Saxaafada
wadanka Denmark oo si kulul wax uga qoray waalidiinta Somalida
ee dhaqan celinta caruurtooda Somaliya ugu celiya.
Ottawa
, 7 Feb 2003 (MOL)- Iyagoo soo xiganaya war uu ku dhawaaqay
Wasiirka Isdhexgalka
(Integration Minister) ee wadanka Denmark ayaa maanta
Wargayska Copenhagen Post waxuu qoray dhibaatada iyo muranka
ka aloosmi karta Caruurta waalidiinta Somalidu dib ugu celiyaan
Somaliya iyo wadamada Muslimka ah si caruurtaas bay yiraahdeen
loo soo dhaqan celiyo. wargayska ayaa sheegay in waalidiinta
Somalidu kuwooda ku nool wadamada Yurub ay cinqaabaan caroortooda
si ay u dhaqan celiyaan. Wargayska Copenhagen Post ayaa intaas
ku sii daray in waalidiinta Somalidu walwal weyn ka qabaan
caruurtooda oo yeelata dhaqanka reer galbeedka waana arintaas
tan ay u cinqaabayaan caruurtooda ayuu sheegay wargayskaasi.
Wargayska
oo hadalkiisa sii wata ayaa sheegay in ka dib markii arintaan
ay dawladu Danmark ogaatay ay ku talo jirto in ay lacagtii
gargaarka ka goyso Somali badan si aysan caruurtooda ugu celin
Somaliya. Wargaysku waxuu tusaale u soo qaatay gabar Somali
ah oo lagu celiyay Somaliland iyadoo aan raali ka ahayn ka
dibna la kulantay nolal adag iyo rafaad badan. gabadhaas ayaa
ku baryoontantay ayay yiraahdeen "fadlan gudniinka hayga
badbaadinina oo kaas mar horey igu sameeyaan balse iga caawiya
sidaan Denmark ugu noqon lahaa" Wargaysku waxuu sheegay
inay jiraan caruur badan oo laga kaxeeyay Denmark iyo wadamada
Yurub dhamaantood oo lagu hayo Somaliya.
Ole
olehaan ay wadaan Saxaafada Denmark ayaa Somalidu u arkaan
in ay horseedaan in caruurta Somalidu faraha ka baxdo oo ay
lumiyaan aqlaaqda Islamka iyo edabta bini'aadanimo. waxaa
muuqata inaan saxaafada iyo qaasatan wargayskaan copenhagen
Post aysan waxba ka qorin caruurta Somalida ee faraha ka baxay
oo hadda qaarkood gadaan ama cunaan muqaadaraadka aduunka
laga mamnuucay. marnaba isma ay weydiin maxaa waalidiintaan
ku qasbay inay caruurtooda Somaliya ku celiyaan. miyaysanse
xor u ahayn in waalidiintaasi caruurtooda ula guuraan meeshii
ay u arkaan inay munaasib ku tahay barbaarinta iyo koronta
caruurtaas. yaase uga naxariis badan waalidka ilmaha uu dhalay?
Jaaliyada
Somalida ee yurub ayaa iyagu u muuqda kuwo horda ama ku mashquulsan
hawlo kale oo aan ogaynba ole oleha ba'an ee lagu hayo.
halkaan
ka akhri qoraalka wargayska Copenhgen
Mudugonline.com
Cabdullaahi
Yusuf oo Soosaray Baaq Nabadeed
Eldoret, Feb 07,
2003 , (AllPuntland )- Baaq nabadeed ku socda dadweynaha Puntland
oo uu maanta soo saaray Madaxweynaha Puntland Cabdullaahi
Yusuf Axmed ayaa nuqul ka mid warqadii uu ku qornaa wuxuu
soo gaaray mid ka mid ah xog uruuriyayaasha AllPuntland ee
Eldoret ku sugan, baaqaas oo siddii uu u dhignaa aan uga soo
guurinay warqadii uu ku qornaa ayaa u dhigna siddaan:
7
February 2003
Ku:
Dhamaan Dadweynaha Puntland
Ujeedo:
Baaq nabadeed
Aniga
oo ah Madaxweynaha Puntland Cabdullaahi Yusuf Axmed, kuna
hadlaya magaca dadweynaha, kan dawlad goboleedka Puntland
iyo kaygaba waxaan si xushmad iyo qadarin mudan ugu baaqayaa
dadkeena adkaynta midnimadeena iyo nabadgalyada dhexdeena
iyo inaan xallino khilafaadka siyaasadeed ee gudaheena.
Walaalayaal,
wadahadal iyo isu taanaasul baa xal lagu gaari karaa. Waxaan
idinku adkaynayaa inaad xoojisaan nabadda, xasiloonida iyo
kala dambaynta dadweynaha Puntland. Waxaan si xushmad leh
dhamaantiin idiinka codsanayaa inaad kordhisaan dadaalkina
ku dhisan maslaxad doonka, wadahadalka iyo xallinta khilaafaadka
siyaasadeed ee dadkeena dhexdiisa.
Talooyin
kasta oo wax ku ool ah, laguna xallinayo khilaafadka siyaasadeed
waa soo dhawaynaysaa dawlad goboleedka Puntland. Waxaana ballan
qaadaynaa inaan si hagar la'aan ah uga shaqayno raadinta xal
siyaasi ah oo lagu dhameeyo khilafaadkeena.
Ugu
dambayntii, maadaaba haatan loo fadhiyo shir qaran oo lagu
nabadaynayo Soomaaliya oo dhan, laguna dhisayo dawlad dhexe
oo federal ah, waxaan ugu baaqayaa walaalaheena wali rumaysan
inay colaad ku gaaraan ujeedooyin siyaasadeed inay taas ku
bedeshaan nabad, wadahadal, saamixaad iyo wixii ay xaq u leeyihiin
oo ka maqan.
Cabdullaahi
Yusuf Axmed
Madaxweynaha
Dawlad Goboleedka Puntland
Warqadii
uu Baaqaani ku qornaa waxaa ka soo guuriyay Qaybta Wararka
AllPuntland
Cabdishakuur
Mire Aaden oo ka hadlay joogitaanka xubin ka tirsan Kooxda Carta
iyo Warar La isla Dhexmaro gaalkacyo in ninkaas xabsiga la dhigi
doono
Gaalkacyo
, Feb 07 2003 (AllPuntland)- Wasiir ku xigeenka war faafinta
Puntland C/shakuur Mire Aadan ayaa maanta Saxaafadda ka sheegay
asagoo jooga magaalada Boosaaso in ergada ka socota Maamulka
C/qaasin Salaad Xasan ee uu hogaaminayo Siciid Cismaan Islaan
ay dalka ku joogaan sharci daro.
Cabdishakuur
waxaa uu sheegay in maamulka C/qaasim Salaad uu ka qayb qaatay
dumintii maamul goboleedka Puntland, sidaas darteedna uusan
Puntland Joogi karin qof jago ka hayaa maamulkaas hadii uu
joogana ay tahay sharci daro..
C/shakuur
ayaa intaasi ku daray in hadii uu Siciid Sii joogo Puntland
ay dhici karto in wado furan tay unoqoto dadkii dumiyay Puntland
inay dib mar labaadna ay khal khal u abuuraan.
Waa
markii labaad ee wasiir ku xigeenku sheego in Siciid Cismaan
uusan sharcigu u ogolayn inuu siijoogo Puntland, wuxuuna sheegay
inaan wali labadalin qodobkii qeexayay in qofka xil kahaya
Maamulka C/qaasin uusan iman karin Puntland.
Waxaana
saacadihii ugu danbeeyay la isla dhexmarayay magaalada Gaalkacyo
sidda uu soo sheegay wariyaha Allpuntland ee Galkacyo in Siciid
Cismaan xabsiga la dhigi doono.
Qaybta
Wararka AllPuntland
