“Qardho dagaalku u dan maaha, caruurteeda u dan maaha, Cadde dagaalku u dan maaha caruurtiisa u dan maaha, aniga dagaalku ii dan maaha, reer Boosaasood u dan maaha…….”

Waraysi Radio Midnimo la yeeshay Cabdi C//le Siciid Jinni Boqor.

Waraysigaan waxaa qaaday Maxamed Siciid Cumar (Kaashawiito)

Waxaanu waraysi la yeelanay Wasiirka dhaqan celinta, dib-u-dhiska iyo dib-up heshiisiinta Maamulka Dowlad Goboleedka Puntland Cabdi Cabdulle Siciid JiniBoqor oo ka mid ahaa wefti uu hogaaminayey Madaxweynaha DGPL oo dhowaan ku soo laabtay dalka, Arrimaha ay weftigani u yimaadeen ayaa la sheegay in ay ugu weyn tahay heshiis la filayo in uu dhex maro Maamulka DGPL iyo Gen. Cadde Muuse,  waxaanuna ugu horeyn wax ka weydiinay imaanshahooda ay Puntland yimaadeen in ay raad ku leedahay heshiishka laga dhex wada Maamulka iyo Gen. Cadde Muuse ciidamada uu horkacayo, wasiirka oo arrintaas ka jawaabayana wuxuu yiri:

J. Arrintaasi run weeye, wefti baanu aheyn Madaxweynaha Puntland Hogaaminaayo, anaguna waxaanu aheyn raggii la socday, waxaana u nimid in dibu-heshiisiin Soomaaliya laga sameeyo, maamulka Puntland, Dowlad Goboleedka Puntland iyo kooxaha mucaaradka ah ee hadda jira dibadda sidii la isgu keeni lahaa, taas oo aanu mudnaan siineyno haddii aanu Maamulka nahay, ama waxgaradka Puntland nahay waayo dantayada ayaa ku xiran in aan dadka walaalaha ah heshiisiino, waayo Soomaalidu waxay tiraahdaa waxaa isugu dhow carab iyo laba daan iyana waa is qaniinaan, in la diriro ceeb ma ah, laakiin in la heshiin waayo baa ceeba, khasaaraa dhacay, dadbaa dhintay, dalkii oo awalba tabar yaraa ayaa shaqadiisii carqalad gashay, dadka u dhan maaha, maslaxad uma aha ummadda reer Puntland  dagaalkaasu dhimashadu ka sokoow, dhaqana uma laha, khasaarooyinka waa ka soo gaareen.

Caano qubtay hanbadoodaa la qabtaa,  waxay noogu muuqataa oo aanu u nimid in nabad la gaaro, in colaada la joojiyo, haddii kumanyaal qolo disho qolada dishay ma guuleysan qolada laga dilayna guul darro keligood ma gaarin, guul darradu dadkoo dhan bay ku dhacaysaa, kugu dhimay oo kaa dhimay weeye, in aan carada iyo xiniinyo taabadku inala tegin oo danteena burburin baanu dadka u sheegeynaa, iyadaanuna u nimid, Maamulka Puntlandna taasuu diyaar u yahay.

Walaalahayo xayaga jira oo mucaaradka ahina sida aanu warka ku hayno diyaar bay u yihiin, waxaana rajeyneynaa wakhti dhow in nabad la gaaro.

S. Waxaa nagu maqaalo ah in ay jiraan Laba Isin oo waday warqad fariin ah oo Jen. Cadde Muuse idiin soo dhiibay, maxaa ku qornaa warqadaas?

J. Qolyahaas aad sheegeyso anigu ma arag, lamina kulmin meel lagaga hadalaayana anigu ma arag.

S. Haddii la heshiinayo dabcan waa in ay jiraan wax la isku qanciyo, haddaba maxaad ku qancinaysaan qolada dhinacaas jirta?

J. Waxaan ku qancinaynaa dantooda, dantoodaa nabadda ah, dalkoodii, caruurtoodii iyo naagahoodii ayey la dagaalamayaan, anaguna caruurtayadii iyo walaalahayo ayaan laynaynaa, labada qolo qolona dan uguma jirto, waa in nabad la helaa, waa in aynu isu nimaadnaa, waa in aanu gacmaha is qabsanaa, Cadde iyo raggiisu dalkaan waxbay ku leeyihiin, anagu kuwa xaga jira wax baanu ku leenahay caruurtayadii iyo walaalahayo waaye, dad haboon in aanu is layno maaha, dagaalku meesha kuma jirto, dagaal sokeeye waa la yaqaan faa’iido ma leh, anagaa ku soo jirnay muddo dhowr iyo labaatan sanno ah, wixii laga dheefana waa la ogyahay, marka waxaanu ku qancinaynaa oo isu keenaynaa in labadayada qoloba aqbalno in aan qolana dagaalku dan u aheyn, waxa meeshaan yaal baanu wada leenahay waa nagu filan yihiin in aanu wada maamulanaanu rabnaa, welcome baanu leenahay, digsiga dheriga dhiniciina qabsada dhinacayagaanu haysanaynaa,

Maamulka Puntland oo tabarta yar oo cusub in la hirgeliyo Dowlad Gobleedka Puntland ay shaqeyso, dowlad Federaal ah ay ku xirnaato, tartanka adduunka wax ka gasho baan rabnaa taasna adduunka wax ka gasho baanu rabnaa taasna dagaalku u dan maaha baan qabaa, Qardho dagaalku u dan maaha, caruurteeda u dan maaha, Cadde dagaalku u dan maaha caruurtiisa u dan maaha, aniga dagaalku ii dan maaha, reer Boosaasood u dan maaha, ninkii hadda is yiraahda dagaalka ka faa’iideyso waa wakhti kala jaban ahe arargti  gaaban buu noqonayaa, dagaalka iyo colaadu waa in ay dhamaadaan dhaladii kala jabtay waa in la isku kabaa.

S. Waxaa nagu maqaalo ah in qoloda Gen. Cadde Muuse ay soo jeediyeen in la qabto doorashooyin cusub si hogaan cusub loo doorto, idinku arrintaas ma aqbalaysaan?

J. Fikrad khaldan weeye, doorashooyin ha sameeyo, haddaan la sameyn dagaal baan sameynayaa, doorashooyinku waa iska najaraal, dadka ayaa wax doorta, dadka ayaa go’aanka leh, dadka ayaa madaxda wax u dhiibta, wakhti haboon goor ay timaadaba doorasho waa imaaneysaa, laakiin hadda dagaal joojin mayo haddaan doorashooyin la sameyn laga hadli mayo, dagaalku inoo dan maaha ee hubka aynu dhigno oo isu nimaano, oo wax wada qabsano weeye, dadbeedna markaas waxaa imaanaya side wax u wada qabsanaa, maxaa inaka khaldamay, wixii khaldamay side u saxnaa, waxaynu haysano side u hagaajinaa, sidee wax u hagaajinaa,sidee wax u qabsanaa, waxaasoo dhan baa imaanaya.

Arrintu doorashooyin waa ka weyn tahay, dadka nabadaa deeqda, dalka nabadaa deeqda, qolo waliba nabad bay u baahan tahay, anagu nabad baan u baahanhay, Maamulku nabad buu u baahan yahay, Cadde nabad buu u baahan yahay, dhulkooda in ay ku soo noqdaan oo aysaan qaxooti ahaan, oo aanay dhulkooda soo weerarin baa maslaxadi ugu jirta, nacas baa manta ka faa’iideysta waxaan, Caddana nacas ma aha oo anigaa kuu aqaan, waxaan ku rajo weynahay in uu dalka nabad ka sameyn doono, waxaan kaloo ku rajo weynahay, anaga Maamulka reer Puntland oo Madaxweyne Cabdulaahi Yuusuf hogaamiye in aanu diyaar u nahay in aanu nabada soo dhoweyno, walaalahayana aanu soo dhoweeyno oo gacmaha is qabsano.

S. Col. Jaamac Cali Jaamac isaga ma is aragteen, waanwaantan nabadeedse qayb ma ka qaadanayaa?

J. Isaga waanu is aragnay, shirkaanu wada jognaa, oday halkaas jooga oo reer Puntland ah weeye, laakiin siyaasada kama wada sheekeysano oo isku layn ma nihin, nabadeynta hadda halkan ka socotana wax warkiisa haya ma maqal.

S. Si nabad loo helo Maamulka Puntland ma ogol yahay in jagooyin muhiim ay siiso kooxaha mucaaradka ku ah?

J. Puntlandta manta dhisan horta dadkaa leh, dadkaa dhistay, dadkay u sheqeysaa tabar kasta ha lahaato, waxa laga rabo ma wada gudbin karto, oo ma dhiibi karto oo tabar uma hayso istiil bay ku socotaa, weli gurguurad bay ku jirtaa, waxa looga hanqal taagayo lagama wada heli karo.

Caam ahaan markaan ka hadlo maamulka waxaa weeye, sababtu waxay tahay maamulka dhaqaalihiisu waa kooban yahay, madaxnimadiisu way kooban tahay, waa gobol Qarankii Soomaaliya oo Maxamed Siyaad xukumi jiray 18 gobol maaha, waa Shan gobol oo sigu tegay oo beelo koobani degaan, mitaal hadda anigu wasiir baan ahay laakiin Wasiir dowlad goboleed baan ahay, dad kooban baa masuuliyada u haya marka ninii u hanqal taiga Wasiirkii Maaliyada ee C/raxmaan Jaamac Barre wuxuu hayn jiray oo C/raxmaan Faroole ugu hanqal taaga waa nin aan garan maamulka iyo xilka meesha ka jira, anagu dalkaanu u shaqeynaynaa, waxaanu qanbo Allaaa og, dadkuna waa in ay sidaas u gartaan.

Madaxweynaha Puntland waa Madaxweyne Dowlad Goboleed, Madaxweynihii Qaranka Soomaaliyeed ma aha, risoorsiga iyo awooda uu leeyahay waa ay kooban yihiin, marka marar badan waxaa lagu diriraayaa “Cunno Jiilaal Canba Canbuu bidaa”.

Walaalahayo waa ogyihiin, Caddana wuu ogyahay, jabhadna waa yaqaan, maamul dowladeed oo weyn waa yaqaan, mid goboleedna waa uu yaqaan iyo raga la socdaa, haddiise niyad samami timaado waxba la isla waayi mayo, laakiin hadda gorgoradu ma aha, amxaa nala siinayaa, iyo boos hebel miyaa  nala siinayaa, iyo noo kordhiya, waxa weeye nabadaa ina deeqdee nabada aynu qaadano, dhulkeena aynu maamulano waxeena aan isku kakabano, aynu riixno, aynu riixno oo haddaan dalag weyno dug aynu ku kaxeyno weeye waxa lagu gorgortamayaa, ee qaybsi manta taagan oo miiska dushiisa ah lama gaarin.

Haddiise ay timado oo raggu dalka ku soo noqdo, dee dadkani xaq bay leeyihiin, wadaniyiin weeye, dad wadanka laga yaqaan weeye, wixii wadanka ka jira bay qayb Libaax ku yeelanayaan oo rasmi ah.

FG:Wareysigaas waxaa Radio Midnimo u qaaday Maxamed Siciid Cumar (Kaashawiito), Waxaa Mudugonline soo gaarsiiyay Radio Midnimo, waxaana lagu beeninayaa war ay horey u faafisay Puntlandstate oo ay ku sheegeen inay ka soo xigteen waraysiga Jini-Boqor ee Radio Midnimo. [Halkaan ka gal warkii Puntlandstate ay ka soo xigteen Radio Midnimo]

Radio Midnimo, Bosaaso
Mudugonline.com

KU LAABO BOGAA HORE