Mbagaati [MOL] 26 Jun 2003- Wararkii ugu dambeeyay ee ka imaanaya madasha shirka ee Mbagathi ee magaalada Nairobi ayaa sheegaya in golaha SRRC shirkii shalay ka caroodeen ka dib markii kooxda Carta iyo isbahaysiga G8 ay soo jeediyeen in tirada baarlamaanka laga dhigo 360 xubnood. Golaha SRRC ayaa ku doodaya in horey hogaamiyaasha siyaasadu ugu heshiiyeen tirada baarlamaanka iyo cidda soo magacaabaysaba.

Golaha SRRC ayaa wali ku dhagan in tirada baarlamaanka loo daayo 450 xubnood taas oo dawladaha deeqda bixiya ay ku tilmaameen tiro aan suura gal ahayn.

Deeq bixiyaasha iyo Dawladaha xiiseeya arimaha Somaliya ayaa soo jeediyay in baarlamaanka dawlada cusub laga dhigo tiro dhan 170 xubnood. tiradaas oo dadka intiisa badan ay u arkaan caqli gal, waxaase moodaa in kooxaha Somalidu aysan xal wadin ee ay meesha u joogaan in koox walba ka soo horjeesato waxa kooxda kale taageerto ama soo jeediso.

Mudugonline.com

Cabdiqaasin waxa uu sheegay in shirka haatan soconaya laga saaro labada xubnood ee ugu sareeya maamulkiisa marka asaga laga soo tago oo kala ah Gudoomiyaha Baarlamaanka Cabdalle Deeroow iyo Ra'iisul wasaaraha Xasan Abshir, sida ay sheegayaan warar aanu ka helnay halka uu shirku ka socdo Cabdiqaasin ayaa dalbaday in cidda shirka DKMG ah/Kooxda Carta uga qaybgalaysa uu isagu soo xulanayo.

Arintaan ayaa soo baxday markii uu guul daraystay isku day lagu doonayay in lagu soo afjaro khilaafka u dhexeeya Cabdiqaasim iyo Cabdalle Deeroow, khilaafkaas oo keenay inuu Cabdalle ku dhawaaqo inuu yahay Madaxweynaha DKMG ah/ Kooxda Carta, Cabdalle Deeroow Isaaq gudoomiyaha Baarlamaanka isla markaana ah madaxweynaha garabka kale ee DKMG ah/ Kooxda Carta ayaa gaashaanka ku dhuftay isku day lagu doonayay in lagu heshiisiiyo isaga iyo Cabdiqaasim, Deeroow ayaa loo balan qaaday 200, 000 oo dolorka Maraykanka ah haddii uu ka noqdo mawqifkiisa sababay kala qaybsanka DKMG ah/ Kooxda Carta, taasi oo uu iska diiday, Deeroow ayaa ku adkaysanaya in xiligii DKMG ah/ Kooxda Carta uu dhamaad yahay, uusana wax shuruud ah hordhigayn in dawlad tooda xilka kala wareegta lagu soo dhiso Mbagathi, Xasan Abshir iyo Cabdiqaasim ayaa iyaga la xaliyay khilaafkii u dhexeeyay, Xasana wuxuu hormood ka ahaa isku day lagu doonayay in Deeroowna heshiiska kusoo biiro.

Waxaa horay uu Cabdiqaasin uu u dalbaday in shirku uusan socon doonin inta ay Somaliland ka maqan tahay, isagoo dalbaday haddii aan la keenin inuu shirku noqonayo midaan loo dhamayn.

Waxaa jira masuuliyiin badan oo Cabdiqaasin kula taliyay inuu shirka ka qayb galo isla markaana uu ka miro dhaliyo, balse dadka siyaasadda ka faalooda ayaa sheegay in arinta Cabdiqaasin u egtahay Dawladaydiiba socon waydaye tukale yaysan socon, taasoo bulshada caalamka ay horay digniino uga soosaartay cidii shirka xagal daacinaysa in wax laga qaban doono.

Cabdulqaadir Cabdullahi Cusmaan iyo Xarunta
Allpuntland

25-06-03 Radio Galkacyo:GUJI HALKAAN.