Dagaalkii Ciraaq oo
qaraaraaday iyo siday wax u
dhaceen
Ottawa, 23 March 2003 (MOL)-Waxaa Maalintii 5-aad
socda dagaal aad u qaraar oo cir, dhul iyo baddaba ka socda oo
xulafada isbahaysiga Maraykanka iyo Ingiriisku ku qaadeen Dawlada
Ciraaq. Dagaalkaan oo maalinba maalinta ka dambeysa ka sii qaraaraanaya
ayaa la soo sheegayaa in ciidamada xulafada Isbahaysigu la kulmeen
iska caabin weyn oo kaga timid dhinaca ciidamada Ciraaq oo aysan
filayn. ciidamada xulafada ayaa la soo sheegayaa in ay la kulmeen
qasaare leh dhimasho, dhaawac iyo maxaabiis laga qabsaday. illaa
hadda inta la ogyahay shalay, xalay iyo maanta waxaa dhinaca Maraykanka
ciidmadooda soo gaaray:
- nin Ciidamada Maraykanka ka mid
ahaa oo qarax la beegsaday teendho ay hurdeen saraakiisha ciidanka
cirka ee Maraykanka 12 nin oo dhaawac iyo hal sarkaal oo dhintay.
ninka Maraykanka ah ee weerarkaan geystay ayaa la sheegay in magaca
aabihiis ahaa magac Carabi ah. waxaa la tuhunsan yahay in ninkaas
ka xumaaday dadka Muslimka ee Ciraaq ee lagu weerarayo.
- Magaaladii Umm Qasr
oo ciidamada isbahaysigu sheegeen inay qabsadeen bilowgii dagaalka
oo wali Ciraaqiyiintu iska caabin ka wadaan.
- Diyaarad dagaal oo
Ingiriiska leeyahay oo ciidamada gantaalahooda cirku soo rideen
iyadoo ku soo noqotay Kuwait, taas oo lama filaan ku notay ciidamada
Cirka Isbahaysiga oo hadda ka walwal san arintaas.
-Diyaarad kale oo Dawlada
ciraaq sheegtay in lagu soo riday Bagdaad oo wali ay la raadinayo
Pilot-kii diyaarada, Maraykanka oo beeniyay in diyaarad laga soo
riday.
- Magaalada Nasriya
oo ciraaq soo saartay sawiro maxaabiis 5 ah oo Maraykan ah iyo
50 kale oo dhaawac ah oo Maraykanku halkaas ka daad gureeyay iyo
dhimasho la sheegay illaa 6 laakiin aan wali xaqiijin. Maraykanka
oo ka carooday sawirada maxaabiista oo sheegay inay arintaasi
ka soo horjeedo sharciga qaramada midoobay ee daryeelka maxaabiista
dagaalka.
Dhinaca Maraykanka iyo Ingiriiska ayaa iyaguna geystay
qasaarooyin badan:
- Qaraxyadii lagu waday
magaalada Bagdad oo wali socota iyadoo dhismayaal badan oo magaalada
ah gubanayaan. dad badan oo shicib ahna halkaas ku nafwaayeen
qaarna ku dhaawacmeen.
- Ciraaq oo sheegtay
illaa 77 qof oo shacbi ah inay ku dhinteen Basra dhaawacuna kof
u dhaafay dhawr boqol. Nasriyana ciidamo ciraaq oo illaa 100 ah
ayaa la Maraykanku sheegay inay ku dhinteen.
- Maraykanka oo sheegay
in dhawr kun oo ciidamada Ciraaq isku dhiibeen Basra.
- ciidmada Maraykanka
oo sheegay inay gaareen magaalada Najaf oo Bagdad u jirta 160Km.
- Magaalada Basra oo
ka go'een biyahii iyo korontadii cuntaduna gabaabsi tahay.
Dagaalkaan oo aan ahayn siday filayeen ciidamada
Maraykanka oo Ciidamada Ciraaq ay hadda si fiican u dagaalayaan
oo aysan sidii dagaalkii gacanka ee 1991 aysan is dhiibayn ayaan
la saadaalin karin inta uu socon doono iyo cida guushu raaci doonto.
Magaalooyinka aduunka oo dhan ayaa wali waxaa ka socda Mudaharaadyo
balaaran oo looga soo horjeedo dagaalka. Magaalada NewYork ayaa
waxaa isugu soo baxay dad lagu qiyaasay illlaa 300.000 oo qof,
magaalada London sidoo kale. Wadamada Muslimka ayaa iyana Mudaharaadyadu
wali soconayaan.
Mudugonline.com
Maalinta biyaha Aduunka
oo Gaalkacyo laga xusay
Gaalkacyo, Axad, Mar 23, 2003 (AllPuntland)- Xaflad
balaaran oo lagu xusayay maalinka biyaha aduunka ee 22 bisha maarso
ayaa xalay 7-dii fiidnimo ka dhacday xarunta wakaaladda biyaha
ee magaalada Gaalkacyo.
Xafladaan oo si heer sare ah loo soo agaasimay waxaa
kasoo qayb galay madax ka socotay gobolka Mudug oo uu ka mid yahay
gudoomiyaha gobolka Mudug Cabdirashiid Cali Xaashi, Ganacsato
, Gudiga Sportiga gobollka Mudug, ururada dhalinyarada , ururka
Ardayda iyo marti sharaf kaleeto.
Ugu horayn gudoomiyaha gobolka mudug Cabdirashiid
Cali Xaashi oo xafladda furay ayaa ku nuux nuuxsaday faa'iidada
biyaha iyo siday lagama maar maan u tahay in biyo nadiif ah la
helo, biyo nadiif ah oo wada gaara dadka magaalada Gaalkacyo,
asagoo si gaar ah UNICEF uga codsaday in biyaha ay gaarsiiyaaan
xaafadaha ay magaaladu u korayso.
Wakiilka UNICEF ee Puntland Mr Jundi oo halkaasi
hadal dheer kasoo jeediyay ayaa ka war bixiyay wax qabadka ay
hay'adda UNICEF u qabatay dadka Soomaaliyeed, wuxuu sheegay inaysan
UNICEF biyaha kaliya ku shaqo lahayn ee ay dadka ka caawiso siddii
ay u heli lahaayen goobo caafimaad iyo meelo ay dadku isku nadiifiyaan
oo ay ka hirgaliyeen tuuloyinka Soomaaliya.
Eng. Hashim oo dhanka biyo galinta u qaabilsan UNICEF
oo halkaasi ka hadlay ayaa sheegay in dhamaan magaalada Gaalkacyo
ay heli doonto biyo ku filan aysana jiri doonin qayb ay biyu gaaraan
iyo qayb aysan gaarin .
Dhamaan dadkii halkaasi ka hadlay ayaa hadalkoodu
u badnaa faa'iidada biyaha.
Ururka dhalinyarada Gobolka Mudug ee MYO ayaa halkaasi
ku soo bandhigay majaajilo aad loola dhacay oo ku saabsanayd faa
iidada biyaha.
Xafladaasi waxay kusoo gabo gabowday jawi wanaagsan,
sidda uu kusoo waramayo wariyaha AllPuntland ee Gaalkacyo Cabdulqaadir.
Allpuntland
