Qilaaf u dhaxeeyay beelaha Galkacyo oo la soo afjaray.

Galkacyo,, 10 Jan 2003 (MOL) - Wararka ka imaanaya magaala madaxda gobolka Mudug ee Galkacyo ayaa sheegaya in asbuucaan la soo afjaray khilaaf u dhaxeeyay laba beelood oo wada dega magaalada Galkacyo dhinaceeda Waqooyi kana mida beesha Cumar Maxamuud. khilaafkaan oo markii hore ku bilaamay dhul la isku qabsaday ka dibna isku rogay dhinac qabiil ayaa waxaa ku dhintay illaa 4 qof 10 kalena ku dhaawacantay. khilaafka ayaa soo jiitamayay mudo 2 sanno ku dhaw oo markii hore wax xal ah loo waayay.

Beesha Cumar Maxamuud ayaa khilaafkaas sidii loo xalin lahaa loona xakmayn lahaa u saareen gudi illaa mudo ka soo talo bixinayay. warka ayaa sheegaya in labada dhinacba si aad ah ugu qanceen maslaxadii gudiga Beesha Cumar Maxamuud halkaasna labada beelood isku cafiyeen kuna heshiiyeen. xalinta khilaafkan ayaa waxaa aad loogu amaanay odayaasha iyo daweynaha magaalada Galkacyo oo aan u kala harin sidii loo heli lahaa xal. iyadoo marar badan oo arintu faraha ka bixi lahayd dadweynuhu la yimaadeen simir, dulqaad iyo tanaasul badan.

Waxaa iyana hawlahoodii wali sii wada gudi kale oo iyagana baarintaan ku wada sidii uu u dhintay allaha u naxariistee Suldaan Hure oo nin ka mida Ciidamada Daraawiishta Puntland ku dilay tuulada kalabayr oo ka tirsan degmada Burtinle. Suldaan Hurre oo ahaa Suldaan caan ka ah Puntland ayaa dhimashadiisa aad looga wada xumaaday. gudigaas beesha cumar Maxamuud u saartay baaritnaaka ayaa iyagana la sheegayaa inay hawshoodu si fiican u socoto. iyadoo la qaadan doono talooyinka ay soo jeediyaan gudigaas oo laga soo xulay beesha cumar Maxamuud dhexdeeda.

Mudugonline.com