shirkii Ururka Comesa
oo maanta ka furmay magaalada Khartoum
Khartoum , Mar 17, 2003 (MOL)-Waxaa ka biloowday
maantay magaalada khartoum, caasimada dalka sudan kulan ay yeesheen
dowladaha ku bahoobay uruka comesa,(suuqa ay
wadagaan koonfurta iyo bariga Africa). Kulankaan ayaan
looga soo qayb galin sidii la moodayay kadib markii ay ka baaqdeen
madaxda wadamada kala ah: Uganda, Rwanda,Congo iyo Burindi,
kuwaas oo ku mashquulay arimo ka jira gudaha wadamadooda. Waxaa
ka soo qayb galay shirkaan madaxwayne ku xigeenada Kenya, Uganda
,Rwanda ,raiisul wasaaraha dalka Jabuuti iyo Males-zinawiga
Ethiopia.
Shirkaan ayaa waxaa looga hadlayaa arimaha ganacsiga,
gaar ahaanna ganacsiga Xorta ah iyo xalaada nabadeed ee gobolka,
Warbixin lagu dul akhriyey wasiirada arimaha dibada ee dalalka
ka soo qayb galay ayaa lagu xusay dhibaatooyinka ka jira wadamada
dariska ah sida: Sudan, Eriterea, Ethiopia, Congo iyo Somalia.
Arinta soomaliya iyo shirka nabadaynta kooxaha soomalida ee
ka socda Kenya ayaa la filayaa in lagu soo qaado shirkaan.
jawaab uu ka bixiyey Males zinawi warqad uu u
soo qoray madaxwaynaha dalkan sudan ayuu ku sheegay inay ka
wada hadli doonaan arimaha somaliya marka uu yimaado magaalada
Khartoum, iyo inuu ka qayb qaadan doono heshiiska uga socda
dowlada sudan iyo mucaaradka dalka Kenya.
Dowlada sudan ayaa iyadu soo bandhigi doonta gargaar
loo fidinayo dalka Zimbabwi, dalkaas oo dhawaan midowga reer
yurubi ku soo rogeen cunaqabatayn arimo la xiriira siyaasadooda
ku wajahan beeraha dadka cadaanka ah lagala wareegay si loogu
qaybiyo dadka wadanka u badan ee madowga ah.
Mudugonline.com
Madaxweynaha Puntland oo Kenya kasoo
tagay
 |
| Bidix ka Bilow: Madaxweyne
Xigaha Puntland, Maxamed cabdi xashi, Ugaas Xasan Ugaas
Yaasiin, Cabdullaahi Yusuf |
Garoowe, Mar 17, 2003 (AllPuntland)- Wafdi uu
hogaaminayo madaxwaynaha dawlad goboboleedka Puntland Cabdullaahi
Yuusuf Axmed oo ay ka mid yihiin wasiirka maaliyadda ee Puntland
C/raxmaan Maxamed, xubno baarlamaanka ku jira, iyo Ugaas Xasan
Ugaas Yaasiin ayaa maanta duhurnimadii soo gaaray magaalo madaxda
Puntland ee Garoowe.
Cabdullaahi Yusuf iyo wafdigiisa ayaa markii ay
yimaadeen Garoowe shir dag dag ah la yeeshay madaxwayne ku xigeenka
Puntland Maxamed Cabdi Xaashi iyo xubno ka tirsan golaha wasiirada,
shirka oo albaabadu u xirnaayeen ayaa warar ku dhaw dhaw sheegayaan
inay ka wada hadleen arimo ay ka mid yihiin shirka dib u heshiisiinta
Soomaailiyeed ee haatan ka soconaya magaalada Nairobi iyo arimo
la xiriira maamul goboleedka Puntland.
Cabdullaahi Yusuf wuxuu sheegay inuu dalka u yimid
asagoo ilaalinaya Dastuurka Puntland, wuxuu sheegay in uu u
dhamaaday wakhtigii dastuurk Puntland u dhigayay in madaxwaynuhu
uu dalka ka maqnaan kareyn.
Cabdullaahi Yusuf ayaa sheegay in 2 maalmood ka
dib uu ku laaban doono shirka dib u heshiisiinta Soomaaliyeed
ee lagu qabanayo dalka Kenya.
Dastuurka cusub ee Puntland ayaa dhigaya in ninka
haya xilka madaxweynuhu uusan dalka ka maqnaan karin mudo ka
badan lixdan maalmood (60 Bari)
Tagi taanka Cabdullaahi Yusuf iyo wafdigiisa ayaa
kusoo beegmay maalin ka dib markii uu Ergayga Kenya u qaabilsan
Shirka Somalidu uu ku baaqay shir ay isugu yimaadaan madaxda
dhinacyada Somalida ee ku shirsan Kenya.
Cabdullaahi Yusuf oo qaar ka mid ah ergada Puntland
shirkaas uga qayb galaysay ay horay u soo raaceen ayaa wararka
ku dhawdhaw sheegayaan inuu shirka inta uu ka maqan yahay booskiisii
uu sii haynayo Cawad Axmed Casharo oo ah wasiirka Diinta iyo
Awqaafta Puntland.
Allpuntland
Ciraaq oo la weerari doono NY , Mar 17, 2003 (MOL)- Dawladaha Ingiriiska iyo
Maraykanka ayaa ka kaaftoomay inay ogolaansho u helaan qaraar
ay doonayeen in golaha amaanka qaramada midoobay u codeeyo ka
dib markay xaqiiqsadeen inaysan ogolaanshahaas heli doonin, taas
oo jidka u xaaraysa in labadaas dawladood weerar wada jira ku
qaadaan Wadanka Ciraaq iyagoo ka haysan wax ogolaansho ah golaha
amaanka qaramada midoobay. Dawlada Faransiiska ayaa sheegtay in
haddii Maraykanku isku dayo inuu helo ogolaanshaha golaha amaanka
ay isticmaali doonto codkeeda VETO-ga si ay isku horistaagto ogolaansha
qaraarkaas oo aysan xal u arag.
Dawladaha Aduunka ayaa intooda badan ka soo horjeeda
dagaal lagu qaado Dawlada Ciraaq iyadoo haatan kaliye taliyaha
Ciraaq Sadam Xuseen ogolaaday sharuudihii qaramada midoobay ee
looga dhigayay hubka sida xun wax u gumaada. sababta ugu weyn
ee aduunku uga soo horjeedo dagalka Ciraaq ayaan ahayn jaceyl
loo qabo Sadam Xuseen ee ay uga wacan tahay baqdin laga qabo in
dad Badan oo Ciraaqiyiin ah oo aan waxba galabsan ay ku hooban
doonaan dagaalkaas Maraykanku maagan yahay. waxaa la filayaa 2-da
beri ee u horeeya dagaalkaas in Dawlada Ciraaq lagu gamo gantaalaha
dagaalka oo tiro ahaan le'eg intii lagu riday dagaalkii gacanka
ee 1991 wadanka ciraaq. taas oo looga dan leeyahay in argagax
lagu rido ciidamada iyo shacabka Ciraaq ka dibna ay is dhiibaan
iyagoon dagaal galin. Dawlada Maraykanka ayaa u sheegtay hub baarayaasha
Qaramada Midoobay inay isaga baxaan wadanka ciraaq iyagoo intaas
raacshay in waqtigii diblomaasiyadu dhamaatay oo la gaaray waqtigii
runta, taas oo loo fasirtay in weerarka lagu qaadayo wadanka ciraaq
inuusan hadda fogayn.
Dawlada Maraykanka ayaa la filayaa in ay dagaalkaas
qaado asbuucaan gudihiisa ama dhamaadkiisa iyadoo kaashanaysa
ciidamo ka socda boqortooyada ingiriiska. illaa hadda lama saadaalin
karo inta uu socon doono dagaalkaas. quburada saadaasha hawgalada
milatariga ayaa ku qiyaasay ugu badnaan 2 asbuuc in Dawlada Maraykanku
gabi ahaan la wareegi doonto maamulka dawlada Ciraaq haddii aan
ciidamada Ciraaq sida la filayo dagaalin. Ciidamada Maraykanka
ayaa la filayaa hadday ku guulaystaan dagaalkaan inay Ciraaq sii
joogi doonaan sannooyin badan, iyadoo wadanka Ciraaq laga xukumi
doono wasaarada gaashaandhiga ee Pentoganka sidii lagu sameeyay
Dawlada Japan ka dib markii lagu jabiyay Dagaalkii Labaad ee aduunka.
