Bosaaso, [MOL] 01 August 2003- Xaflad lagu xusaayo 1-da Ogoosto oo ah xiligii dhidibada loo taagay maamulka Dawlad Goboleedka Puntland ayaa si weyn looga xusay magaalada Boosaso xafladaasoo hayd mid si fiican loo agaasimay waxaa ka soo qayb galay masuuliyiinta maamulka iyo ururada bulshada rayidka ah. Ciidamo tira badan oo isgu jira daraawiish iyo booliis ayaa gaardi ku maray meelo badan ooo ka mid ah magaalada Boosaso, kooxo fanaaniin ah ayaa saakay halkaasi ka tumay muusig aad u tiro badan iyo heeso qiiro lah oo wadani ah.

Dhinaca kale waxan laga xusin maanta magaalada Garoowe 1-da Agoos ee maanta oo ku beegan sanad guuradii 5-aad ee maalintii dhidibada loo taagay Dawlad Goboleedka Puntland ayaan la xusin sannadkii sadexaad, marka laga reebo hadal gaaban oo Madaxwayne ku-xigeenka Puntland uu munaasabada 1-da Agoos darteed uu kala hadlay dadwaynaha reer Puntland saxaafadda isagoo sheegay qiimaha maalintaas u leedahay shacabka Puntland oo uu sheegay inay intii ay dhisteen Dawlad Goboleedka ay ku tilaabsadeen horumar la taaban karo.

Xuska maalintaan oo si wayn looga dareemi jiray gobolada Puntland ayaa sannadkii 2001 waxaa joojiyay shacabka reer Garoowe oo iyagu xiligaas diidanaa xil kororsiga golaha xukuumadda iyo golaha wakiilada, waxayna cagta mariyeen waqtigaas tarabuunkii loo dhisay in uu Madaxweynaha Puntland salaanta ku qaato.

Magaaloyinka Laascaano gaalkacyo ayaan iyagana laga xusin xuskaa qiimaha badnaa.

Weriye c/risaaq Sheekhaduun
Mudugonline.com

Nairobi , (AllPuntland)- Madaxda kooxaha iyo masuuliyiinta fadhida gogosha nabadaynta Soomaaliyeed ee iminka loo fadhiyo Mbagathi ayaa xalay loo qaybiyay qoraalka dastuurka dawladda federaalka ah ee kumeel gaarka ah ee la dhisi doono.

Qoraalkaan ayaa loo qaybiyay ergada fadhida gogosha nabdda ka dib markii qoraalkaasi laga saxay meelo ay xoogaa ay ka biyo diideen madaxda Soomaaliyeed .

Dastuurkan iminka loo qabiyay ka qayb galaaasha shirka ayaa u jeedadiisu tahay in madaxada Soomaalida oo cabashooyin yar yara soo gudbiyay ay ku qancaan dib u sixiddaan ugu danbaysay.

Qodobada dastuurkaan laga saxay waxaa ka mid luuqada rasimaga ah oo laga dhigay tan Somaliga (Maxay iyo Maayga) iyo afka carabiga, Diinta Islaamka oo Muqdas inay tahay lagu muujiyay iyo arinka Midnimada oo lama tabtaan laga dhigay, qodobadaan ayaan cad cadayn marka la akhriyo qoraalkii horay looga diyaarshay Dastuurka oo ay diyaariyeen khubaro Somali ah oo kaashanayay Ajnabi aqoon u leh samaynta dastuurada.

Qoraalkaan ayaa u muuqda mid la isku wada raacsan yahay oo shirka ka dhigaya mid gabo gabadiisu ay soo dhawaatay waxaana uu ka mid ahaa ansixinta dastuurku caqabadaha ugu waawayn ee shirka hortaagnaa.

AllPuntland