Garoowe [MOL] 24 July 2003- Waxaa saaka subaxnimadii ka soo degay garoonka Conoco wafti uu hogaaminayo Madaxweynaha Dawlad Goboleedka Puntland Cabdulahi Yusuf Axmed oo ka soo duulay madasha shirka dib u heshiisiinta Somalida ee Mbagathi. Socdaalka Madaxweynaha oo ahaa mid deg deg ah ayna ku wehliyeen socdaalkiisa gudoomiye ku xigeenka 1-aad ee baarlamaanka, gudoomiye ku xigeenka labaad iyo madax kale oo ka tirsan goleyaasha Dawlada. socdaalka Madaxweynaha ayaa la xiriira xalinta khilaaf u dhaxeeya Maamulkiisa oo maalmihii la soo dhaafay isku mari waayay go'aan ka soo baxay xafiiska Madaxweyne ku xigeenka Puntland Maxamed Cabdi Xaashi oo madaxweyne ku xigeenku isku badalay laba wasiir oo ka mida Dawlada, arintaasina dhalisay muran iyo amar diido ka yimid mid ka mida wasiirada la badalay.

Warar aanu ka helay Puntland ayaa sheegaya in Wasiirkii Maaliyada ee jagada laga qaaday Cabdiraxmaan Faroole uu galay Hawl gal culus iyo dadaal uu ku soo jiidanayo dad badan si mar loogu soo celiyo jagadiisi, wasiirka ayaa si bareer ah uga dhaga-adaygay inuu qaato amarkii madaxweyne ku xigeenka. Isla habeenkii go'aanka Madaxweyne ku xigeenku soo baxay waxaa dablay aan la aqoon haybtooda tacshiirad ku rideen guriga Madaxweyne ku xigeenka, Cabdiraxmaan Faroole ayaa sheegay inuusan wax lug ah ku lahayn fowdadaas waxaase jira tuhun in falkaas ay geysteen taageerayaashiisa. arintaas ayaa loo fasirtay haddii jagada laga qaado Cabdiraxmaan Faroole ay arintaasi keeni karto qas iyo iyadoo loo yeelay arinta waji qabiil.

Dhinaca kale Madaxweyne ku xigeenka oo lagu yaqaan daacadnimo iyo alle ka cabsi magac weyna ku leh bulshada Puntland ayaa dhib ku noqotay inuu la shaqeeyo wasiiro iyo saraakiisha Dawlada oo intooda badan u soo shaqo tageen xaraysiga xoolaha Dawlada si sharci daro ah. Waxaa Garoowe soo gaaray madaxdhaqameedyo ka yimid Gobolada Sool iyo Sanaag kuwaas oo la sheegay inay u guurgalayaan arintaan iyo meesha ay ku dhamaato.

Madaxweynaha Puntland Cabdulahi Yusuf ayaa intii uusan Nayrobi ka soo duulin sheegay in go'aankii madaxweyne ku xigeenku uusan waafaqsanayn sharciga Puntland, isagoo intaas ku daray inaan madaxweyne ku xigeenku kala tashan isku badalka wasiirada. arintu si kastaba ha ahaatee dad badan ayaa sugaya sida ay suurto gal u noqonayso inay wada shaqeeyaan Cabdiraxmaan Faroole iyo Madaxweyne ku xigeenku marba haddii aysan jirin wax qadarin iyo kala dambeyn ah oo uu tusay Cabdraxmaan Faroole madaxweyne ku xigeenka xitaa haddii Cabdiraxmaan Faroole loo daayo jagadiisa, arintaas oo ku qasbi karta in madaxweynaha Puntland jagada ka eryo labada wasiir ee isku badalkoodu murankaan dhaliyay si loo soo celiyo kalsoonidii iyo kala dambayntii Dawlada.
Mudugonline.com