Mbagaati [MOL] 28 Jun 2003- Waraysi ay Idaacada HornAfrik ee Muqdishu la yeelatay Madaxweynaha Puntland Cabdulahi Yusuf oo ku saabsanaa meesha uu marayo shirka Mabagthi ee Somalida ayuu ku sheegay in shirka uu guulaysan doono haddase ay jiraan caqabado ay hor dhigeen dad leh ujeedooyin u gooniya. Mar la weydiiyay in Golaha SRRC iyo kooxda TNG-Carta qoloba mar ay shirka ka baxday ayuu ku tilmaamay taas in aysan isagu inta uu ogyahay aysan dhinacooda marna ka bixin shirka, qofkii ka baxa shir socdana uusan garan karin waxa uu uga dan leeyahay.

Cabdulahi Yusuf oo la weydiiyay sababta dhinacooda ay wali ugu dhagan yihiin in xubnaha baarlamaanku noqdaan 450 ayaa sheegay in taasi ay ahayd wax horey loogu heshiiyay, dadka haatan diidana in tirada xubnaha Baarlamaanka laga dhigo 450 xubnood ay ahayeen isla kuwa hadda raba in tirada wax laga badalo, dadkaas oo uu ka magacaabay Maxamed Qanyare iyo Xasan Abshir Farah. dadka noocaas oo Cabdulaahi siyaasadooda ku tilmaamay mid la mida dabaysha xagaaga mana laha mowqif iyo mabda'a siyaasadeed iyo meel loogu soo hagaago toona.

Cabdulahi Yusuf ayaa sheegay in kooxda Carta markii hore dan gooniya kalahayd in xubnaha baarlamaanka la gaarsiiyo 450 iyagoo rajaynayay in 245-tii xubnood ee baarlamaankii Carta lagu soo daro tiradaas si loo gaarsiiyo 450, arintaas oo hadda suuragal ahayn ka dib markii xubnaha baarlamaanka lagu qaybiyay "saamiga 4.5 rule" oo lagu saleeyay qabiil..

Mar la weydiiyay in Kooxda SRRC iyo Maamulka Puntlandba ay aad xulufo ula yihiin Dawlada Itoobiya oo rabta inuusan guulaysan shirka iyo in Gen. Morgan oo ciidamo Itoobiyaan ah wata uu ku soo wajahan yahay Magaalada Kismayo ayaa Cabdulahi sheegay inuusan cidna ka habaysanayn arrimaha la xiriira danta Somaliyeed, danaha Ummada Soomaaliyeedna inuusan kala tashnayn cid ajnabi ah. waxuu kaloo ku tilmaamay dhagar qabe dhulkaa u dhaqdhaqaaqa, dad iska baqaya oo meel cidla ka baqaya weeye dadka warkaas Itoobiya faafinaya, markii ay iyagu wax qabsan waayeen, dhaqana ka dhigtay inay arimahaas lacago ku qaataan weeye dadka fidiyaa wararka beenta ah ee ah in Itoobiya Somaliya soo weerarayso. Waxuu sheegay Cabdulahi Yusuf in arintaas wax jirana aysan ahayn isna raali ka ahayn in Somaliya Dagaal dambe ka dhaco.

Mudugonline.com

Magaalada Muqdisho ayaa waxaa ka socda diyaargaroow xoogan, hogaamiye kooxeedka Cusmaan Xasan Cali (Caato) ayaa 4 tikniko ah iyo afar gawaarida waaweyn u diray Jubbadda Hoose, inkastoo laba tikniko ah iyo laba wiish ay dib ugu soo noqdeen Muqdisho ka dib markii maleeshiyadii saarnayd ay isku afgaran waayeen dagaalka loo diray, halka afartii kale ay ka gaareen Mugaanbe oo ay ku yaalaan beero Cismaan lee yahay oo la sheego in dalaga ku beeran ay ka mid yihiin maandooriyayaal (daroogo).

Dhinaca kale Gen. Galaal iyo col. Xasan Daahir Aways oo isagu ku jira liiska uu Maraykanku radiyo ayaa Muqdisho kula lahaa beelaha degan wadahadalo ay ku macneeyeen siddii looga hortagi lahaa weerar ka soosocda dhinaca Itoobiya, waxaa socda dhaqdhaqaaq xoog badan oo lagu uruurinayo maleeshiyooyin.

Dhinaca kale magaalada Kismaayo ayaa waxaa ugu yaraan la isugu geeyay goobo kala duwan ilaa 600 oo maleeshiyo ah, uruurinta maleeshiyaadka oo uu ka dhashay muran badan oo la xiriira maleeshiyooyinka oo dalbaday mushahaaro ay ku dagaal tagaan ayaa hadda la xaliyay ka dib markii loo balan qaday in la siindoono lacag.

Inkastoo dhaqdhaqaaqaan lagu abaabulayo in lagaga hortagayo weerar uu soo wado Jenarla Morgan ayaa haddana dhinaca Gen. Morgan ay sheegayaan in uusan jirin wax weerar ah oo ay maagan yihiin Col. Mahdi Miicaad oo ah afhayeenka Morgan ayaa sheegay in ciidankoodu ay joogaan rugahay horay u joogeen uusana jirin wax dagaal ah oo ay meel ku damacsan yihiin inay ku qadaan.

Dhinaca kale ayaa Gen. Galaal oo Muqdisho joogaa sheegayaa inuu ka hortagayo waxa uu ugu yeeray ciidamo itoobiyan ah oo soo dagay Ceel barde, oo uu sheegay inuu horkacayo Gen Morgan.

Wararka laga helayo dadka socotada ah ee ka imaanaya Bakool ayaa sheegaya in Gen. Morgan oo mudo ka maqnaa dhulkaas uu iminka yimid fariisamada ciidamadiisa, warku ma sheegin ciidamo Itoobiyaan ah oo aagaas soo galay, waxayse dadku sheegeen in markii gen. Morgan naf ahaantiisu yimid halkaas ay dib isku uruursadeen maleeshiyaadkiisii horay xooga looga soosaaray Kismaayo oo mudooyinkaan dambe ku kala firirsanaa Bay iyo Bakool.

Warar laga helay Kismaayo ayaa sheegaya in deegaanka Bu'aalo looga cabsi qabo inuu ka bilowdo dagaal, ka gadaal markii maleeshiyo laga soo diray Kismaayo ay halkaas soo wajaheen, iyadoo taageerayaasha SPM/SRRC ee aagaasina ay diyaar garoow bilaabeen.

Waxay u muuqataa mid diblaamisayada loogu talo galay marka la eego hadalada diblamaasiyadeed ee Itoobiye weerarka ah ee ka soo yeerayay Madaxweynaha garab ka mid ah DKGM ah/ Kooxda Carta Cabdiqaasim Salaad Xasan oo isagu ku sugan Nairobi iyo qaylo dhaanta Gen. Galaal ka wado Muqdisho oo uu ku sheegayo weerar ka soosocda Itoobiya, tani oo dadka Muqdisho u fasirteen in beesha labada nin ay kasoo wada jeedaan ay dadaal ugu jirto inay siyaasadooda ka iibshaan Muqdisho, iyadoo ay u muuqato mid quusatay DKMG ah /Carta marka la eego shirka Somalida uga socda Kenya.

DKMG ah / Kooxda Carta qofba sidda uu u yaqaan ayaa la ogyahay in awoodeeda siyaasadeed, mida ciidan iyo mida dhaqaalaba ay gacanta ugu jirto beesha Cabdiqasim iyo Gen. Galaal.

AllPuntland, Muqdisho