Nayrobi [MOL] 30 July 2003- Madaxweynihii kooxda Carta Cabdqaasim Salad Xasan ayaa maanta isaga baxay shirkii nabadeynta Somalida isla markaana isla maantaba ka dhoofay magaalada Nayrobi isagoo u sii jeeda magaalada Muqdishu. Cabdiqasim oo lagu soo doortay shirkii aan loo dhamayn ee ka dhacay Tuulada Carta ee dalka Jabuuti muddo 3 sanno ka hor ah ayaa habba yaraatee ku guulaysan inuu wax maamul ah ka hirgaliyo magaalada Muqdishu oo u ahayd xurun muddadii uu sheeganayay Madaxweynenimada. Cabdiqasim ayaa sheegay sababta uu shirka uga baxay inay tahay iyadoo aan Somaliland laga soo qeyb galin shirka sidii uu marar badan codsaday, waxuu intaas ku daray in Dawlada Itoobiya doonayso inay Somaliya kala qaybiso oo ay doonayso in Somaliland dawlad ahaan loo aqoonsado. Somaliland ayaa horey u diiday inay ka soo qayb gasho shirka ayna sheegeen inay wada haddal galayaan kaliya markii Dawlad loo dhan yahay laga sameeyo koonfurta Somaliya.

Waxaa wali shirka jooga Xasan Abshir oo ah ra'iisal Wasaarihii Kooxda Carta iyo gudoomiyihii Baarlamaanka Cabdalla Deeroow oo Kooxda Carta bilowgii shirka uga wakiil ahaa inay uga qaybgalaan. Cabdiqasim ayaa sheegay inuu masuuliyiintaas uu kala noqday xilkii uu u soo wakiishay aysana magaciisa hadda waxii ka dambeeya matalin. dhinaca Ra'iisal wasaare Xasan abshir iyo gudoomiyaha Baarlamaanka ayaa iyaguna ku adkaysanaya in sharci ahaan sida uu qorayo axdi qarameedkii ay Carta ku soo samaysteen ay iyagu dawlada uga masuul yihiin wada haddal kasta oo ay la galayaan kooxaha siyaasada ay isaga soo horjeedaan. arintaan ayaana ka dhigtay kooxda Carta inay imminka u kala qeybsameen laba kooxood oo iska soo horjeeda oo koox walba sheeganayso inay iyagu matalaan kooxda Carta.

Wali wax wara kama soo bixin Dawladaha safka hore ee IGAD oo iyagu ka dambeeyay abaabulka shirkaan oo hadda socday in ka badan 9 billood. waxaa jira qodob kooxaha sayaasadu ku heshiiyeen oo dhigayay in waxii ka dambeeyay heshiiskii bishaan 5-teedi la gaaray caddii shirka ka hortimaada loo aqoonsan doono dagaal ooge lagana codsaday in qaramada midoobay ay wax ka qabtaan.

Mudugonline.com