DAGAAL UU KU DHINATAY NIN AY WALAALO YIHIIN MUUSE SUUDI YALAXOW AYAA SHALAY KA DHACAY XAAFADA MADIINA

Radio Midnimo, Boosaaso, 11/06/2003- Afar qof ayaa ugu yaraan ku dhintay dagaal shalay ka dhacay xaafada Madiina ee magaalada Muqdisho.

Wararka Muqdisho naga soo gaaraya waxay sheegayaan in dagaaladaani ay u dhexeeyeen Maleeshiyooyinka kala taageera Muuse Suudi Yalaxow iyo Cumar Maxamed Maxamuud “Cumar Finish” oo inta badan ku dagaalami jiray deegaankaas.

Warku wuxuu intaas ku darayaa in nin ay walaalo yihiin Muuse Suudi Yalaxow oo lagu magacaabo Maxamed Suudi Yalaxow uu dagaalkaas ku dhintay.

Iska horimaadkan ayaa wuxuu sababay in dad badani ay bara kacaan deegaanka xaafada Madiina oo ay ku noolaayeen. Hase yeeshee warku wuxuu intaas ku darayaa in saaka xaalada xaafadaasi ay degan tahay kadib markii dagaalkii shalay uu saameyn weyn ku yeeshay.

Dagaalkan ayaa waxaa uu ku soo beegmay xili uu magaalda ka maqan yahay Hogamiye kooxeedka Cumar Finish, lamina yaqaan sababta dhalisay dagaalkan hase yeeshee, warar ayaa sheegaya in labada Maleeshiyo oo dagaalamay uu dagaalkoodu ka bilaabmay kadib markay isku maan dhaafeen lacago baad ah oo laga qaado gawaarida isbaarooyinka loo dhigto.

Arrintu siday doonto ha ahaatee, waxaa jiray dadaal odayaashu ugu jireen siday u nabadeyn lahaayeen Hogaamiyayaasha Maxamed Dhere iyo Muuse Suudi Yalaxow oo in mudo ah muran ka dhex aloosnaa.

DEGMADA B/WEYNE AYAA WAXAA KU SOO BADANAYA DADKA CIYAALKA XADA.

Radio Midnimo, Boosaaso, 11/06/2003- Sida uu noogu soo waramay weriyaha Idaacada Midnimo ee magaalada Muqdisho wararka ka imaanaya magaalada B/weyne ayaa sheegaya in kooxo hubeysan ay dhibaato ka wadaan deegaankaas.

Warku wuxuu intaas ku darayaa ciidamada Maxkamadaha Islaamiga ahi ay dhowaan ku qabqabteen kooxo hubeysan oo burcad ah gudaha magaalada B/weyne, kuwaasoo dadka dhacayey dilna u geysaneyey.

Warku wuxuu kaloo intaas ku darayaa in magaalada ay si aada ugu soo badanayaan dad la sheegay in ay xadayaan ciyaalka, ilaa iyo iminkana waxaa tirakoob la sameeyey uu sheegayaa in 27 ciyaal ah laga xaday magaalada B/weyne gudaheeda, aana la aqoon meel lala aaday.

Dadka falkan geysanaya ayaa la soo sheegayaa in ay adeegsnayaan dharka Jalaabiibta loo yaqaan, dabadeedna ay markay ciyaalka dafaan hoosta gashanaya.

Arrintan oo iyadu welwel weyn gelisay dadka ku nool deegaankaas ayaa iminka qorsheynaya siday gacan u siin lahaayeen Maxkamadaha Islaamiga ah ee la dagaalamaya kooxaha burcada ah.