Gaalkacyo [MOL] 08 July 2003- Wararka Saaka naga soo gaaraya magaalada Gaalkacyo ayaa sheegaya in dhalinyaro beeleed hubaysan oo isugu jira beelaha degga waqooyiga Magaalada Gaalkacyo ay xoog ku galeen Xeraddii Daraawiishta oo dhawaan Dawlad Goboleedka Puntland xaraashtay dhul ka mid ahaa xeradaas inta hartayna la rabay in la xaraasho.

Wararka ka imaanaya Xeradda daraawiishta dhexdeeda ayaa sheegaya in dhalintaas gashay xerada qaarkood ay dhisid ku bilaabeen dhulkii ay ku habsadeen,dhalintaas oo ku hubaysan qoryaha fudud ee gacanta ayaa waxaa laga maqlayay banaanka xerada rasaas aan la ogayn cidda ridaysay iyo cidda lagu ridayay toona. Waa markii 3-aad oo dad hubaysan ku habsadaan isna hortaagaan xaraashka xerada Daraawiishta.

Waxaa bilowgii sannadkaan xaraash lagu gaday qeyb ka mida dhulkaas intii ugu qaalisanayd ee xigtay wadadda laamiga ah. dhulka intii hartay ayaan la garanayn waxa loo gadi waayay iyadoo ay suuragal tahay in wax gataba la waayay.

Gudoomiyaha Gobolka Mudug Cabdirashiid Cali Xaashi ayaa maanta hanjabaad iyo digniin u soo jeediyay dadkaas ku habsaday Xerada Daraawiishta. Gudoomiyaha ayaa sheegay in dhisme kasta oo sharci daro lagu dhiso ay Dawladu balan ku qaadayso in la jabin doono sharcigana lala tiigsan doono dadkaas sida sharci darada ah dhulkaas ugu habsaday.

Marar badan ayaa looga digay DGPL qatarta ka imaan karta dhulkaas haddii la xaraasho iyo waliba inaysan munaasib ahayn in dhulkaas la xaraasho iyadoo magaalada Gaalkacyo waayahanba ka jirtay dhul isku qabsi taas oo ay ka timid qasaarooyin badan oo dad badan ku nafwaayeen. waxaa iyaduna meesha ku jirtay iyadoo dadka magaaladu inta badan aysan lahayn awood dhaqaale oo ay kaga qayb galaan xaraashkaas iyagoo haddana u arka in dhulkaas uu ka dhexeeyo ummada oo dhan.

Weriye C/risaaq (Sheekhaduun)
Mudugonline.com

Gaalkacyo [MOL] 08 July 2003- Wararka ka imaanaya Tuulada Afbarwaaqo oo ka mida Tuulooyinka degmada Jariiban ugana toosan dhinaca Bari magaalada Gaalkacyo ayaa la sheegaya in beelaha deegaankaas oo dhawr jeer oo hore dagaal ku dhex maray deegaanka ay ku jiraan hub iyo ciidan aruursi Maanta, iyadoo la filayo in maanta dagaal uu dhex mari doono beelahaas. dagaalkaas maanta laga baqayo inuu ka dhaco deegaanka afbarwaaqo ayaa waxuu u dhaxeeyaa beesha Dir iyo beesha reer Nimcaale oo ka mida beelaha Sacad ee Habargidir.

Waxaa wali labada beelood ku dhex jira odayaasha deegaanka oo isku dayaya inay baajiyaan dagaalka maanta. Waxaa deegaano u dhaw Afbarwaaqo laga maqlayay Maanta sharqanta rasaasta taas oo loo malaynayo inuu dagaalkii biloowday.

Dagaalka Labada beelood oo intii mudo ah soo jiitamayay, iyadoo heshiisyo badan la isugu keenay odayaasha labada beelood. wali lama oga waxa uu ka dhashay abaabulka dagaalkan cusub oo dhibaato u keeni doona dadka deegaanka oo dhan.

Weriye C/risaaq (Sheekhaduun)
Mudugonline.com

Mbagathi [MOL] 08 July 2003- Ra'iisal Wasaaraha DKMG ah ee Carta Xasan Abshir Farah iyo Gudoomiyaha Barlamaaka KMG-ka Carta Cabdalla Deerow Isaaq ayaa shir wada jira ku qabtay madasha shirka dib u heshiisiinta ee Mbagathi, labada masuul ayaa sheegay inay iyagu u saxiixeen heshiiskaas DKMG ah si sharci ahna awal loogu xilsaaray inay wada hadalaas uga qayb galaan dawladii Carta. labada masuul ayaa sheegay inay meesha ka saarayaan warar ku tiri ku teen ah oo ka soo yeeray madaxweynaha DKMG ah ee Carta Cabdiqasim Salad Xasan oo uu ku sheegay inaysan labadaas masuul matelin DKMG ah.

Labada nin oo ay dhinac fadhiyeen 111 xubnood oo isugu jira wasiiro iyo xubno baarlamaan ayaa waxay haystaan sida muuqata aqlibiyada Dawlada KMG ah ee Carta. waxaa kaloo goobtaas joogay Maxamed Qanyare Afrah oo ah afhayeenka Kooxda G8 oo iyagu ay inta badan ay isku aragti ahaayeen kooxda Carta. Qanyare ayaa sheegay in dad damac gooniya lihi ay diidan yihiin heshiiskii taariikhiga ahaa ee ay asbuucaan gaareen kooxaha siyaasadu.

Cabdiqasim Salad ayaa hadda kali ku noqday aragtidiisi iyadoo haatan ay ka tageen dhamaan kooxihii ay xulafadda ahaan jireen iyo inta badan xubnihii Dawladiisa oo ku jiro ra'iisal wasaarihiisi.

Wali lama oga Cabdiqaasim inuu sii joogi doono shirka iyo inuu Muqdishu dib ugu noqon doono.

Mudugonline.com