SHUBAN CALOOLEED AYAA LAGA SOO SHEEGAYAA MEELO KALE OO KA TIRSAN DEEGAAMADA PUNTLAND

Radio Midnimo, 14 Jun 2003, Boosaaso-3 qof ayaa ugu dhintay magaalada Garacad ee Gobolka Mudug shuban calooleed la sheegay in uu halkaas ka dillaacay, warku wuxuu intaas ku darayaa in Isuduwaha Caafimaadka G/mudug iyo hay’ada MSF ay deegaanka Garacad socdaal ay ku soo xaqiijinayaan xaalada caafimaad ee deegaankaas ugu kicitimeen.

Dhinaca kalena wararka aanu ka helnay Guddiga ka hortaga cudurka Daacuun Caloolaha ayaa sheegaya in deegaamo ay ka mid yihiin Carmo, Kala-bayr, Al-xamdulilaah iyo Qardho iyana laga soo sheegay astaamo muujinaya in shuban biyood uu ka jiro.

Ceelaha iyo berkadaha magaalada Boosaaso ee dadweynuhu ka cabaan ayaa lag bilaabay daaweynta biyaha ee maadada Koloriinta, Guddiga ka hortaga cudurka Daacuunka ayaa iyaguna waxay dadweynaha uga digayaan in ay ilaaliyaan nadaafada deegaamada ay ku nool yihiin iyo nadaafada biyaha si cudurka Daacuunku uusan u haleelin.

Radio Midnimo, Bosaaso
Mudugonline.com

Radio Midnimo, 14 Jun 2003, Boosaaso- Guud ahaan waxaa manta ka bilowday magaalooyinka waaweyn ee Puntland imtixaankii fasalka ugu danbeeya ee Dugsiga Sare looga gudbi lahaa.

Magaalada Boosaaso ayaa imtixaanka dugsiga sare looga gudbayo waxaa u fariisan doona arday gaareysa 73 arday oo wiilal iyo gabdho isugu jira, waana markii ugu horeyay tan iyo markii la waayey dowladii dhexe ee Soomaaliya imtixaan noocan oo kale ah uu ka dhaco magaalada Boosaaso iyo guud ahaanba Puntland.

Munaasibad lagu maamuusayey furitaanka imtixaanka oo lagu qabtay dugsiga sare ee Boosaaso ayaa waxaa ka soo qayb galay masuuliyiin ka socday Dowlad Goboleedka Puntland oo ay ka mid ahaayeen Madaxweyne ku xigeenka DGPL Md. Maxamed Cabdi Xaashi.

Maxamed Cabdi xaashi ayaa halkaas hadal gaaban ka jeediyey wuxuuna sheegay in aduunyadu ay ku tartanto sidii qof walbaa heerka koowaad u noqon lahaa, waxaana uu ugu bogaadiyey aradayda ka qalan jebinaysa dugsiyada Sare ee Puntland in marka la eego heerka ay mareyso Tacliinta Soomaaliyeed in ay heerka Koowaad ay ka joogaan, wuxuu kaloo intaas uu ku daray in cilmiga iyo tiknoolajiyadeeda adduunka oo heer sare mareysa in ay nasiib darro noqotay in aynu noqono kuwii ugu horeeyey ee manta ka baxa dugsiga sare.

Ku xigeenka Madaxweynuhu wuxuu kaloo xusay in aynu laheyn Jaamacado, Iskuulo Sare, machadyo, balse aynu inagu burburinay.

Wasiirka Waxbarashada Xasan Maxamud Dhiilood ayaa isaguna ka mid ahaa masuuliyiintii xafladan ka soo qayb galay, wuxuuna sheegay in aradaydaani ay yiniin mudadii Dowlad la’aanta kuwii ugu horeeyey ee imtixaan dugsi sare u fariista, wuxuu kaloo intaas ku daray in uu guul u rajeynayo.

Wasiirka oo mustaqbalka ardayda ka hadlay ayaa sheegay in la rajeynayo in dowlad Soomaaliyeed ay dhalan doonto oo ay soo dhowdahay, dowlada dhalan doontana ay baahi weyn u qabto aqoonta iyo waxbarashada ayna Iskoolarship u raadin doonto,

Dhinaca Puntland ayuu sheegay in ay jiraan Iskoolarshibyo ay u raadiyeen oo ay heleen, wuxuu kaloo carabka ku dhiftay in qaarkood Booliska loo tababaro oo fursado laga siiyo.

Radio Midnimo, Bosaaso
Mudugonline.com

Radio Midnimo, 14 Jun 2003, Boosaaso- Xaflad balaaran oo ay ka soo qayb galeen masuuliyiin fara badan oo Puntland ka socda iyo odayaasha iyo waxgaradka beelaha ayaa lagu qabtay magaalada Carmo.

Weriyayaal Radio Midnimo ah oo ka qayb galay xafladaas ayaa sheegay in xafladani ay ahayd mid aad u heer sareeysa oo si weyn loo abaabulay, ayna ka dhex muuqdeen inta badan Golaha Xukuumada DGPL, Taliyayaasha Ciidamada Daraawiishta iyo Booliska, Maamulka iyo Degmada Gobolka Bari iyo dadweyne aad u fara badan iyo kooxda Fanaaniinta Walaalaha Gobolka Bari.

Wasiirka Maaliyada DGPL C/raxmaan Maxamed Faroole ayaa sheegay in dowladdu ugu deeqayso 20 Kun oo Doolar qodida iyo biyo gelinta magaalada Carmo oo la filaayo in ay dhowaan bilaaban doonto.

Wasiiru Dowlaha Amniga Warsame Cabdi Shirwac (Seefta Banaanka) oo isaguna xafladan ka hadlay ayaa ku tilmaamay magaalda Carmo meesha ay ku taal in ay tahay meel Barakeysan, wuxuuna dadka degan ugu baaqay in ay magaalada dadeeyan ee aysan ciddeynin. Wuxuu kaloo intaas ku daray in ay noqon karto magaalo muhiim u ah ganacsiga, xoolaha dhoofaya lagu nasiyo iwm.

Wasiirka Ganacsiga ahna Sii hayaha maamulka dowladda Faarax maxamuud Yuusuf “Dooxo-joog” ayaa isaguna si weyn ugu mahad celiyey dadka deegaanka oo muujiyey isku kalsoonaan dheeraad ah, wuxuuna ku booriyey in ay sii laba jibaaraan howlahooda, isagoo intaas raaciyey in Maamulku uu karaankiis gacan ka geysan doono horumarka degmada.

Wasiirka Waxbarashada, Xasan Maxamud Dhiilood ayaa isaguna muujiyey in loo baahan yahay in magaalada loogu talo galo iskuulo ay wax ku bartaan dhalanku, garoomo iy meelo ciyaalku ay ku ciyaaraan,

Ku xigeenka Wasiirka Dowladdaha Hoose C/risaaq Cali Siciid ayaa isaguna sheegay in dhowaan la soo dhisi doono maamulka magaalada, wasaaraduna ay gacan ka geysan doonto hirgelinta mashaariicda qaarkood.

Guddoomiyaha Gobolka Bari Ibraahin Cartan (Xaaji Bikiin) wuxuu isaguna sheegay in degmada laga rabo howlihii ay degmo qaban jirtay oo dhan, wuxuu kaloo ku booriyey in deegaanku magaaladu uu noqdo meel dadku u siman yihiin oo qofkii doonaa uu soo degi karo.

Ugu danbeyntii, Duqa magaalda Salaad Cali Hogoto ayaa wuxuu ka codsaday Maamulka iyo hay’adahaba in ay gacan ka geystaan horumarka ballaaran ee ay wadaan dadka reer Carmo.

Radio Midnimo, Bosaaso
Mudugonline.com