SICIID CADUUR
IYO CABDIRAXMAAN FAROOLE; KUD KA
GUUR OO QANJE U GUUR
Shalay:Maalmihii murugada iyo dhibka ugu badan ka jiray
PL, Maalmihii Carte iyo ciidamadii is bahaystay ee ina Cumar geele
ay calanwalaynayeen cirifyada dunida iyagoo sheeganaya dawlad
Soomaaliya wakiil ka ah, Maalmihii shacabka reer PL Culimo iyo
caamo, Marwo iyo Mudane, Madax dhaqan iyo mid siyaasadeedba madaxa
layskula wada jiray, maalmihii kacdoonka la galiyay shacabka reer
PL ee ay in badan oo ka mid ahi ceeryaamadii Carte roobka moodeen;
wasiirkii maaliyada ee xilligaas PL waxa uu laafyoonayay wadooyinka
magaalada Bosaaso iyada oo aad moodo in aan wax xil ahi ka saarnayn
waxa ka dhacaya PL iyo Soomaaliya midna, wasiirka xilligaas Siciid
Caduur waxaa maalmahaas lagu xamanayay in uu lacago ku shubtay
Bank ku yaal imaaraadka.
Siciid Caduur ma ahayn nin aqoon maaliyadeed lahaa, hase ahaatee
waxa uu caan ku ahaa in uu yahay nin aysan ka muuqan wax ku tagri
fal lacageed iyo maamul xumo ah toona, dad badan ayaa is waydiinayay
shaatiga iyo surwaalka aan duugoobin ee uusan Siciid iska badalin,
hase ahaatee Dad xog ogaal ahi waxa ay sheegeen in Siciid Caduur
uu ka soo iibsado shay walba hal darsin oo isku midab ah, iyo
waliba in uu xirto oo dharka ugu qaalisan ee maalqabeenadu xidhaan,
taasina ay tahay xeeladda marin habaabisay dareenka dad badan.
Siciid caduur waxa uu caan ku ahaa in uu diido wax u baahan dhaqaale
yar oo PL wax weyn ugu fadhiya, isla mar ahaantaasna in uu ogolaado
wax dhaqaale badan ku baxayo isla mar ahaantaasna aan faa’iido
u dhigantaa ka imaanayn. Nin cabdullaahi marka uu la joogo aad
ugu dhaw marka uu ka maqan yahay dadka ula siman. Nin aan awood
ku lahayn magaaladda Bosaaso, ninkii laga qabsaday Bosaaso isaga
oo jooga, dhaqaalihii iyo awoodiina gacanta ku haysta ee Martida
ku dhex ahaa.
Maanta: waxaa wasaaradda Maaliyada PL gacanta ku haya
Cabdiraxmaan Faroole, oo horay xilal kala duwan uga soo qabtay
bangiyadii Soomaaliya, waxaa in xilkaas loo magacaabo soo jeedinteeda
lahaa Axmed Maxamed Cigaal oo ay ilaa iyo maanta yihiin saaxiibo
far iyo faraanti ah, isku meelna ay dagan yihiin. Axmed oo haatan
ah wasiirka hawlaha guud iyo Faroole oo ah wasiirka maaliyaddu
waxa ay haatan ku maqan yihiin shir imaaraadka Carabta ah, oo
laga hadlayo naaxinta xoolaha, iyadoo ay haatan PL madaxdeeda
iyo wax garadkeedu abaabul ugu jiraan sidii looga mira dhalin
lahaa wada hadalo nabadeed oo beryahanba loogu googol xaarayay
sidii loo dhamaystiri lahaa khilaafaadkii siyaasadeed ee PL
Cabdiraxmaan Faroole Wasiir lagu falay Guryo iibsi; nin Cuno
jecel iyo ceeb allaa is badaye, mudadii uu joogay Bangiyada Soomaaliya
waxa uu xamar ka dhistay ama ka iibsaday Guryo aan yarayn, mudadii
uu Garoowe Joogayna waxa uu dhistay laba Guri oo kale, muddo gaaban
oo uu ka mid ahaa ergadii Nabadaynta ee ay hay’adda Diakonia maalgalisayna
waxa uu balaariyay guri uu ku lahaa magaalada Garoowe, dhawaantan
mar uu safar ku tagay magaalada Nairobina waxa uu wakhtigiisa
inta badan ku lumiyay baayacaad iyo baadi doonka laba guri oo
uu midna sheegay in uu naftiisa u raadinayo midna uu sheegay in
uu dawladda u iibinayo, iyadoo guriga danbe loo qaatay in uu yahay
daah uu u samaynayay guriga uu doon doonayay in uu ka iibsado
Nairobi, dadka xog ogaalka ah qaar ayaa ku macneeyay in uu doonayay
in uu labada guri qiimahooda ku xisaabiyo jeebka dawladda si toos
ah, isagoo ka dhigaya in uu guriga dawladda ka bixiyay lacagta
uu labada guri ku iibiyay.
Maalmahaas Nairobi, sida wararku nagu soo gaareen Faroole waxa
uu ku qarash gareeyay lacag ka badan 30 kun oo oo Doollar kaligiis,
isagoo isla mar ahaamtaana ka dhuumaalaysanayay markii danbana
si bareer ah u diiday boqolkii Doollar ee bishiiba mar la siin
jiray Ergada PL ee shirka ka qayb galaysa, iyo baahiyihii mihiimka
ahaa ee hawlaha shirka. Ciidanka daraawishta PL ayaan iyaguna
marnaba helin mushaarka iyo kharashiyaadka kale ee ay u baahan
yihin inta madaxweynuhu dalka dibada uga maqan yahay.
Intaas kuma eka oo kaliya ee wasiirku dalka imaaraadka Carabta
oo uu soo maray waxa markii uu ka soo laabtay Kenya ayaa sida
wararku sheegayaan waxa uu niman dilaalo ah u diray in ay u soo
sheegaaan qiimaha ku baxaya guri weyn oo degaan ah oo nin madax
ahi dagi karo, arrinta layaabka lihise waxa weeye guri kale oo
weyn oo la ii sheegay in uu dhawaantan ka iibsaday magaalada Bosaaso
bartamaheeda, meel ku dhaw Hoteel Kamaaludiin, kaas oo haddii
ay cadaato muujinaya in Cabdiraxmaan Faroole qabo nooc waali ah
oo gurya jacayl ah.
Madaxweyne ku xigeenka PL maxamed Cabdi Xaashi ayaa bishan Abriil
bilowgeedii intii aan madaxweynuhu dhawaan ka soo laaban dalka
Kenya waxa uu soo jeediyay in Cabdiraxmaan Faroole laga qaado
xilka wasaaradda Maaliyadda lacago badan oo ku maqan awgood iyo
in baaritaan lagu sameeyo lacagtaas, hase ahaatee sida warar lagu
kalsoon yahay sheegayaan Cabdullaahi Yuusuf ayaa mudane Xaashi
ka codsaday in arrintaas laysaga yimaado oo dib loo dhigo.
Dadka siyaasadda indha indheeya ayaa waxa ay qaarkood qabaan
in Mr. Faroole xilka looga qaadi doono nin ka soo jeeda mucaaradka
PL ee haatan ku sugan Somaaliland haddii is afgarad yimaado sidaas
awgeedna in faroole qorshaynayo abuurista mucaarad kale oo uu
hadda u sii xaabxaabayo si mar kale isagana wasaaradda loogu soo
celiyo, halka saaxiibkiis Axmed Maxamed Cigaal iyo Siciid Caduur
oo wasiir iyo wasiir ku xigeen ka soo noqday wasaaradda maaaliyadda
labada midba gaarkiisa ugu taamayo in uu yeelan doono wasaaradda
Faroole kadib.
Marka la is barbar dhigo Faroole iyo Caduur ayaa labadaba lagu
tilmaamaa in ay yihiin niman gacan adag oo aan lacagta laga soo
saari Karin jid iyo jid daraba, hase yeeshee Siciid ayaa waxa
uu dheeree Faroole dabeecad wanaag iyo asluubta qancinta qofka
wax doonaya, Siciid Caduur waxaa heli karay qof kasta oo doonaya
wuxuuna u fadhiyi jiray baararka sida dadka caadiga ah isaga oo
meel kasta oo uu marayo dadka si wanaagsan ula hadli jiray, xataa
Siciid marnaba teleefon laguma waayi jirin, halka Faroole uu dadka
ka cararayo dhuumaalaysanayo taleefanka uusan dadka ka qabanayn
qof uu isagu dan ka leeyahay mooyaane, hadana aysan sababtu ahayn
mashquul hawleed.
Si kasta xaalku ha ahaadee Wasiirkii Maaliyadda PL iyo saaxiibkiis
Axmed M. Cigaal waxa ay maalmahan ku wareegayaan dalka imaaraadka
Carabta iyagoo sida wararku sheegayaan ay doondoonayaan guryo
iib ah iyo maraakiib kaluumaysi oo ay wakiil uga noqdaan PL, iyadoo
madaxweynihii iyo ergadii shirka Kenya qaarkood ay dalka din ugu
soo laabteen arrinmo la xiriira dib u heshiinta PL.
Caaqil Samaale.(Codka Xornimada)
Bosaaso, Puntland, Somalia.
29/abril/2003
caaqilsamaale@hotmail.com
