MADAXWEYNAHA DGPL IYO WEFTI UU HOGAAMINAYO AYAA MAANTA KA DHOOFAY MAGAALADA GAROOWE.

Weftiga uu madaxweynuhu hogaaminayo ayaa waxaa ka mid ah Gen. Cadde Muuse, weftigii Golaha SRRC iyo xubno kale oo reer Puntland ah.

Warku wuxuu intaas ku darayaa in weftigaani ay u kicitimeen madasha shirka dibu heshiisiinta Soomaalidu uu ka socda oo ku taal duleedka magaalada Nayroobi.

Madaxweynaha ayaa ka soo maqnaa madasha shirka mudo Laba Bilood ku dhow, Madaxweynaha iyo weftiga uu hogaaminayo ayaa mudo toddobaad ah booqasho ku joogay magaalada Gaalkacayo ee Gobolka Mudug, wuxuuna dhowaan kula kulmay meel degmada Goldogob u jirta qiyaastii 18km saraakiil Itoobiyaan iyo Mareykan isugu jirta.

Madaxweynaha ayaa safarkiisani wuxuu ku beegmayaa xili uu gabagabo yahay shirkii dib-u-heshiisiinta ee ka socday dalka Kenya, shalyna war ka soo yeeray Guddoonka shirka ayaa wuxuu muujinayaa in bisha fooda inaga soo haysa si rasmi loogu dhawaaqi doono dowlad Qaran ah oo Soomaaliya ku mideysan tahay.

Hogaamiye kooxeedyo dhowr ah oo iyaguna ka maqnaa shirka ayaa iminka lagu soo waramayaa in ay dib ugu laabteen.

Radio Midnimo, Bosaaso
Mudugonline.com

Radio Midnimo, Boosaaso, Somaliya 10/06/2003- Wararka naga soo gaaraya magaalada Muqdisho ayaa waxay sheegayaan in Dr. C/qaasim Salaad Xasan Hogaamiyaha Maamulka Carta uu maanta hadal ka jeediyey kulan uu la yeeshay Labada Gole ee xukuumadiisa, wuxuuna ku sheegay in ay jiraan ciidamo Itoobiyaan ah iyo kuwo uu ku tilmaamay in ay dalal shisheeye oo uusan magacaabin ay dhaqdhaqaaq ka wadaan gudaha dalka Soomaaliya.

Hadalkan ayuu C/qaasim ka jeediyey qado sharaf uu u sameeyey maanta xubno ka tirsan Golihiisa Baarlamaanka iyo kuwa Xukuumada, wuxuuna carabka ku adkeeyey in ay jiraan ciidmadaasi, balse ma uusan sheegin tirade ciidankaas, goobaha ay soo degeen iyo meelaha ay dhaqdhaqaaqa ka wadaan toona.

Dr. C/qaasim wuxuu intaas ku daray in DKM ay isha ku hayso dhaqdhaqaaqa ciidamadaas oo uu ku tilmaamay in ay yihiin kuwo doonaya in ay mustacmarad cusub geliyaan dalka Soomaaliya.

Madaxweynaha Maamulka Carta Dr. C/qaasim Salaad Xasan oo ka halay arrinta Maamulka isku magacaabay Soomaali lanad ayuu sheegay in aysan marnaba ogolaan doonin in Soomaaliya la kala goos goosto, midnimada Soomaaliyana ay muqadis tahay “Labada Gole haddaanu nahay waxaanu diirada saareynaa midnimada Soomaaliya in ay Muqadis tahay” ayuu yiri C/qaasim Salaad.

Khudbadan uu jeediyey Dr. C/qaasim ayaa ku soo begantay xili uu beri u socdaalayo magaalada Nayroobi ee dalka Kenya, wuxuuna hadalkan jeediyey mar ay soo gaartay casumaad uu ka helay Madaxweynaha dalka Kenya Md. Kibaki, Dr. C/qaasim ayaa sheegay in safarkiisani uu yahay oo keliya mid uu kula kulmayo Madaxweynaha Dalka Kenya Moi Kibaki

Su’aal ay weydiiyeen suxufiyiintu Dr. C/qaasim oo aheyd fikrada uu ka qabo ninkii dhowaan isu magacaabay Madaxweynaha Soomaaliya C/nuur Axmed Darmaan ayuu C/qaasim ka gaabsaday in uu ka jawaabo wuxuuna ku amray suxufiyiinta in ay demiyaan rikooradooda, maadaama uusan su’aashaas jawaab u haynin.

Radio Midnimo, Bosaaso
Mudugonline.com

Radio Midnimo, Boosaaso, 10/06/2003- Shir ballaaran oo ay ka soo qayb galeen masuuliyiin badan oo Maamulka Puntland ka socday, Hay’adaha Caalamiga ah ee qaabilsan arimaha caafimaadka iyo dhaqaatiir ayaa saaka lagu qabtay Isbitaalka Guud ee magaalada Boosaaso.

Shirkaan oo uu guddoominayey Sii hayaha xilka Dowladda Eng. Faarax Maxamuud Yuusuf “Dooxo-joog”, ayaa looga hadlay sidii wax looga qaban lahaa cudurka daacuun Caloolaha oo ka dillaacay magaalada Boosaaso maalimihii la soo dhaafay, sida ay caddeysay baaritaan ay hay’ada WHO sameysay.

Dr. Ciise Dheere oo ah ku simaha Agaasimaha Isbitaalka Boosaaso ayaa sheegay in cudurkani uu ku dhacay 65 qof, Hal qofna uu isbitaalka gudihiisa ku naf waayey, wuxuu kaloo intaas ku daray in Saddexdii maalmood ee la soo dhaafay uusan cudurkan ciddina u dhiman, balse Hay’ada African 70 masuuuliyiin ka socday ayaa sheegay in cudurkan ay magaalada gudaheeda ugu geeriyoodeen 12 qof, waxay intaas ku dareen in 50% cudurkani uu saameyeey dadka degan Boqolka Buush

Wasiirka Madaxtooyada Dr. C/raxmaan Siciid Gacamey “Dhegaweyne” ayaa isaguna sheegay in cudurkani uu jiro loona baahan yahay in wax laga qabto.

Sidoo kale Sii Hayaha Xilka Dowladda ahna Wasiirka Ganacsiga Eng. Faarax Maxamuud “Dooxojoog” ayaa codsaday in si deg deg ah arrintan wax looga qabto.

Waxaa shirkaas ka qayb galay masuuliyiin badan oo ay ka mid yihiin Duqa Degmada Boosaaso Bashiir Siciid Aadan, iyo Wasiir ku xigeenka Was. Warfaafinta C/shakuur Mire Aadan iyo masuuliyiin kale

Ugu danbeyntii waxaa shirkaan lagu magacaabay Guddiyo ka howl geli doona sidii cudurka Daacuun caloolaha ay ula dagaalami lahaayeen, waxaana ka mid ah:

1. Guddiga Daaweynta Bukaanka oo ka kooban Isbitaalka iyo WHO
2. Guddiga Daaweynta Biyaha oo ka kooban: Agaasimaha Cudurada Faafa Dr. Muuse Qaybdiid
3. Isuduwaha Caafimaadka G/Bari, Dr. Cismaan Xuseen
4. Duqa Degmada Boosaaso, Bashiir Siciid Aadan
5. Hay’adda UNICEF, Afrikan 70 iyo Oxfom
   

Guddiga Wacyi gelinta oo isaguna ka kooban

1. Wasaarada Warfaafinta
2. Wasaarada Caafimaadka
3. Idaacadaha Madaxa Banaan
   

Radio Midnimo, Bosaaso
Mudugonline.com