| Radio Midnimo, Boosaaso,
08/06/2003- Maamulka iyo odayaasha degmada Caluula ayaa
manta Idaacda soo gaarsiiyey qoraal ay ku tilmaamayaan in
deegaankaas ay ka jirto abaar xoog leh oo ku baahsan dhamaan
magaalooyinka iyo tuulooyinka degmada.
Qoraalku wuxuu intaas ku darayaa in abaartaani ay dhibaato
ku hayso xoolaha iyo dadkaba, kadib markii ay biyo yareeyeen
ceelashii biyaha laga cabi jiray.
Maamulka iyo Odayaashuba waxay ka codsanayaan Maamulka
iyo hay’adaha caalamiga ah ee fadhigoodu yahay deegaanka
Puntland in ay gacan ka geystaan dhibaatada abaareed ee
jirta.
Dhinaca kalena beer weyn oo mudo Afar Qarni ah ku ooleyd
degmada Baargaal oo ay ku beeran yihiin in ka badan Tobban
kun oo geed Timireed ayaa waxaa soo food saaray dhibaato
weyn, kadib markii ay u geysteen roobab lixaad leh oo
degmadaas ka da’ay burbur ishii biyaha ee beerta waraabin
jirtay.
Beertaan oo la yiraahdo Coomaayo ayaan wax biyo ah helin
sida uu Radio Midnimo u sheegay Guddoomiyaha Degmada Baargaal
C/naasir Siciid Maxamed.
Guddoomiyuhu wuxuu kaloo noo sheegay in haddii ay sidaan
ku sii socoto dhibaatada haysata beertaas ay ciriir gelin
doonto boqolaal qoys oo noloshoodu ay ku xirneyd wax-soo-saarka
beertaas.
Guddoomiayaha Degmada ayaa isaguna wuxuu ka codsanayaa
Dowladda iyo ha’adaha samafalka in ay gurmad deg deg ah
u fidiyaan beertaan taariikhiga ah.
Radio Midnimo, Bosaaso
Mudugonline.com
DHEXDHEXAADIN
AYAA LAGA DHEX WADAA MUUSE SUUDI YALAXOW IYO MAXAMED DHEERE.
Radio Midnimo, Boosaaso, 08/06/2003- Wararka naga soo
gaaraya magaalada Muqdisho ayaa sheegaya in nabadeyn laga
dhex wado labada Hogaamiye Kooxeed ee Muuse Suudi Yalaxow
iyo Maxamed Cumar Xabeed (Maxamed Dheere) oo dhowaan uu
dagaal ku dhex maray deegaanka Raage Ceele.
Nabadeyntaan oo ay wadaan odayaasha iyo waxgaradka beelaha
ay ka soo kala jeedaan ayaa loogu googol xaarayaa in ay
ka dhacdo Hoteel Ramadaan oo ku yaal magaalada Muqdisho.
Dhinaca Muuse Suudi Yalaxow ayaan wax war ahi ka soo
bixin, hase yeeshee Eng. Axmadey Sheekh Xasan oo ka tirsan
garabka Muuse Suudi ayaa sheegay in ay soo dhoweynayaan
wada hadalka nabada.
Waraysi uu siiyey warbaahinta magaalada Muqdisho manta
Maxamed Dheere ayaa waxaa ka muuqday in uusan haba yaraatee
ogoleyn wax nabadeyn ah oo la dhex dhigo isaga iyo Muuse
Suudi Yalaxow.
Maxamed Dheere oo ka hadlay dagaaladii ka dhacay Raage
Ceele ayuu ku tilmaamay weerar gardaro ah oo lala beegsaday
deegaamadiisa, wuxuuna intaas raaciyey in ay jiraan kooxo
doonaya in gobolka She/dhexe ay ka abuuraan nabadgelyo
xumo.
Radio Midnimo, Bosaaso
Mudugonline.com
CISMAAN CAATO AYAA MAANTA
TEGAY MAGAALADA KISMAAYO
Radio Midnimo, Boosaaso, 08/06/2003- Wararka
ka imaanaya magaalada Kismaayo ayaa sheegaya in manta
uu halkaas tegay Hogaamiye Kooxeedka Cismaan Cali Xasan
“Cismaan Caato”.
Cismaan Caato ayaa warku sheegayaa in uu ka soo kicitimay
magaalada Bu’aale, kadib markii uu ka soo qayb galay aaskii
marxuum Allaha u naxariistee Aadan “Gabyow”.
Warku wuxuu intaas ku darayaa in Cismaan Caato uu marti
qaad ka helay Isbahaysiga haysta magaalada Kismaayo ee
la magac baxay “Isbahaysiga Dooxada Jubba”.
Cismaan Caato ayaa waxaa ugu danbeysay magaalada Kismaayo
1992dii. Xiligaas oo ay UNISOM joogtay dalka Soomaaliya.
Cismaan Caato ayaa dhowaan booqasho ku tegay deegaanka
Somaliland.
Dhinaca kale magaalada Beled Weyne ayaa manta waxaa ka
dhacay shir ballaaran oo ay ka soo qayb galeen culimaa’udiinka,
iyo waxgaradka deegaanka.
Kulankan ayaa waxaa looga hadlay soo celinta xasiloonida
deegaankaas iyo Midnimo loo sameynayo beelaha deegaankaas.
Sh. C/raxmaan Ugas Khaliif oo ka mid ahaa hogaamiye dhaqamedyada
ka qayb gelaya kulankaas ayaa sheegay in ay muhiim tahay
maxkamada Islaamiga ah, isla markaasna kooxaha burcada
ah lagula dhaqmo si waafaqsan sharciga Islaamka.
Maxkamada Islaamiga ah ee magaalada B/weyne ayaa howsheedii
wax qabad hoos u dhacaday iyadoo loo aaneynaayo gacan
siin la’aanta bulshada deegaanka kaga timid.
Radio Midnimo, Bosaaso
Mudugonline.com
|
