CALANKAYAGII & SHARAFKAYAGII HALKEY KU DAMBEEYEEN.

MUNAASABADLE, TIR.38aad ,Kismaayo, Axad , 19 Janaayo, 2003 ,waxaa soo saara " Waamo Information Centre" Tafatire Cali Saciid Max'ed.Tel:254722723344 ,Email:assiyaasa_newspaper@yahoo.com

---

intey khamri ka dhergeen ayey waxey jejebiyeen daaqadihii muraayadaha ahaa ee hodheelka , maamulkii hodheelka ayaa u dacwooday dowladda ,wuxuuna ka codsadey in qaxootiga laga raro , dabadeed dowladda Eretareeya waxey dejisay xero ciidan oo ay ciidankii keligii taliye Mangisto ka carareen ,

waxaana halkaa ugu diyaarsanaa sariiro ay u dhan yihiin qalabkii lagu hurdi lahaa iyo cunno 3da gelin ah .

Inkastoo xerada ay magaalada ka fogeed haddana waxaa jirey bas taga xerada agteeda ,waxey dowladda u qeybisay qoxootiga Soomaalida waraaqo af Amxaari ku qoran oo ay ku taal dhammaan basaska magaalada waxaa la farayaa iney ku qaadaan lacag la’aan qoxootiga Soomaalida meel alla meeshey rabaanna geeyaan .

Abaalka ceynkaas maxey qoxootiga Soomaalida kaga jawaabeen ?

Waxay sameeyeen arin qofkastoo damiir danqada leh uu ka yaqyaqsoodo ( ka laba laboodo ) markey waraaqahaasi heleen waxey la aadeen baarar khamriga laga cabo iyo guryaha gaabsiga ( galmada xaaraamta ah ) lagu sameeyo , markey khamri cabbaan ama ay dhillo u galmoodaan oo la weydiiyo lacagtii wax lagu kala iibsaday waxey dhiibaan waraaqihii basaska in lagu raaco loogu talo galay .

Xaalku markuu meeshaasi fool xun marayo ayaa baararkii khamriga iyo dhillooyinkii ay ka aruuriyeen waraaqihii qoxootiga ay siteen , dabadeen waxey u geeyeen dowladda waxeyna codsadeen iney dowladda bixiso kharashyada ay qoxootiga qabaan , dowladda Eretareeya wey bixisay kharashyadii , dabadeed waxey u sheegtay qoxootiga ineyan siini doonin fursad kale u saamaxda iney lacag la’aan ku raacaan baabuurta magaalada mar haddii ay siisay cunno iyo meel la seexdo oo nadiif ah .

Intaa ka dib maxaa dhacay kadaroo dibi dhal : Soomaalida Qoxootiga aheyd waxey ka qeyb

galeen 23kii May 1993kii dabaal deggii xurriyadda Eretareeya , oo waxey tosheen calankii Soomaalida & kii Eretareeya oo ay munaasibaddaasi kaga qeyb galeen , maxaa ka dambeeyey , dhowr casho ka dib waxaa dhacday nin oday ah oo ka mid ahaa qoxootiga - oo beri samaadkii ahaan jirey gashaale dhexe turabitaariyada oo ka shaqeeya dekadda Berbara - ayaa Calankii Soomaalida intuu soo duuduubay jeebka ku soo ritay dabadeed u soo dhaadhacay magaalada dabadeed wuxuu galay baar khamri , wuxuu dalbaday bakeeri khamri , markuu dhameystay ayaa wuxuu dareemay ineyan ku filleyn oo ay ku bar go’day , dabadeed wuxuu istaagay baarka khamriga hortii wuxuuna la soo baxay calankii Soomaalida ee jeebka ugu jiray wuxuuna yiri waxaan ahay qaxooti Soomaali ah waxaana markhaati ii ah calkeyga , waxaa igu bar go’ay khamrigii ee khamri ha la ii iibsho.

Intaa markey dhacday oo dadweynihii Eretareeya oo macaansanaya xurriyadda ay markaa qaateen , iyagoo dareensan dhibaatadii iyo rafaadkii ay u soo mareen xurriyadda iyo calanka , ayaa hal mar illimeeyey iyagoo oranaya nimankii 1977kii jebiyey ciidamadii Itoobiya ee loo yaqaanay Libaaxyadii Afrika maanta Calankoodii ma waxaa u dambeysay in koob khamri ah la siisto .

Dhacdadani xaqiiqda ah ee aan la kulmay waxaan u soo qaatay iney ka soo qeybgalayaasha shirka Eldoret dhammaantood ay mar kale ila ooyaan , waxna ka qabtaan xal u helidda Mushkilada Soomaaliya sida ugu dhakhsaha badan hadduu Alle idmo .

w/d :Xuseen Cali Cilmi Eldoret-Kenya
Assiyaasa News paper

---

Eldoret: Cabdullaahi Yusuf 'Soomaaliya lama qeybin karo'

Waxa maagaalada Eldoret ee dalka Kenya Arbacadii dib looga furay shirkii kooxaha Soomaalida oo in muddo ahba ay dhibaato xagga maamulka iyo is-fahamka Soomaalida dhexdeeda ah ay haysatay.

Waxaa haddaba Arabacadii hotelka Sirikwa ee magaaladaasi Eldoret lagu qabtay xaflad ballaaran oo uu markii ugu horeysay ka qeybgalay Wasiirka Arrimaha Dibadda ee dowladda cusub ee Kenya, Mr Kalonzo Musyoka iyo masuuliyiin kale oo fara badan.

Waxay ahayd maalin mar labaad dib loo soo nooleeyey rajadii Soomaalida ee shirka Eldoret, ka ddib markii, mar qura ay beesha caalamka gaar ahaanna inta daneysa arrimaha Soomaaliya mar kale isugu wada yimaadeen madasha shirka.

Waxaa si aad ah loo xiisaynayey imaanshiyaha shirka ee wasiirka cusub ee arrimaha dibadda ee dalka Kenya, Mr Kalonzo Musyoka, ergada Midowga Yurub, kuwa Mareykana, Masaarida iyo Jaamacadda Carabta, kuwa urur goboleedka IGAD iyo Qaramada Midoobay, waxaana xafladdaasi khudbab qiiro leh ku furay Mr
Kalonzo Musyoka oo si aad ah u muujiyey dareenka dowladdiisa cusub ee shirka kooxaha Soomaalida.

Mr Musyoka waxa uu yiri "Dowladdayda cusubi waxay u heellan tahay nidaamka shirkan, waxaanan sii wadi
doonnaa in aan taageero buuxda iyo talooyinba siinno dhexdhexaadiyeyaasha iyo dhammaan dhinacyada Soomaaliyeed annagoo si toos ahna ugu lug yeelan doonna shirkan gacan ka geysashada dhismaha dowlad qaran oo Soomaaliyeed."

Mr Musyoka waxa uu intaas ku daray "Annagoo taasi dabajoognana si aanu u lumin habsami u socodkii shirka waxaa la goostay in uu shirku sii socdo isagoo aanan la joojin iyadoo weliba la eegayo waqtiga, dhaqaalaha iyo dadaalka jira. Sidaasi darteedna waxaa lagu heshiiyey in la xoojiyo dadaalka jira nolol cusubna loo geliyo guddiga farsamada ee shirka, sidaasi darteedna madaxweyne Kibaki waxa uu magacaabay ergay cusub."

Ergaygaasi cusubi oo ah siyaasiga caanka ah, Mr Bethwel Kiplagat ayaa isagana halkaasi ka hadlay isagoo sheegay in uu Soomaaliya weligiis ku dhowaa uuna horseed ka ahaa dadaal labada dal la isugu soo dhoweynayey bartamihii toddobaatamaadkii. Mr Kiplagat waxa uu xusay in gobolkan, Geeska
Afrika, ay weligiis dhibaato ka taagnayd.

Kiplagat waxa uu yiri "Gobolkan weligiis ma arag nabad, xitaa hal maalinna ha ahaatee. Bal fiiri dhibaatada Geeska Afrika, ka soo billow Soomaaliya, bal eeg inta badan Kenya, inta badan Ethiopia, inta badan Djibouti, inta badan Sudaan, inta badan Uganda, dhammaanteen dhibaato ayaa na soo martay ilaa kontonkii sano ee la soo dhaafay. Hadda ma u guntan karnaa innagoo ka billaabayna shirkan oo midkani noqdo billowgii dhammaadka ee dagaallada."

Shirkan maanta ka dhacay hotelka Sirikwa ee Eldoret waxaa sidoo kale joogay boqollaal Soomaaliyeed oo runtii muujinayey sida ay u jeclaan lahaayeen in shirku guulaysto. Masuuliyiintii Soomaaliyeed ee halkaasi ka hadashay waxa ka mid ahaa Colonel Cabdullaahi Yuusuf Axmed iyo Xasan Abshir Faarax oo ku hadlay magaca hoggaamiyeyaasha Somaaliyeed iyadoo Caasha Cilmina ay ku hadashay magaca ururrada bulshada raydka ah.

Colonel Cabdullaahi Yusuf Axmed waxa uu u sheegay masuuliyiinta hoggaaminaysa shirka in ay hubiyaan cidda ummadda u wakiilka ah si looga samata baxo dhibaato is qab-qabsi, laakiin waxa uu si weyn ugu dheeraaday sida loogu baahan yahay in dowlad Soomaaliyeed loo helo taas oo ay ka wada qeybgalaan dhammaan maamullada jira sida maamulka la magac baxay Soomaaliland, waxana uu muujiyey dareen aanan hore looga dhawaajinin.

Shirkan Soomaalida dib ugaga furmay Ekdoret maalintii Arabacada waxa joogay boqollaal Soomaaliya oo runtii jecel in ay arkaan shirka oo guulaysta. Masuuliintii Soomaaliyeed ee halkaas ka hadlay waxa ka mid ahaa Col. Cabdullaahi Yusuf Axmed iyo Xasan Abshir Faarax oo iyagu ku hadlay magaca hogaamiyayaasha Soomaaliyeed iyadoo ay Caasha Xaaji Cilimina ay ku hadashay magaca Ururada Bulshada ee Raydka ah.

Waxa uu Col. Cabdullahi Yusuf Axmed uu u sheegay masuuliinta hogaaminaya shirka Soomaalida in ay hubiyaan cidda ummadda u wakiilka ah, si looga baxo dhibaatooyinka is-qab-qabsiga. Cabdullahi Yusuf waxa uu si weyn ugu dheeraaday sida loogu baahanyahay in dowlad Soomaaliyeed loo helo taas oo ay ka soo wada qeybgalaan ayuu yiri dhammaan maamulada waddanka ka jira, sida maamulak la magac baxay Somaliland oo aan haatan ka qeybgalin shirka Eldoret.

Cabdullahi Yusufu waxa uu yiri "Haddii ay jiraan sida la sheegayo dalal aqoonsi u raadinaya Somaliland, waxa u fiican maanta in ay ogaadaan, Jamhuuriyadda Soomaaliya in aan la kala goyn karin, la kala qeybin karin, sidii la doono laga yeeli karin"

Gebegabadii, waxa uu u muuqdaa shirka Eldoret mid haatan yididdiilo cusub yeeshay isagoo Wasiirka Arrimaha Dibadda ee Kenyana uu ka dhawaajiyey in aanan laga seexan doonin taabba gelinta miraha ka soo baxa shirkan. Inkastoo ay masuuliyiin Soomaaliyeed oo badani madasha shirka ay joogeen haddana waxaa ka maqnaa meesha Maxamed Qanyare Afrax, Muuse Suudi Yalaxow, Maxamed Cumara Xabeeb iyo
Cali Mahdi Maxamed, kuwaas oo qarkood la sheegay in ay soo foolleeyihiin beryaha soo socda.

BBC Somali

---

KU TUMASHADA XUQUUQDA DADKA LAGA TIRO BADAN YAHAY.

ASSIYAASA NEWS PAPERS

Tan iyo intuu billowday shirka Eldoret 15kii Oktoobar waxaa si ula kac ah loogu tumanayey xuquuqda Beelaha Soomaaliyeed ee laga tiro badan yahay , dhowr jeer oo kala duwan oo la soo cel celiyey qeysashada tirada ergada shirka ka qeyb geleyso Haddeynu tusaale u soo qaadanno qeybtii ugu dambeysay 27 ergo ayaa ku soo hagaagtay 12 beelood oo kuwa laga tiro badan yahay ,waxey aheyd in min labo ergo ugu yaraan ay beelkasta hesho balse waxaa dhacay in caddaalad darro weyn la sameeyey .Tusaale beesha Shiidle oo Jowhar wax ka degta waxaa la siiyey 13 ergo , reer Xamar 4 ergo Baajuun 2 ergo, Reer Baraawe2 ergo ,Carab Yaman , Carab Saalax , Madhibaan , Yibir , Ajuuraan , Baantuu, 6 daan beelood waxaa mid kasta la siiyey hal ergo , waxaa la qadiyey beelaha kala ah : Muuse Dheri ,Tumaal & Eyle oo dhammaantood ka tirsan kuwa laga tiro badan yahay

Sidaa aawadeed Hey’adda Xuquuqda Aadanaha Soomaaliyeed waxey ka codsaneysaa maamulka Puntland , Hoggaamiye kooxeedyada Soomaalida Isimada & Cuqaasha,Haweenka iyo Ururka Dhallinyarada Soomaalida iney is garab taagaan beelahaasi ilaa ay ka helaan xuquuqdooda ee u suuro gelineysa iney Ummadda inteeda kale wax la Qeysadaan

Assiyaasa News paper

---

Jawaab & Talo Ku Wajahan ka qeyb galayaasha shirka dib u Heshiisiinta .

ASSIYAASA NEWS PAPERS

Sidaan wada ogsoonnahay Wargeys ku sheegga loo yaqaan Kulmiye ,Tirsigiisa 5aad ,ee soo baxay Sabti 18/ 1/ 03 waxaa boggiisa 5aad ku qornaa maqaal ka soo horjeeda dib u heshiisiinta oo lagu dhaleeceynayo nidaamka Federaalka oo dhaqan gelintiisa ay hore ugu heshiiyeen hoggaamiyeyaasha Siyaasadda ee sSoomaaliya ee ka soo qeyb galay Shirka dib u Heshiisiinta ,wuxuu kaloo sheegay in shirku rajo xun yahay . Tarjumada xun oo wargeys ku sheeggu Nidaamka Federaalka ka bixiyey waa wax kama jiraan aan sal iyo raadna laheyn , shirkuna rajadiisa wey fiican tahay mar haddii la soo magacaabay Guddoomiya Guddiga Farsamada IGAD ee beddelaya Elijah Mwangla .Dalka Mareykanka oo caalamka ugu awood badan ugun a hodonsan wuxuu ku dhaqmaa nidaamka federaalka waana dalmideysan. Wargeys ku sheegga wuxuu si aan xishood laheyn ugu hadlaa af Dhulboobayaasha & kuwa xaqdarrada ka wadey dalka Soomaaliya 12kii sano ee la soo dhaafay , mana aha wargeys madax bannaan sida ay ku andacoodaan qorayaashiisa ay aqoontooda iyo garashadooda ay liidato marka hore : 1- waa xubno ka tirsan malleeshiyada Dhulboobayaasha oo marakan qalin ku dagaallameya marka xiga :2- waxaa maalgelin siiya & mushahar ugu yaraan 60,000 ksh bilkasta hey’adda loo yaqaan NOVIB oo looga dacwooni karo carqalada iyo fashalinta ay la damacsan yihiin Shirka dib u Heshiisiinta . qarayaashaasi waxey ahaayeen kuwii ka dambeeyey ceyrinta aqoonyahanno xirfad iyo waayo aragnimo u leh qorista iyo soo saarista wargeysyada oo hey’adda hore ugu shaqeyn jirey oo la kala yiraahdo C/ Laahi Max’ed Sheegow & Ibraahim Jaamac Axmed ,waxey ka qoreen war bixin isku dirtay iyaga iyo hey’adda , waxey socdaanba maanta waxey marayaan meeshii ugu liidatay .

Sidaa aawadeed waxaan kula talineynaa dhammaan inta shirka dib u heshiisiinta ka soo qeb gashashay oo ay ka mid yihiin Hoggaamiyeyaasha Siyaasadda , Isimada , Haweenka , dhalinyarada & ururada Bulshada iney dhammaan ay dacwo lid ku ah qorayaasha wargeys ku sheegga Kulmiye ay u qoraan Hey’adda NOVIB oo cinwaankeedu yahay sidatan

NOVIB-SomaliaT/F254-2-4444977.Fax :254-4445126,Email : mjaffer@novibsomalia.org www.somaliacivilsociety.org

RIVERVIEW RD.OFF. RING RD WESLANDS POBOX491,00606 Nairobi Kenya

loona sheego iney in soo noqnoqotay carqalada uu wargeys ku sheegga ku hayo shirka dib u heshiisiinta Soomaalida , ka dib markii qorayaashii aqoonyahanka ahaa laga ceyriyey shaqada wargeys , hey’addana laga codsado iney qorato aqoonyahanno takhasus leh oo talo wanaagsan ku soo kordhin kara qaabka uu shirka u najaxayo

Assiyaasa News paper

---

Contact: webmaster@mudugonline.com

Copyright © Mudug Online 2001

---