|
Radio Midnimo (Boosaaso) 01/06/2003 Kulan ballaaran ayaa
manta wuxuu ka dhcay xarunta Madxtooyada DGPL, kulankaan
wuxuu u dhexeeyey Kooxda Hubkadhigida Soomaaliya ay u
soo xilsaareen Ururka EGAD, waxaana hormuud ahaa oo hogaaminayey
nin lagu magacaabo Gen. Mansooba.
Waxay kulan la yeesheen masuuliyiin badan oo ka tirsan
Maamulka Dowlad Goboleedka Puntland, oo uu horkacayo Madaxweynaha
DGPL C/laahi Yuusuf Axmed.
Kulankan waxaa kaloo ka soo qayb galay xubno ka tirsan
Golaha SRRC oo ay ka mid yihiin Dr. C/laahi Sheekh Ismaaciil,
Dr. Hilowle Iimaan Maxamed, Gen. Maxamed Siciid Xirsi
Moorgan, iyo Maxamad Maxamuud “Gacma-dheere” oo madax
u ah aragtida dallada cusub.
Ugu horeyntii waxaa halkaas ka hadlay C/laahi Yuusuf
oo ku soo dhoweeyey weftigaas deegaamada Puntland, wuxuu
kaloo sheegay in ay puntland diyaar u tahay hanaan kasta
oo lagu sameynayo dowlad Soomaaliyeed oo loo dhan yahay
iyo sidii dadka hubka looga ururin lahaa, wuxuuna soo
dhoweeyey si loo tabab geliyo dowlad Soomaliyeed in wadanka
la keeno ciidamo shisheeye ka hor inta aan la dhisin dowladaas.
Wuxuu kaloo Madaxweynuhu carabka ku dhiftay in diyaar
u yahay haddii loo baahdo in Ciidamada Daraawiishta DGPL
ay ka qayb qaataan hub ka dhigista lagu sameynayo Soomaaliya,
waxa uu yiri “Ma jirto cid iyo dowlad aanu diideyno oo
iyadu ka qayb gelaysa hub ka dhigiista Soomaaliya lagu
sameynayo”
Intaas ka dib waxaa hadalkii lagu soo dhoweeyey Gen.
Mansooba oo isagu madax u ahaa wefdigaan, waxa uu sheegay
in aysan Soomaaliya ka jirin dagaal sokeeye ee ay Soomaaliya
ka jiraan dagaalo qabiil, wuxuu kaloo intaas ku dary in
dadka Soomaaliyeed ay manta doonayaan nabadgelyo meel
kasta oo ay tageena ay taas u muujiyeen.
Jeneraalku wuxuu kaloo intaas raaciyey in wadamo badan
oo dagaalo sokeeye ka socodo ay leeyihiin dowlado sida
Koongo, Ruwaanda, Ivery Kost iwm, balse ay nasiib darro
tahay in aysan Soomaaliya wax dowlad ah aysan laheyn,
hadlakiisii ayuu sii watay oo wuxuu yiri “Bulshada Caalamku
waxba ka hagran mayso wakhtigaan sidii Dowlad Soomaaliya
loogu dhisi lahaa, waad aragtaan AU, EU, Arab Leag iyo
IGAD-ba…” wuxuu kaloo sheegay in ay Puntland u yimaadaan
laba arrimood in ay kormeeraan heshiiskii 27 Oktoobar
ee xabad joojinta iyo in Guddiga hub ka digista ay warbixino
soo ururiyaan.
Ugudanbeyntii wuxuu Jeneraalku mahadnaq u soo jeediyey
Madaxweynaha DGPL iyo Mucaaradka isagoo si weyn ugu farxay
Wasiirada cusub ee mucaaradka oo fadhiyey shirkaas.
Waxaa kaloo isaguna halkaas ka hadlay C/laahi Sheekh
Ismaaciil oo ka tirsan Golaha SRRC, wuxuuna halkaas ka
akhriyey qoraal ay si wada jir ugu saxiixan yihiin C/laahi
Yuusuf Axmed, C./laahi Sheekh Ismaaciil, Maxamed Maxamuud
iyo Gen. Moorgan, qoraalkan ayaa nuxurka uu xambaarsanaa
wuxuu ahaa in hub ka dhigis buuxda Soomaaliya lagu sameeyo,
in wax laga qabto maleeshiyooyinka hubeysan iyo weliba
maleeshiyooyinka gaarka ay u leeyihiin ganacsatada iyo
NGOska.
Gen. Maxamed Siciid Xirsi Moorgan ayaa isagu soo dhooweeyey
in ciidamo la keeno Soomaaliya, balse wuxuu carabka ku
dhiftay in ay jiraan ciidamo xoog ku haysta dhul aysan
laheyn, wuxuuna talo ahaan u soo jeediyey in la xadeeyo
ciidan waliba meesha uu degayo iyo in dib loogu cesho
ciidamadaasi deegaanadii ay ka yimadeen.
Weftiga ayaa manta ka baxaya magaalad Boosaaso, waxayna
ku sii nagaan doonaan magaalada Gaalkacayo ee Gobolka
Mudug.
Sidoo kale waxaa beri la qorsheynayaa in Madaxweynaha
DGPL uu u ambabixi doono magaalada Garoowe, halkaasoo
uu uga sii gudbi doono magaalada Gaalkacayo, dabadeedna
shirka dibu heshiisiinta Soomaalida uga socda dalka Kenya.
Radio Midnimo, Boosaaso
Mudugonline.com
|
