|
Galkacyo, [MOL] 10 Aug- Waxaa shalay gabal gaabkii dagaal
ku dhexmaray koonfurta magaalada Gaalkacyo labadda qabiil
ee reer Mahad iyo Sacad oo ka mida qabiilada wada dega
gobolka Mudug kana kala tirsan beesha Cumar Maxamuud iyo
beesha Habar gidir. Dagaalka oo ka dhacay baadiyaha magaalada
Gaalkacyo ayaa la soo sheegayaa inuu ku salaysnaa muran
ka dhashay dhul daaqsimeed oo beeluhu ku heshiin waayeen.
Dagaalkaasi oo socday saacado ayaa waxa la is waydaarsaday
hub fudud iyo kan culus sida uu xaqiijiyey weriye Adan
Nuur oo ka tirsan wargayska Yameeyska. Aadan intaas waxuu
ku daray in dhimashada labada dhinacba tahay Afar ruux
oo aanay caddayn cidda ay kala yihiin, waxuu kaloo sheegay
in dagaalku yahay mid dhex maray dad deris wadaag ah hadana
lagu jiro waan waantii lagu dhamayn lahaa colaada.
Baadiyaha Gobolka Mudug ayaa waxaa intii dagaalku sokeeye
dhacay ka jiray dagaal qabow oo hadba soo cusboonaada
kaas oo inta badan ka dhaca dhulka daaqsinta ah. Beelaha
degga Waqooyiga Mudug ayaa sheegay in beesha Habar gidir
oo wagii hore degi jirtay koonfurta Mudug ay ku soo durkeen
dhul aysan waagii hore degi jirin ciriiriyeena beelaha
kale ee ay deriska yihiin. Beelaha Habar gidir ayaa iyaguna
sheegay in dhulka aan la kala lahayn oo dadku Somali wada
yihiin wadankana meeshii ay doonto beel walba ka degi
karto.
Dawladii gumaysiga ee talyaaniga ayaa la sheegay in waqtigii
ay dhulka maamuli jirtay u samaysay beelaha Mudug xaduudo
la yaqaan oo cayiman ka dib markii ay dhamaan waayeen
dagaalo lagu hoobtay oo ku salaysnaa dhulka daaqsinta
oo la isku haystay. 20-kii sanno ee u dambeeyay ayaa la
sheegay in beesha Habar gidir soo dhaaftay soohdimahaas
ka dibna arintaasi keentay isku dhac joogta ah.
Weriye c/risaaq Sheekhaduun
Mudugonline.com
Golaha Baarlamaanka
Puntland oo qalinka ku duugay ansixinta doorashooyinka
degmooyinka
Garoowe, [MOL] 10 Aug- Golaha Baarlamaanka Puntland ayaa
qalinka ku duugay ansixintii sharciga doorashoyinka degmooynka
puntland, sharcigaan oo cadaynaaya qaabka wax loo dooranaayo
ayaa waxaa golaha hor geeyey waasaarda Dawladaha Hoose
iyo reer miyiga oo soo diyaarisay iskuna soo dubariday
sharciyada lagu salaynayo doorashooyinka degmooyinka iyadoo
sharcigaas in mudo ah Baarlamaanku ka baaraan degayay
qodobo ka mida ah sharcigaasi oo ka kooban 44 qodob.
Kulankaasi golaha waxaa ka soo xaadiray 45 xildhibaan
waxaana codeeyey 39 mudane waxaana diiday hal xildhabaan
halka ay ka aamuseen lix xildhibaan.
Sharcigaan dawladaha hoose oo nuqul ka mid ah soo gaaray
xafiiska Mudugonline ee Boosaso ayaa ahaa mid aad loo
habeeyey loona yeelay aasaas fiican oo mustaqbalka wax
ka tari doona baahinta maamulka iyo in degaan walba oo
Puntland ka mida la xisaabtamo soona doorto masuuliyiinta
ay u wakiishaan inay fuliyaan hawlaha degmadooda.
Weriye c/risaaq Sheekhaduun
Mudugonline.com
Abwaan Hadraawi
oo galabka shir ku qabtay garoonka kubada cagta
Mudug, [MOL] 10 Aug- Waxaa galabta shir
balaaran ku qabtay garoonka kubadda cagta ee magaalada
Bosaaso Abwaan Maxamed Ibraahim Warsame Hadraawi iyo
waftigiisi, shirkaas ayaa waxaa ka soo qayb galay masuuliyiin
badan oo ka socda maamulka Puntlad iyo dadwayne aad
u fara badan.
Abwaanka ayaa halkaasi ku soo bandhigay
qorshahiisa socdaalkiisa nabada oo isaga iyo waftigiisa
ay ku soo mareen Koonfurta Somaliya haatana ku soo gabagobeeyeen
gobolada Puntland.
Abwaan Hadraawi ayaa la filayaa inuu hadda
dib ugu noqdo magaalada Burco oo markii horeba uu ka
soo kici timay. abwaanka ayaa waxuu socdaal uu ugu magacdaray
sodaalkii nabada ku soo kala maray gobolada dhexe, Muqdishu
iyo Magaalada Kismaayo oo dad badan ka xumaadeen in
abwaanku safarkiisa nabada ku daro magaalada Kismaayo
oo wali dadkeeda ay la haystayaal u yihiin magaaladana
ay ka taliyaan Mooryaan isa soo abaabushay oo ujeedadoodu
tahay ku kornaalaanshaha dadka masaakiinta ah ee deegaankaas.
Weriye c/risaaq Sheekhaduun
Mudugonline.com
Xasan Abshir oo waxkama jiraan
ku tilmaamay xilka qaadis lagu sameeyay
Muqdisho, (AllPuntland)- Ra'iisul wasaaraha DKG/kooxda Carta Xasan
Abshir Faarax ayaa maanta jawaab kabixiyay asagoo jooga
gogosha nabadda ee Mbgathi Kalsoonidii ay kala noqdeen
baarlamaanka maamulkiisu.
Xasan Abshir Faarax ayaa sheegay in kalsoonida lagala
noqday aysan waxba ka socon doonin taasoo uu ku macneeyay
in intii badnayd xubnihii baaramaanka ee DKG/kooxda
carta ee codayn lahaa ay asaga la joogaan isla markaana
ay diyaar u yihiin inay dawlad Soomaaliyeed wax ka soo
dhisaan.
Baarlamaanka ayuu sheegay inaysan xilkaqaadis
samyan karin ayagoo xilli intaasi le'eg ay uga dhiman
tahay jiritaankooda taasoo uu qabo dastuurka DKG/kooxda
Carta.
Wararka aannu ka helayno magaalada Muqdisho
ayaa sheegaya in Madaxweynaha DKMG/ Kooxda Carta C/qaasin
Salaad Xasan uu goor horeba qal qaaliyay raggii uu ku
badali lahaa Xasan Abshir Faarax iyo Cabdalla Deeroow
Isaaq, kuwaasoo uu ku kala badalayo , Maxamed Cabdi
Yuusuf oo ah ku xigaha gudoomiyaha Baarlamaanka iyo
Cabdi Guuleed oo isagu ah Wasiir ka tirsan isla mamulka
Cabdi.
Dhinaca kale C/qaasin Salaad Xasan ayaa
maanta soo saaray warqad qoraal ah oo uu ku sheegayo
inuu baarlamaanka ugu hambalyaynayo inay tilaabadaasi
ku dhaqaaqaan
AllPuntland
|
