heli karaan.

Dhibaatadan waxaa dadkaan u weheliya buushash ay daganaayeen oo boqol kor u dhaafaya oo 24/08/03 uu dab qabsaday isla markaana ay iminka seexdaan dadkaasi meel cidla ah.

AllPuntland.com