Wasiiro ka socda maamulka
Puntland oo safar ku aaday Dalka Imaraatka Carabta
Bosaaso, 28 April 2003 (MOL)-Waxaa maanta ka dhoofay Gegida
dayuuradaha ee magaalada boosaso wafti heer wasiiro ah oo ka
socda maamul goboleedka puntland. Wasiiradaasi oo ay ka mid
ahaayeen Wasiirka maaliyada, Wasiirka hawlaha guud iyo xubno
kale. Waxayna waftigaasi u kaceen dalka Imaraatka Carabta.
Wararka laga helaayo meelo ku dhaw dhaw dawlada ayaa sheegaya
in safarka wasiiradu la xiriiro arimihii nabdaynta Puntland
halka wararka qaar kalena sheegayaan in ay u baxeen soo daabicid
lacageed iyadoo xiligaan dadka beekhaamiya dhaqaalaha Puntland
ay odorasayaan in ay soo wajahantahay xili dhaqaale xumo oo
u baahan in laga gaashaanto.
C/risaaq Sh.Aduun
Mudugonline.com
Roob lixaad leh oo
xalay ka da'ay Gaalkacyo iyo qasaarooyin roobkaasi watay.
Galkacyo, 28 April 2003 (MOL)- Wararka saaka naga
soo gaaraya magaala madaxda gobolka Mudug ee Galkacyo ayaa sheegaya
in halkaas xalay roob lixaad leh ka curtay abaarihii 1:00am
saqdii dhexe ee habeenimo uuna si xawli leh oo aan kala go'o
lahayn u socday illaa 2 saac. roobkaas oo la sheegay inuu ka
soo curtay tuulada abaaray oo aan magaalada ka fogayn kana xigta
dhinaca waqooyi ayaa la soo sheegayaa inuusan gaarin tuulooyin
iyo degmooyin waqooyiga uga toosan magaalada. tuulooyinka Bacaadweyn,
Xarfo iyo degmada Burtinle ayaan laga soo sheegin wax roob ah.
Dhinaca koonfurta magaalada Galkacyo ayaa la sheegay
in roobku uu socday illaa iyo deegaanka Dhuuso mareeb halkaas
oo laga soo sheegay in 7qof oo oo hal qoys ahayd ay haleeshay
Biriq, qoyskaas oo ahaa xoolo dhaqato ayaa la sheegay inaan
cidna ka badbaadin. wali si sugan looma hayo qasaarooyinka dhabtaa
ee uu gaystay roobkaas dhinaca baadiyaha. Dhinaca degmada Jariiban
ayaa la sheegay in iyana roob sidaas u badnayn inuu gaaray.
Magaalada Galkacyo ayaa shalay waxaa ka jiray
kulayl aad u badan oo uu yaraa socodka magaalada halka maantana
hawada magaaladu ay leedahay caraf saxan saxo oo qof walba u
soo baxay banaanka. Roobkaan ayaa waxaa lagu tilmaamay naxariis
illaahay waxuuna ahaa roobkii ugu cuslaa ee Galkacyo ka da'a
illaa iyo waqti fog.
Mudugonline.com
Masuuliyiin sar sare
oo iska casilay Puntland
Boosaaso, (AllPuntland) - Wasiirka wasaaradda
Arimaha Gudaha iyo Dawladaha Hoose Axmed Cabdi Xaabsade iyo
Wasiir ku xigeenka wasaaradda Hawlaha guud iyo Gaadiidka Axmed
Maxamed Nuur ayaa maanta madaxwayanaha Dawlad goboleedka Puntland
Cabdullaahi Yuusuf Axmed u gudbiyay qoraal is-casilaad ah.
Nooma suurtoobin inaan helno nuqul ka mid ah xaashida iscasilaada,
balse waxaa la sheegay in masuuliyiintaasi ku saba-beeyeen codsigooda
shaqo-ka-tagista ah wadashaqayn iyo xiriir xumo soo dhex gashay
xukuumadda.
Warar kale ayaa sheegaya in arintu ka dhalatay adeegga wasaaradaha
oo hoos loo dhigay, taas oo masuuliyiintaasi aad uga xumaadeen,
warar ka soo baxaya madaxtooyada ayaa sheegaya in aan illaa
hadda laga aqbalin masuuliyiintaas istiqaaladooda.
Ma cadda, in labadaan masuul isku arin tabanayaan (cabanayaan)
iyo in kale, maanta iyo caawaba, waxaa Boosaaso ka soconaya
shirar kala duwan oo xukuumadda Puntland inta joogta Boosaaso
ay ugu jirto sidii loo dhamayn lahaa tabashada masuuliyiinta.
Dad badan ayaa u arka istiqaalada masuuliyiintani inay tahay,
miday ku muujinayaan waxa ay tabanayaan balse aysan daacad shishe
ka ahayn.
Maahan markii koowaad oo masuul xil sare ka haya dawladda uu
is casilo, Guddoomiyaha Baarlamaanka Puntland Eng. Yuusuf Xaaji
Siciid ayaa 23 Feb 2003 sidaan oo kale ugu dhawaaqay is-casilaad,
maalin golaha wakiiladu u fadhiyeen kalfadhi caadi ah, taas
markii dambe baarlamaanku ka diiday, is casilaaddaas Eng, Siciid
ayaa lafteeda lagu macneeyay mid uu ku eegayay taageerada uu
ka haysto goliihiisa.
AllPuntland
