Hambaad u dudaye, ee Hannaan umaadan dudin!

Waxaa nasiib darro ah, inaadan garan wali waxaad u dagaalantay, waxaad u heshiisay, iyo waxaad hadda u doodaysid.....

Waa mar e, dhulkaagii baad dagaal ka riday, adigoo waxa kaliya ee aad rabtay ay ahayd, reer hebel baa dhalasho iyo mansab u leh inay wax xukumaan, iyo kursi hebel hala isiiyo iwm.....
Kumaadan guulaysan taas......Oo waad ogaatay maanta inaadan cidna kursiga Puntland aadan ka xigin, dadkuna usimanyahay, ama dheh Kilka Shanaad buu ka yimi ama Mudug buu ka yimid e.

Dagaalkii iyo foolxumadii halkaas ka dhacdayna adigaa ceebteedii qaaday, oo maanta cidkale oo dadka reer Puntland dacwo u qabaan oon ahayn Kuwa Puntlandstate oo kale ee Kooxda Carta marin habaabisay majirto..

Midda kale, waxaad ka soo gashay kaneecadii, dhibkii, sharafxumadii, qaxootinimadii, iyo rafaadkii, markaas baad usoo noqotay, caruurtaadii, ehelkaagii, dadkaagii, dhulkaagii, iyo dhulkii Uduga nabadiisii Allaah siiyay, waad ogeyd sidii laguu soo dhoweeyey hagar la'aanta ahayd, qolyihii aad ishayseena waxay dhaheen bal aan arinta xalay dhalay ka noqono...
Adiga ileyn nin Allaah tusay tolkiis baad tahaye, oon tabar kale lahayne..Markii baad afka furatay, 'xagaa la dhacay, xagaa la iidiiday'...Armaad sumcadii yarayd ee aad ku heshay heshiiska iska dhumisaa...?
http://www.puntlandstate.com/news.php?page=showcomments&id=256

Hadda doodaada, amase midda website yada PuntlandState oo dhan, ma aha mid ku tusinaysa inay yihiin dad xalaal ah, waxa kaliya ee laga akhrisan karaa, waa xantii, xumaantii, xalaalaysigii xoolaha dadweynaha, xiqdigii, iwm

Intaas waa tan idiin geesay inaad u adeegtaan Kooxda Carta, G8 (Dooxatada Kismaayo)...iyo Soomaaliland...
Waxaasoo ceeb ah waan aqaan qofka reer tolkay u geystay, waan aqaan maalintii Kismaayo la qabsanayey qofka dhinaca kale ka shaqaynayey, waan aqaan maalinkii Kooxda Carta la dhisayey kan kala furfurayey Puntland, hadda waan aqaan kan jecel inuu isugu diro dadka beel beel, jilib jilib...

Miicaad Marasheeg
marasheeg@hotmail.com

---

Waxaan rabaa in aan wax ka iraahdo hadaladii ka soo yeeray Xasan Abshir faarax,waxaa aad iyo aad ayaan daro u ah in xasan uu garan waayo waxa maslaxada ugu jirta ama horumarka naftiisa iyo dadkiisaba u ah, Waxaan u arkaa dhaqamada xasan abshir sidii caloshiisa u shaqaste oo kale maxaa yeelay hadaad tahay nin u taagan umada wa in aad maslaxadooda ka shaqaysaa oo arintu ay ka wareegtaa aragtida adiga kugu kooban hadii kale meel cidla ah ayaad soo istaagaysaa, taariikhda xasan abshir soomaali inta danaysa ama ku noolayd ayaa la socota 21 sanadood oo kaligii taliskii siyaad bare xukunka haystay ayuu xasan ag fadhiyay Siyaad Bare iyadoo dadkiisii la’laynayo qaarna xabsiga la dhigayo ayuu isagu hawshiisa ka watay waxaana filayaa in ay soomaali ku maah maahdo ninkaad u shaada ka qaadan kartid ayaa loo dhiibtaa.

Intii dhiiga la hayd ama dadnimadu ku jirtay waa ka baxeen soomaaliya oo si cad ayay uga horyimaadeen dhibaatadii lagu hayay dadkooda , marka taas laga soo tago waxa aan goob joog ka’ahaa 3 sanadood ka hor mar Kooxda Carta ay yimaadeen holland oo shir ay u qabteen dadka si ay uga dhaadhiciyaan maamulkay soo dhoob dhoobeen, Xasana uu ahaa wasiirkii maaliyada waxaan ka hayaa xasan afkiisa wax la yiraahdo Puntilland ma jirto axdigii aanu samaynay markaanu aasaasaynay Puntilland wuxuu dhigayay in qaranimo haday timaado Dawlad goboleed yadu bur burayaan garoowana laga xukumo Muqdihso xaqiiqda aanu wada ogayna waxay ahayd in aan Dawlad qaranka soomaalieed matasha in ay san jirin oo waliba loo bur buriyo maamul dhisan, danta uu xasan watay waxay ahayd oo kaliya in tiisa shakhsiga ah uu ku dadaalo laakiin uu san wax dana ka lahayn Puntilland iyo bur burkeeda iyo dadkeeda toona waxaa lawada ogsoonyahay xasan in uu qayb wayn ka qaatay bur burka Puntilland ninkii Jaamac daba ka riixayayna uu isaga ahaa xaqiiqdana lawada ogyahay in uu Jabuuti kula kulmay Jaamac isagoo C/qaasim uu soo dirsaday dadku ma indha la’a mana dhaga la’a wixii Xasan samaynayayna dadku waa ay wada ogyihiin xasana waxaan hubaa in uusan magac iyo taariikh aan madoobayn mooyee wax kale uu san hayn.

Puntilland waxaan ku talin lahaa hadayba noqoto in uu mustaqbalka yimaado in talaabo adag laga qaado laakiin aan dil ahayn sida, Xabsi muda dheera iyo ka mamnuucid in uu xil dambe u qabto Puntilland iyo dadka ku abtirsada dhaq dhaqaaqiisana lala socdo xasan wuxuu yiri Cartaa Puntiland heshiisiisay waa wax aad xaqiiqda uga fog, suaashu waa, aaway Carta , xageebeey ka taliyaan yay matalaan, sadex sano ayay jireene wax aan bur bur ahayn oo ay qabteen ma lahayaa.

Waxaan anigu shakhsi ahaan oran karaa xasan iyo kooxda dhimatay ee Carta in ay ahaayeen Calooshooda u shaqaytayaal aan nina dan ka lahayn, waxa lagu heshiiyayna ay ahayd muuqaal aan aduunka wax uga doonano aan samayno meeshii aan qasi karno ama aan bur burin karnana aan bur burino si aan u helo tiro dad ah oo aan maskaxda ka xadi karno, xaqiiq fikirkaas way ku guulaysteen oo Baydhabo iyo Puntillandba bay u adeegsadeen laakiin intee in le’eg ayuu soconayaa weeye, jawaabtu waa mudo aad u gaaban. Marka hadalkaygii waxaan ku soo gaba gabaynayaa in xasan uu iska aamuso hadii ay ka fursan waydana qirto danbiyadiisii uu galay waydiistana Shacabka reer puntilland iyo Maamulkooda iyo waliba Isimadooda cafis iyagay u taalaa waxay ka yeeli lahaayeen.

Wax ka le oo u furan xasan iima muuqdaan.

Wabillahi tawfiiw,

AFHAYEENKA BEESHA CUMAR MAXAMUUD EE MAGAALADA MANCHESTER/UK -
XUSEEN XUUBSIREED.
e-mail mohamoud_hussein@yahoo.co.uk

---

Waxaan shaki ku jirin in qaadku uu ku hayo guud ahaan Soomaaliya dhibaatooyin waaweyn oo dhinacyo badan, sida dhibbaato dhaqaale, mid caafimaad iyo mid dhaqanba, laakiin waxaa nasiib darro ah inaan haba yaraatee dadka wax qora ee Soomaalida ahi aysan ku dhiiran ineey u tilmaamaan bulshadooda dhibaatada uu ku hayo qaadku.

Waxaa igu dhaliyey inaan qoro maqaalkan, kadib markaan arkay maqaal kusoo baxay 22 may 2003 Mudugonline oo uu qoray walaalkeen Aden Dirie Ali, oo cinwaankiisu ahaa Puntland waa loo shaqo tagaa sida sacuudiga. Inkastoo guud ahaan maqaalku uu ahaa mid muujinaya horumarka iyo sida looga shaqeysan karo dhulkeena, waxaan walaalkey Aden ku dhaliilayaa inuu kusoo daro horumarkii iyo shaqooyinkii ka abuurmay Puntland "Ka ganacsiga qaadka" asagoo tilmaamay in rag iyo dumarba ka shaqeystaan ganacsiga qaadka oo ku korsadaan caruurtooda.

Waa wax dhici kara in qaar ka mid ah dumarka iyo ragga ka ganacsada qaadka ay ku kalliftay ineey ka raadsadaan waxay ku noolaan lahaayeen oo ku korsadaan caruurtooda, laakiin ma haboon tahay in lagu dhiirigeliyo isla mar ahaantaasna loo tuso inuu ka ganacsiga qaadku yahay shaqo hufan oo positive ah? Waxaan u maleynaynaa in jawaabta su'aashaasi caddahay oo aysan u baahneyn inaan ka jawaabo.

Teeda kale, waxaa waajib inagu ah inaan uga digno qatarta uu leeyahay qaadku umaddeenna, isla markaana ku boorinno dadka joojinta cunistiisa iyo ka ganacsigiisa intaba, waayo waxaan ognahay inuu dalka maalin kasta ka saaro boqolaal kun oo dollar oo aan kusoo badelanno lacagtaa adag caleen cagaaran oo aan haba yaraatee laheyn wax faa'iido ah qasaaro mooyaane.

Waxaana hubaal ah, in haddii lacagtaa lagu soo badelanayo qaadka loo jiheyn lahaa dhinacyada kale ee wax saarka ay abuuri laheyd shaqooyin badan oo ay ka shaqeysan kari lahaayeen dhammaan dadka hadda ka shaqeysta qaadka iyo kuwo kale oo fara badan.

Hadalkeyga waxaan kusoo xirayaa, in qaadku yahay masiibo ka mid ah musoobooyinka aan dabiiciga aheyn ee aan gacanteenna ku kasbanayno ee ku habsaday guud ahaan Soomaaliya, sida dagaalada sokeeye, adeegsiga qabyaaladda iyo kuwo kaloo badan, isla markaana loo bahan yahay in looga hadlo si toos ah, loogana digo waxyeeladiisa dadweynaha.

Qore: Issa Aden Ahmed
issa68@hotmail.com