|
Radio Midnimo (Boosaaso) 28.05/2003 Kulan xalay ay yeesheen
Golaha Xukuumada Puntland ayaa waxaa lagu aqoonsaday in
magaalada Carmo in ay noqoto degmo ku soo biirtay degmooyinka
dowlad Goboleedka Puntland.
Degmada Carmo ayaa qiyaastii magaalada Boosaaso ka xigta
100 KM dhinaca Koonfureed, waxaana la aasaasay sanadkii
1994, waxaana tan iyo xiligaas degmada ka muuqday horumar
dhinaca dhismaha iyo adeegga dadwenaha, Carmo waa magaalo
ay weli ka socoto horumarin xoog weyn, waxaa la geliyey
laymankii Telefoonada, waxaa kaloo laga hirgeliyey ileyska
korontada.
Degmada waxaa ku yaal ilaa iyo iminka hal warshad oo
sameysa barafka, wxaana ay leedahay Iskuul Hoose Dhexe
iyo Saldhig Boolis, waxaana ay ku taal deegaan u dhow
dhul beereedka Barookhle oo ah goobta ugu beero waaweyn
gobolka Bari.
Kulankan ayaa jewigiisu ahaa mid doodo adag la is weydaarsanayey,
waxaana gudoominayey Madaxweynaha Dowlad Goboleedka Puntland
C/laahi Yuusuf Axmed, waxaa kaloo ka mid ahaa arrimhii
looga hadlay kulankii xalay xaalada nabadgelyada magaalada
Boosaaso, heerka uu marayo heshiiskii nabadeynta Puntland
sidii dib loogu celin lahaa in ku dhow 150 qofood oo u
dhashay dalka Sirilaanka oo ku sugan magaalada Boosaaso,
loona keenay in si tahriib ah loogu dhoofiyo wadamada
Yurub.
Dhinaca kalena, waxaa lagu gudoomiyey kulankaas in xilka
ku simaha Madaxweynaha uu noqonayo Siciid Caduur, oo ah
Wasiirka Caafimaadka, sidoo kale Faarax Maxamuud Yuusuf
(Dooxojoog) oo ah Wasiirka Ganacsiga ayaa noqon doona
Sii hayaha Maamulka Dowladda ee Mandiqada Gobolka Bari.
Dood dheer kadib Waxaa kaloo aqlabiyad buuxda lagu ogolaaday
in magaalada Carmo loo aqoonsado heer degmo.
Warku wuxuu kaloo intaas ku darayaa in kulankii xalay
lagu soo bandhigay in ciidamda Gen. Cadde Muuse maanta
loo rari doono magaalada Qardho.
Radio Midnimo, Boosaaso
Mudugonline.com
|
