Jawaab:Badanaa Xilal aan loo meel dayin.....!!!

Maanta marka la fiiriyo xaalada Puntland ayaa waxaa moodaa in ay mareyso heer kala guur ah oo u eg in ay labo dhinac leedahay waa kan hore haddii lagu heshiin waayo heshiiska aysan inbadan umaddu ka war qabin laakiin inta waddaa ay sheegto in uu gabo gabo yahay ka dibna arintu kooro oogadood isku laasho,dhinaca kalena waa in ay ka soo baxaan wax loo dhan yahay oo ay umaddu kaga bugsooto dhibkii raadka ku reebey ee ay soo martey,waxaana rajeynayaa mar haddii meel kasta la soo taabtey in maanta caqligu shaqeeyo oo ay arintu noqoto mid la soo kufiyo.

Hadaba iyada oo ay xaalada puntland ay halkaa mareyso ayaa aniga waxaa indhaheyga soo jiitey maqaal dheer oo aan ka fogeyn arimaha layaabka leh ee ka dhacaya dalka kaas oo lagu daabacay bogaga hore ee Mudugonline.com qormadaan qoraalkeeda ayaa waxaa ka muuqdey in lagu soo ururiyey xogo badan oo aan is leeyahay aad ayaa loogu kuur galey raadin tooda waayo waxaaba ku jira kuwo shaqsi ah oo daaha ka qaadaya habdhaqanka qof iska leeyahay, waxaana meesha laga saari karin in saxaafada iyo suxufiyiinta looga fadhiyo in ay iftiimiyaan arimaha muuqda iyo kuwa qarsoonba iyaga oo raacaya habka iyo nidaam saxaafadeedka lagana fogaanayo wax keeni kara cadaalad daro, ka dibna ay ka dhalato in qof, guruub, beel, ama qaranba cagta la mariyo oo meel looga dhaco ama eed iyo dhaleecayn meelkale laga leeyahay dusha looga tuuro qolo kale oon shaqo ku lahayn laakiin loo maleyn karo in ay si ugu ekaan karaan eedaa iyada ah.

Intaas oo dhan marka meel la iska dhigo ayaa waxaa ii muuqda ciwaan far waaweyn lagu qorey oo loogu yeerey WASIIRNIMADA XASAN DAAFEEDOW; XILKA MID AH XILALKA AAN LOO MEEL DAYIN....Runtii marka aad agarto qormo lagaga hadlayo maamul iyo masuuliyad la dayacay ama lagu tagri faley waxaad jecleysaneysaa in aad loogu xoojiyo carabkana lagu adkeeyo khaladaadka ay iska caadeysteen madaxdu kuwaas oo kala garan waayey waxay yihiin iyo wixii loo dhiibtey ka dibna sidey doonaanba u dhaqma iyaga oo u qaba in aan waaguba baryeyn oo aan cidi arkeyn, hadaba mar hadii aan cidi wax ka qabin in lala xisaabtamo masuuliyiinta ayaa waxaa la is weydiinayaa yaa mas,uul ah, sideese ayaana masuul lala xisaabtami karo lagu noqdaa?.

Hadaba Muxsin Yaasiin oo qorey ciwaanka kor ku qoran ayaa inoo sheegey sida wasiirka xilkiisa la dhaliilayo loogu dhiibey jagadaan dayacu ka yimi markii uu ka hadlayeyna waxa uu yiri "XASAN WAXAA SHAQADA GEEYEY ISMAACIIL XAAJI WARSAME OO UU KALA HADLEY MAXAMED-DHEERE DIAKONIA OO AY XASAN ILMO HABREED YIHIIN".

Sida muuqata wasiirku shaqada waa la geeyey waxaana geeyey labada nin ee kor ku xusan qaabka loo geeyeyna waa qaab waasto ah waana noocyada la isticmaalo kan ugu liita waayo waxa uu ku dhisan yahay daneysi iyo anigaa ku geeyaye ii hay, Waana halka ay somalidu ka tiraahdo (ushaada ninkaad ka qaadan karto ayaa loo dhiibtaa,) markaa hadii ay taasi cataadey waxaa meesha ka baxaya in aaney jirin cid la xisaabtami karta wasiirka waayo wasiirba ma aha, waxaana mudan in lala xisaabtamo cidii meesha geysey oo ah labada nin ee kor ku qoran iyaguna ay qaadaan wixii ka xumaada shaqadii ay u dhiibeen, waxaa kale oo halkaan ka cad in maamulkii jirey ee umadu dhisatey uu galay gacmo dhowr qof oo kaliya oo iyagu markaa masiirka iyo maareyntaba go-aan ka gaari kara awoodana in ay masraxa soo saaraan hadba qofkii ay u arkaan in uu yahay qof la shaqeyn kara iyaga.

Waxaa kale oo uu qoraagu cadeeyey in uu wasiirku ku dhashey tuulada daafeed ee ku taal koonfurta somaliya sida magaciisaba ku cad taas oo cadeyneysa in uusan Puntland ku dhalan, iyada oo ay jogaan jagooyin kala duwanna ka qabteen rag ku dhashey Itobiya oo wax naaneys ahna aysan lahayn, waxaa kale oo uu qoraalka ciwaanka sare lehi uu qirayaa in waqtigii xilka loo dhiibey xasan ay ahayd waqtigii ay soo ifbaxayeen khaladaadkii iyo khilaafkii puntland kaas oo markii danbana ka dhigey mugdiyaal is dhexqaadey dalkii oo dhan ilaa ay sababtey in wax kasta ay gacanta ka baxaan.

Waxaan filayaa marka laga hadlayo nidaam sidaa u shaqeeya in ay iska yar tahay waxa laga sheegi karaa wasiiro ama waaxo maamul hadii aaney arintu meelkale cuskaney oo aysan arintu ahayn (miskiin baa misko la fuulo leh), marka waxaan aad u rajeynayaa in caqligaan awooda in uu wax soo bandhigo uu markaan isku dayo in uu daaha ka qaado halka sunta iyo waabayada lagu keydiyo si loo saxo wixii khaldamey, hadii aan kor waxba ka hagaagin ma filayo in ay hoos wax ka qabsoomayaan, waayo wax kasta waxay ka yimaadaan kor waxayna u socdaan hoos waana taa mida tuseysa qofkasta in halka geela laga maali-la-yahay ay tahay meesha ay amaradu ka soo baxaan, marka hadii uu yimaado xisaabtan iyo is ladhiilid waa wax loo baahan yahay waana waxa wax saxa laakiin u maley maayo in uu wasiir xumeeyey wixii Puntland ka xumaadey ee waxaan aamin sanahay in ay madaxtooyada ka xumaadeen, tusaale ahaan meeyey harkii weynaa ee nacfiga yaraa laakiin uu ruux walba harsanaayey, meeyey maamulkii aan xooga badneyn laakiin lagu ladnaa, aawey abnigii iyo is- dhex markii dadka wada dhashey, aawey koritaankii iyo dhaqaalihii ay dadku sameynayeen, aawey is dhageysigii iyo is-ixtiraamkii umadaan lagu yaqiin, aawey kala xishoodkii iyo kala xadeysnaantii dadku, aawey isimadii iyo odayaashii arintu ay ka go-i jirtey, iyada oo intaas iyo in ka badan ay dhaceen oo umaddii dhiig ay gacmaha ku wataan loona saarinayo waxaas oo dhan in ay madaxtooyada ka soo fulayaan dad badan oo qiimo ku lahaa gudaha iyo dibadaba dhiigoodii la daadiyey hilibkoodiina la warey banaanka, ayaa maanta waxaa ka muuqda bogaga hore ee Mudugonline.com ciwaano lagu eedeynayo nin aan la garaneyn waxa uu umada caadiga kaga duwan yahay iyadoo lagu eedeynayo jid caro kaawo ah oo isku xiri lahaa labo magaalo.

Ugu danbeytii waxaan codsanayaa in la saxo waxa weyn ee ina ka qaloocsamey markaa ayey inoo saxmayaan wax yariye, hadii aynaan sidaa yeelin waxaa inoo cadaaneysaa in ay arinteenu noqoneyso (Hal xaaraan ahi nirig xalal ah ma dhasho) oo ka dibna aan kala garan weyno meesha aan u socono iyo waxa aan dooneyno hadii aan rabno in aynaan jidka ka dhicin, markasta waxa aan wax ku dhiseyno waa in ay ahaadaan caddaallad iyo caqli wanaagsan, si aan uga fogaano tacasub qof koox iyo beelba, markaas ayey saxaafadu macno yeelayeysaa waxna sixi kartaa, laakiin haddii markasta ay xaaladu tahay in aan la gaarsiin halka dabku ka baxayo oo meel dhexe lala beegsado arintu waxay noqoneysaa xoog doofaar lagu eryey wax guul ahna ka soo hoyan maayaan arinta kale ee iyaduna dabartey in caqliga wanaagsani shaqeeyo, waxaa weeye dhinac jirka uu rayi kastaaba dhinac jiro isaga oo eexaysanaya qolada uu xaga fikirka raacsan yahay ka dibna ay u muuqan waayaan waxkasta oo waaqiciga ka jawaabaya xataa hadii ay u muuqdaana ay dhinac maraan inta badan waana mida badanaa ay u dhacdo in ay muuqan waayaan waxyaabaha waawey ee dhacaya iyadoo dabka lagu shidayo kuwo yar-yar oo markaa qarsoon, ka dibna waxaa lumaya miisaanka iyo cabirka wanaagsan ee loo qaadi lahaa jidka haboon.

Gabo-gabadii waxaa albaabkasta taagan maanta eed iyo wax ismoodsiin faro badan waana mida keentay in umaddaan meeshii la taabtaaba ay boogta tahay ay sii kala fogaato, hadaba iyada oo laga duulayo midaa waa in lala jaan qaadaa halka amuuruhu marayaan oo aan hoos looga dhicin doorka ummadda loogu aadan yahay lalana yimaado waxyaabaha taabo gelin karaya in dadku ay ku kalsoonaadaan saxaafada midaas oo asalkeedu yahay in laga sheego run waliba la soo hubiyey inta aan la daabicin ee aan laga qorin bogaga hore ee wararka aduunka.

Booqde Dhiice Malaas Rabaax.
dhiice@hotmail.com
Dhiice@yahoo.com

>>>>Halkaan ka akhri maqaalkii Muxsan Yaasiin>>>