Wasiirka Maaliyada C/raxmaan Maxamed Faroole ayuu u wareejiyey Wasaarada Caafimaadka, iyadoo uu Wasiirkii Caafimaadka Siciid Maxamud Caduurna u magacaabay Wasiirka Maaliyada.

Lama yaqaan sababta dhalisay isku bedelka Labada Wasiir iyadoo ay wakhtigaan Golaha Xeer Dejintu ay u fadhiyaan siday u ansixin lahaayeen Golaha Wasiirada oo wakhti badan dhaafay xiligii ay Goluhu ansixin lahaayeen Wasiirada Dowladda.

Tallaabadan uu qaaday Ku Xigeenka Madaxweynaha ayaa dad badani ka caraysiisay, wararka ka imaanaya magaalada Garoowe ayaa sheegaya in arrintani ay salka ku hayso arrimo la xiriira dhinaca dhaqaalaha, iyadoo toddobaadyadii la soo dhaafay ay golaha Xukuumadu si weyn uga shirayeen dhaqaale xumo soo food saartay Maamulka DGPL, iyo weliba dhaliil loo soo jeediyey ciidamada Booliska ee ka howl gala gobolada marka laga reebo G/bari.

Warar laga helayo ilo xogogaal ah ayaa sheegaya in ragga ka ganacsada lagaha la soo been abuuray ay dadaal ugu jiraan siday gobolka u keeni lahaayeen Boqolaal Bilyan oo Shilinka Somaliga ah oo la soo been daabacay, qorshahan oo la filayey in uu hirgalo 18 bishii Juun ayaa dib u dhacay.

Waxaa jira heshiis qarsoon oo Maamulku la galay nimankaa, marka ay lacagaha soo daabacaan in ay ku soo wareejiyaan gacanta maamulka, dabadeedna uu u baxo si qorshesan oo saami wadaag ah.

Ragga ugu cad cad ee lacagahan ka faashleeya ayaa wararku sheegayaan in ay ka biyo diidsan yihiin Wasiirka Maaliyada ee xiligaan C/raxmaan Maxamed Faroole, tanoo keentay in ay dib u dhigaan in ay gobolka keenaan lacagahaas.

Warar aanu ka helnay ilo lagu kaloon yahay ayaa sheegaya in toddobaadyadii la soo dhaafay si weyn loogu dheg taagayey magacaabista wasiirka cusub ee Wasaaradda Maaliyadda oo ah dalabka nimanka lagacaha soo daabaca oo iyagu go’aankooda ku adkaystay in Siciid Caduur Wasiirka Caafimaadka oo horay u ahaan jiray wasiirkii Maaliyada aqoon iyo xiriir fiicana la lahaa Lacag soo sameeyayaasha loo magacaabo xilkaas, markaasna ay keeni doonaan lagacaha oo iyagu diyaar ah.

Wasiirka Caafimaadka Siciid Caduur ayaa ka gaabsaday in uu fuliyo dhaartii la mariyey Golaha Wasiirada, mudo bilo ahna aan wax shaqo ah qaban, hase yeeshee mar danbe ku soo laabtay madasha golaha Wasiirada.

Arrintu siday doonto ha ahaatee, Tallaabada isku bedelka Labada Wasiir ayaa dhalisay shaki iyo muran ka dhex aloosmay Maamulka dhexdiisa, taasoo ay qaar qabaan in aysan waafaqsaneyn sharciga Puntland u degsan, kaasoo u ogolanaya Madaxweynaha oo keliya in uu isagu waxna magacaabi karo waxna ruqseyn karo, balse uu la talin ku leeyahay Madaxweyne ku xigeenku ee uusan ninka xilkiisa ka qaadi Karin, qaar kale ayaa tilmaamaya in xiligaan oo uu socdo shirka dib-u-heshiisiinta ee rajada laga qabo in dowlad Soomaaliyeed lagu soo dhiso aysan habooneyn in wax la gacmo gacmeeyo, waxaa kaloo badan rag maamulka ka tirsan oo tallaabadaan u arka abuuris qalalaase siyaasadeed oo lagu duminayo maamulka DGPL, xataa Golaha Xeer Dejinta ayaa lagu soo waramayaa in ay arrintaan ku kala jabeen.

Wararkii u danbeeyey ee Garoowe naga soo gaaraya ayaa sheegaya in Madaxweynaha Puntland C/laahi Yuusuf Axmed oo ku sugan madasha shirka dib-u-heshiisiinta Mpegati ee dalka Kenya uu xiriir la soo sameeyey Ku-xigeenka Madaxweynaha Maxamed Cabdi xaashi uuna u sheegay in uu ka noqdo qoraalkaas.

Warku wuxuu kaloo intaas ku darayaa in C/raxmaan Faroole uu weli si caada ah u wato shaqadiisa, ayna soo gaartay Puntland warqad qoraal ah oo ka timid Madaxweynaha DGPL C/laahi Yuusuf Axmed, warqadaas oo uu ku caddeynayo in aan waxna la kala bedeli karin, wuxuuna xusay in Madaxweyne ku xigeenku uusan arrintaas kala tashan, sharcina aysan aheyn.

Radio Midnimo, Bosaaso
Mudugonline.com