BAAQ NABADEED

BAAQ NABADEED

Ku: Boqor Cimaan Aw-Maxamuud
Ku: Suldaan Siciid Suldaan Cabdisalaam
Ku: Ugaas Xassan Ugaas Yaasiin
Ku: Dhamaan Isimada Deegaamada Puntland
Ku: Col. Cabdulaahi Yuusuf Axmed (Madaxwaynaha Dowlad Goboleedka Puntland)
Ku: Jen. Adde Musse Xirsi (Hogaamiyaha Golaha Badbaadada Puntland)
Ku: Dhamaan Muwaadiniinta Reer Puntland (Gudaha Dalka)
Ku: Dhamaan Jaaliyadda Reer Puntland (meel kastoo ay joogaanba)
Ku: Dhamaan Hay'adaha Caalamiga ah iyo kuwa samafalka ee ku sugan - Puntland
Ku: Dhamaan Dadka Nabada Jecel (meel kastoo ay joogaanba)

Ujeeddo: Baaq Taageero Nabadeed.

Anagoo ah Jaaliyadda reer-Puntland ee ku sugan Caasimadda Canada ee Ottawa, waxaanu marka ugu horaysa mahad aan lakoobi karin u celinaynaa Ilaaha qaadirka ah ee suurto geliyay heshiis nabadeedka Puntland, marka xiga waxaanu mahad, bogaadin, qadarin iyo abaal aan la soo koobi karin u soo gudbinaynaa labada Isim ee laf dhabarka u ahaa heshiiskan, kuwaas oo si aan daal iyo nasasho lahayn uga soo shaqeeyay siday nabad, is-afgarad iyo muwaafaqaba u dhex dhigi lahaayeen labada garab ee isku hayay deegaanka puntland, labadaas isim waxay muujiyeen samo katalis iyo in ay weli dadka ku dhex hareen Isimo samadoon ah oo soo celin kara sharaftii , qadarintii iyo haybadii Isimada ama Guurtida lagu yiqiin.

Waxaan kale oo halkaan mahad ugu soo gudbinaynaa labada hogaamiye, Col. Cabdullahi iyo Jen. Adde oo iyana muujiyay geesinimmo, isu tanaasul iyo in khilaafka lagu dhameeyo nabad iyo wada hadal, lana joojiyo dhiig danbe oo ku daata puntland.

Waxaan iyana mahad iyo bogaadin u soo gudbinaynaa shacab-waynaha nabadda jecel ee reer-Puntland oo iyaguna gacmo furan iyo qalbi xaaran ku soo dhaweeyay heshiiskan.

Waxaan kale oo dhamaan shacabka reer Puntland ku baraarujinaynaa inay is cafiyaan oo hilmaamaan wixii dhacay, waxaa xusuusin mudan in nabaddu ay markasta ka fiican tahay colaada, heshiiskuna ka fiican yahay khilaafka. (hadiiba dadkii xabada isku haystay garteen micnaha nabada, kuna qanceen heshiiska waxaanu leenahay waxaa haboon inaynu inaguna kula qanacno kuna faraxno samaha iyo heshiiska meeshaas ka dhacay).

Waxaan Ilaahay ka baryaynaa inuu heshiiskaan ka dhigo kii mira dhala, hirgala, laguna baraaro oo beeshu ku nagaato. Aamiin.

Sidoo kale waxaan Ilaahay uga baryaynaa inuu garansiiyo dhamaan Soomalida kale micnaha nabadda , wada noolaanshaha , isku tanaasulka badbaadada dalka, dadka, iyo deegaanka Soomaaliyeed.

Baaqaan waxaa wada jir usoo saaray dhamaan Jaaliyadda reer-Puntland ee Ku dhaqan Ottawa, waxayna u wakiisheen inuu u saxiixo.

Cabdulaahi Axmed Maxamed (koolac)
puntlandforum@hotmail.com

Ujeedo: Heshiis ku dayasho mudan

GOLAHA WADATASHIGA SOOMAALIYEED
G/W/S/015/03 London, 04/06/2003

Mudanayaal, Marwooyin Walaalayaal

Golaha Wadatashiga Soomaaliyeed wuxuu hambalyo u dirayaa dhamaan shacbiga reer Puntland gaar ahaan madaxda maamulka iyo mas'uuliyiintii hirgalisay heshiiskii dhawaan ay kala saxiixdeen Madaxa maalmul gobaleedka Col. Abdullahi Yusuf ahmed iyo madaxa Golaha Badbaadada Puntland General Mohamud Muse Hersi "Adde".

Goluhu wuxuu hambalyo u dirayaa sidoo kale Boqor Osman Aw Mohamud iyo Sultan Saciid Sultan Abdisalaan iyo dhamaan qeybaha bulshada ee ka qeyb qaatay heshiiskaas, Heshiiskan oo koobi ka mid ah maanta soo gaaray
xafiiskeena kuna Taariikheysnaa 17 May 2003 ayna wada saxiixeen Golaha Badbaadada Puntland iyo madaxda Maamul gobaleedka Puntland.

Heshiiskan oo ku dayasho mudan darteed wuxuu Goluha Wadatashiga Soomaaliyeed ugu baaqayaa Soomaalida khilaafku ka dhaxeeyo in ay arrimahooda ku xaliyaan "Wadahal iyo Walaalnimo", taas oo kama dambeystii lagu gaari karo nabad iyo nidaam suura galiya wada shaqeyn.

WADA HADALKU HA GUULEYSTO

Kaaliyaha Xoghayaha arrimaha Dibedda ahna Wakiilka
Golaha Wadatashiga Soomaaliyeed u jooga dalka Talyaaniga
Abdulaziz Ali Ibrahim "Xildhiban"
xildhiban@hotmail.com