Bosaaso [MOL] 01 July 2003-Waxaa maanta si wayn looga xusay degaanada Puntland xuskii 1-da Lulyo oo ah maalin taariikh ku leh xornimda soomaaliya, ahna maalintii Koonfurta Somaliya Xornimada qaadatay lana midowday Waqooyiyaga Somaliya sannadkii 1960 oo haatan laga joogo mudo dhan 43 sannadood.

Waxaa lagu soo bandhigay goobtaasi lagu hayey xaflada xuska maalinta xornimadda ciyaaraha hidaha iyo dhaqanka iyo heeso wadani ah oo ay ka qaadayeen kooxo fanaaniin ah. Goobta xafladaasi lagu qabtay ayaa ahayd mid aad loo agaasimay. waxaa ka soo qayb galay masuuliyiin ka tirsan mamaulka Puntland, Dadweyne aad u tiro badan waxaana kaloo gobtaasi salaan ku bixiyey cutubyo ka tirsan ciidanka qalabka sida ee puntland ee Daraawiishta oo iyana loo tumayey muusigada banbowga.

Sidoo kale maanta waxaa iyana xaflad sidaas oo kale ah luga dhigay degmada Carmo oo ay ka soo qayb galeen masuuliyinta degmada iyo iyadoo ay halkaasna ka ciyaareen kooxo fanaanin ah oo qaadayay heeso soo jiitay dadkii ka qayb galay xafladaasi. Waxaana qaban qaabiyey xafladaasi urur dhalinyaro ah oo lagu magacaabo PYSA oo ah urur NGO ah oo ka hawlgala degaankaasi, sidoo kale magaaloyinka Garoowe iyo gaalkacyo ayaa xus kaa la mid ah laga dhigay maanta oo lagu maamuusayay xaflada 1-da Luulyo ee xornimadda Koonfurta Somaliya iyo midowgii koonfurta iyo waqooyiga Somaliya..

Weriye C/risaaq (Sheekhaduun)
Mudugonline.com

Xaflada ka dhacday Mbagathi oo u muuqatay mid iyadu ka agaasin saraysay mida lagu qabtay gudaha Nairobi ayaa waxaa ka qaybgalay dadweyne buuxiyay xerada shirku ka socdo.

Inta badan madaxda Somalida ee joogta shirka Kenya oo xafalada ka qaybgalay ayaa ka waramay heerarkii halganka gobonima doonka Somalida.

Gen. Naaji abaanduulaha ciidamada DKMG ah / Kooxda Carta oo xafladaan ka ahaa xiriiriyaha ayaa hadalo kaftan iyo taariikh ah ka jeediyay goobta, Cabdalle Dooreew Isaaq ayaa ku dheeraaday heerarkii ay soo martay xoriyada Somalidu, Cabdicasiis Shiikh Yusuf, Salaad Dheere iyo Xuseen Caydiid ayaa iyaguna hadalkoodu u badnaa mid ay kaga sheekaynayeen halkankii taariikhda gobnimada Somaliya, waxaa kaloo hadlay inta badan madaxda Somalida ee shirka ka qaybgalaysa.

Waxay ahayd midaan dadku filayn markii Mawliid Macaani oo ka mid ah kooxda G8 uu ka istaagay xafladaas isagoo dhaar ku celcelinaya uu ku dhaaranayo in uu isagu qof ahaan daacad ka yahay in Somaliya shirkaan dawlad loogu dhiso.

Cabdullaahi Yusuf oo isaga la siiyay hadalka xiritaanka ayaa markuu u istaagay hadalka sheegay inuusan caawa ka hadlayn siyaasad, wuxuu ku bilaabay inuu dadka waydiiyo bal in qof walbaa dib u xusuusto halkii uu joogay kowdii Luuliyo 1960, Caawa oo kale, wuxuu daba dhigay inuu isagu xiligaas joogay Osteriya iyo Talyaaniga meel u dhaxaysa isagoo ahaa kabtan ciidanka Somalida ah, uuna xusuusto qiimaha maailkaas, wuxuu dadka waydiistay inay dib u xusuustaan qiimihii kowdii Luuliyo 19960-kii.

Xafladaan oo calanka Somalida la saaray ayaa ku dhamaatay jawi dadkii ka qaybgalay raali galisay.

Wariyahayaga oo ayan u suuroobin inuu labada xafaladoodba ka wada qaybgalo xafaladaha oo isku mar socday awgeed ayaa markii xafladaasi dhamaatay la xiriiray wargal joogay xaflada kale wargalka ayaa u sheegay in xaflada kale oo ay ka qaybgaleen tiro yar oo dad ahi marka loo fiiriyo tan lagu qabtay Mbagathi halka lagu qabtay oo ahayd Hotel kooban awgeed.

Xafladaas waxaa joogay xubno ay ka mid ahaayeen Cabadiqaasim Salaad Xasan, Cusmaan Caato, Xasan Abshir iyo Maxmed Qanyare Afrax iyo xubno kale.

AllPuntland