|
Garoowe [Radio Midnimo] 12 July
2003- Golaha xukuumada ayaa maanta barnaamijkoodii
waxay horgeeyeen Golaha xeer dejinta oo mudo kalfadhigoodu
uu ka socday magaalada Garoowe.
Uguhoreyn, waxaa halkaas ka hadlay Guddoomiyaha Golaha
Xeer Dejinta Yuusuf X. Siciid, wuxuuna sheegay in kalfadhigoodu
uu bilowday 19kii Juun ilaa iyo iminkana uu socdo, wuxuu
kaloo intaas ku daray in dowladu ay ka shaqeynayso sidii
wax loo qaban lahaa.
Yuusuf X. Siciid wuxuu carabka ku dhiftay in ay wada
shaqeeyaan Dowladda, Baarlamaanka iyo Golaha Garsoorkaba,
khilaafkana la yareeyo oo Saddexda Gole gacmaha is qabsadaan,
wuxuu kaloo intaas ku daray in barnaamijku uu noqon lahaa
mid fulla oo fiyoobaada lana yareeyo ishaysiga ka dhexeeya
Golayaasha Puntland, lagana wada shaqeeyo midnimada Puntland.
Guddoomiyuhu wuxuu kaloo sheegay in ay jiraan khalkhal
dibadda ugaga socda Puntland, loona baahan yahay in looga
gudbo midnimada Puntland, laakiin shaaca kama uu qaadin
Guddoomiyuhu cidda khalkahlka dibadda uga wada Gudaha
Puntland, hase yeeshee wuxuu sheegay in loog gudbi karo
adkeynta midnimada. isdhaliilka iyo dhaliisha, isagoo
intaas ku daray in isxamashada iyo ishagardaameyntu in
ay lumineyso danta ummadda.
Guddoomiyhu wuxuu kaloo ka sarqamiyey in dhaqaalaha Puntland
uu xiligaan xun yahay, hase yeeshee wuxuu intaas ku daray
in aynu leenahay dhaqaale aynu ka faa’iideysan karno,
isagoo si gaar ah carabka ugu dhiftay in loo baahan yahay
dadka howsha yaqaana in ay wax ka qabtaan, wuxuuna ammaan
u soo jeediyey in guul lagu gaari karo in dadku ay wada
shaqeeyaan.
Intaaas ka dib, waxaa hadalkii la wareegay Ku xigeenka
Madaxweyne ku xigeenka Puntland Maxamed Cabdi Xaashi,
wuxuuna sheegay in Golaha Xeerdejintu ay ansixiyaan kordhinta
dowladda, wuxuuna si gaar ah uga dardaarmay Wasiirada
iyo ku xigeenada ku yimid dib-u-heshiisiinta in aan la
qabsan, wuxuuna intaas ku daray in loo baahan yahay in
si wadajir ah wax loo qabto “Barnaamijka dowladdu idiin
soo gudbisay ma aha mid boqolkiiba boqol dhamaysiran,
adduunkaan wax aan ceeb laheyn waa Ilaah oo keliya, sidaas
darted wixii Golaha Xeerdejintu ay ku kordhin karaan ay
ku kordhiyaan loona saxo” ayaa ka mid ahaa hadaladii Ku
xigeenka Madaxweynaha uu saaka ka jeediyey Golaha Xeerdejinta
hortiisa.
Intaas kadib Wasiiru dowlaha Madaxtooyada ayaa ayaa wuxuu
akhriyey liiska Golaha Wasiirada iyo barnaamijka dowladda,
waxaan soo xaadirin Lix Wasiir oo ka mid aha kuwa la doonayey
in Golaha Xeerdejintu ay ansixiyaan kuwaasoo ay Saddex
ka midi ay fasax ku maqnaayeen, kuwaasoo kala ah Wasiirka
Awqaafta iyo Arrimaha Diinta Axmed Cawad Casharo, Wasiirka
Dhaqan Celinta iyo Dib-u-heshiisiinta Dr. Cabdi Cabdulle
Jini-boqor, iyo Wasiirka Wasaarada Shaqada iyo Isboortiga
C/nuur Cilmi Biindhow.
Waxaana iska maqnaa Wasiirka Warfaafinta Diiriye Jaamac
Geelle, Wasiirka Dekeddaha iyo Kalluumesiga C/risaaq Siciid
“Shaahdoon” iyo Wasiirka Xiriirka Caalamiga Xasan Maxamed
Jaamac “Daafeedow”.
Madaxweyne Ku xigeenka DGPL ayaa isagu sheegay in Wasiirka
Warfaafintu uu qaatay fasax 20 casho keliya ah mudo bilo
ahna uu maqan yahay, iyo Wasiirka Kalluumeysiga oo uu
sheegay in uu iskiis isaga maqan yahay.
Arrintu siday doonto ha ahaatee, kalfadhigaan Golaha
Xeer dejinta la soo hordhigay barnaamijka iyo xukuumada
Puntland ayaa ah mid ahmiyad gaar ah leh.
Beryahaan danbana waxaa soo shaac baxayey khilaaf siyaasadeed
oo ay si ba’an isugu hayaan Golaha Xukuumada, kaasoo la
sheegayo in ay ka dhasheen arrimo siyaasadeed iyo kuwo
dhaqaale, iyadoo dhinaca kalena Golaha Xeer dejintu mudo
u dhabar adeygayeen codsigoodii ahaa in golaha xukuumada
la hor keeno golaha xeer dejinta.
Radio Midnimo
radiomidnimo@hotmail.com
Mudugonline.com
|
