Ministry of Fisheries, Ports & Marine
Transport
April 21, 2003
Ku:Maamulka Shirkadda SOMCAN
Og:Madaxweynaha Dawlad Goboleedka
Puntland
Pages: 2
Ujeedo:Ka
Noqosho Heshiis
Anagoo tixraacayna heshiiskii
aan la galnay shirkada SOMCAN ee ka diiwaan gashan Ajman Free
Trade Zone UAE ee ujeedadiisu ahayd ilaalinta xeebaha Puntland
Tariikhdu markay ahayd December 2, 2002. Kaas oo ka koobnaa 19
qodob oo u qoran si qurux badan balse aan la hirgelin.
Kadib markii ay si
toos ah uga shaqa geleen badaha dawlad Goboleedka Puntland ayaa
shirkada SOMCAN waxay jabisay heshiisyadii qayb ka mid ah ku waas
oo ay ka mid yihiin Qodobka 6aad iyo kan 14aad. Sida:
1. In ciidanka
la saarayo gaadiidka bada ilaalinaya ay leedahay Dawlad Gobleedka
Puntland kuwaas oo ku shaqaynaya sida caadiga ah amarka taliyaha
Ciidanka Mariinada
2. In ay leedahay soo saarista laysamada
Wasaaradda Kalluumaysiga, Dekedaha iyo Gaadiidka Bada cidkalena
aysan xaq u lahayn.
Sidaas
darteed iyada oo ay saaran yihiin gaadiidka Shirkada ciidamo Dawlad
Goboleedka Puntland ah ayey shirkada SOMCAN u isticmaashay qaab
khaldan kaas oo ah mid ka baxsan qorshaha iyo hab sami u socodka
shaqada Dawlada
Waxaa
kaloo jirta in doonyo ay leeyihiin dad muwaadiniin ah iyo dad
ajnabi ahiba ay dhib u geysteen kuwaas oo haystay Laysamo ay u
soo saartay Wasaaraddu iyaga oo qaybo badan oo ah kalluumaysato
yar yar ee degaan ah dhib u geystay sida ka jar jarid shabaago
iyo dhibo kale oo badan.
Sidaas
darteed, iyada oo shaqada wasaarada socodsiinteedii ay dhib u
geysteen iyo weliba cabasho joogto ah oo dadku noo soo gudbinayaan
ayaan anaga oo tixgelinayna heshiiskii aan la galnay SOMCAN in
badan indhaha ka laabanay ayey hada waxay bilawday falal burcad
nimo ah, sidaas darteed, Wasaaradda Kalluumaysiga, Dekedaha iyo
Gaadiidka Badu waxay go’aansatay inay ka noqoto heshiiskii ay
la gashay shirkada SOMCAN ka dib markii ay buuxin waayeen shuruudihii
looga baahnaa, laga bilaabo maantay oo ay taariikhdu tahay April
21, 2003.
Wabilaahi
Tawfiiq
Wasiirka
Wasaaradda Kalluumayisga, Dek. Iyo Gad Badda
Cabdirisaaq Cali Sidiic (Shaahdoon)
FAALO:BIYO DIIDSANAANTA
SHIRKADDA SOMCAN IYO XOG DHABA OO KU SAABSAN DAGAALKA BADDAHA PUNTLAND.
"Mid ka mida mulkiilayaasha shirkadda
SOMCAN ayaa sheegtay ku simaha Taliyaha Ciidamada Daraawiishta!!!"
Furitaanka baalasha qarsoon
Runtii waxaa la oran
karaa waa hurgumo mudo dheer daawo loo waayey oo iskeed isaga
dillaacday.
Shirkadda SOMCAN
waa shirkad la aasaa santay dib u soo noqoshadii maamulka Puntland,
waxaana ay qaabilsan tahay ilaalinta xeebaha Puntland, iyadoo
adeegsaneysa ciidamada ilaalinta xeebaha Puntland.
Shirkadani waxay
u muuqataa mid bedeshay shirkadii Hart Group oo Saddexdii sanno
ee hore iyadu nidaam caynkan oo kale ah dalka kaga shaqeysaneysay,
hase yeeshee labada shirkadood waxay ku kala duwan yihiin Shirkadda
Somcan ma bixiso Laysimada kalluumeysiga halka shirkaddii Hart
Group ay bixin jirtay, shirkadii Hart Group waxaa agaasime ka
ahaa Khaliif Ciise Mudan oo daacad u ahaan jiray maamulkii Cabdulaahi
Yuusuf, balse meesha ka baxay markuu ku caasi garoobay.
Agaasimaha shirkadda
Somcan waa C/weli Cali Taar, wuxuuna ahaa taageerayaashii ugu
firfircoonaa xiligii Madaxweynaha DGPL uu fadhiyey Quricii magaalada
Gaalkacayo, C/weli wuxuu u huray xiligaas hanti aad u fara badan
sidii C/laahi dalka dib ugu qabsan lahaa, C/weli wuxuu ahaa ninkii
ka danbeeyey fikradii aan hana qaadka noqon ee dhismaha deked
balaastiik ah oo laga dhiso deegaanka Gara-cad ee Gobolka Mudug,
hase yeeshee wuxuu ku guuleystay in uu halkaas ka dhiso garoon
diyaaradeed iyo jid caratuur ah oo loogu magac daray Taar Airport.
Waxaa la sheegaa
in uu jiray ballan weyn oo ka dhexeysay C/weli Cali Taar iyo Madaxweynaha
DGPL C/laahi Yuusuf Axmed oo aheyd in loo dhiibo shirkadda ilaalinta
xeebaha Puntland, isla markaasna ay bixiso Laysimada Kalluumeysiga,
laakiin arrintaasi way mira dhali weyday, waxaana loo xilsaaray
shirkada Somcan in ay ilaaliso xeebaha oo keliya, isla markaasna
ay khidmad ku yeelato Laysimada ay dowladdu bixiso. Waxaa laga
yaabaa in aad is weydiiso maxay u suura geli wayday in shirkaddu
bixiso laysimada?
Arrintaas ayaa la
sheegaa in uu ganafka ku dhiftay Wasiirka Wasaaradda Dekeddaha,
Kalluumeysiga iyo gaadiidka badda C/risaaq Cali “Shaahdoon”, oo
qudhiisa la rumeysan yahay in uu ballan adag ka haystay xiligii
Quraca Madaxweynaha DGPL in loo magacaabo Wasiirka dekedda.
Isxulufaysiga siyaasadeed
ee ka dhex jira Golaha Wasiirada ayaa raad weyn la sheegaa in
ay ku leedahay shirkadda SOMCAN oo weyday khidmadeedii ay ku lahayd
dowladda. Mar kale ayaa shirkaddu dareentay in maraakiib aad u
fara badan ay badda ku jirto, kuwaasoo haysta Laysimo sharci ah
oo dhinacooda aysan ka diiwaan gashaneyn, oo lagu eedeynayo in
Xubno ka tirsan Golaha Wasiirada ay baddaha soo geliyeen.
Arrimahaan oo dhan
marka la isu geeyo ayaa waxaa soo baxaya in shirkadda SOMCAN uu
ku dhacay jaahwareer sababay in ay garan waayaan meel wax u socdaan
iyo meel wax ka socdaan, maxaa haddaba xigay?
Xiif Cali Taar oo
ay walaalo yihiin Agaasimaha shirkadda Somcan C/weli Cali Taar
ayaa sheegtay isagoo waraysi siinaya Raadiyo Midnimo in uu ku
sime u yahay Taliyaha Ciidamada Daraawiishta Col. Careys, xiligaas
wuxuu ku sugnaa markab badda dhexdiisa yaala, wuxuuna intaas ku
daray in ay badda ka saareen maraakiib kalluumeysi oo tiradoodu
kor u dhaafayso Tobban Markab.
Xiif Cali Taar, ayaa
isagu ah nin shacab ah oo ka mida mulkiilayaasha shirkadda Somcan,
wuxuuna ka soo qayb qaatay dagaaladii ka dhacay meelo Gobolka
Bari ka mida, waxaana dhaawac ka soo gaaray dagaalkii Qayaadsame,
xiligaas wuxuu ku shaqeynayey taytal Sarkaalnimo, waxayna aad
isugu dhowaayeen Taliyaha Ciidamada Daraawiishata Col. C/laahi
Cali Mire Careys, Xiif wuxuu kaloo ka mid ahaa abaanduulayaashii
ciidamada Gobolka Sanaag kaga daba tegay kuwii Gen. Cadde, gacantana
kaga dhigay qorigii PM-ka ahaa, dad badan ayaa haddaba waxay is
weydiinayaan xiriirka ka dhexeeya Xiif Cali Taar iyo Ciidamada
Daraawiishta.
Arrintu siday doonto
ha ahaateem maanta ayaa tallaabadii ugu xumeyd la oran karaa way
qaaday shirkadda SOMCAN, kadib markii ay weerar ku qaaday maraakiib
kalluumeysi oo la sheegayo in ay haystaan ruqsada kalluumeysiga
ee baddaha Puntland, taasoo la soo werinayo in ay ka dhalatay
khasaare dhimasho iyo dhaawacba leh, toddobaadkii horena dadka
xeebaha degmada Caluula ka akallumeysta ayaa waxay ka cabanayeen
shirkadda SOMCAN kadib markay 14 doonyood oo dadka danyarta kalluumeystada
ahi isticmaali jireen oo dalka Yemen laga leeyahay ruqsadna la
siiyey ay shirkaddu midiiba ka qaaday Afar Boqol oo Doolar oo
ganaax ah, taasoo ah mid aysan shirkadii hart Group aysan sameyn.
Jawiga magaalada
Boosaaso ayaa caawa si weyn loog dareemayaa hadal haynta dagaalka
badda oo meel kharaar maraya, dagaalkan oo u eg kii xeebta Ceelaayo
ku dhex maray SSDF iyo dhuxuleysatada Sanadii 1996.
Shirkadda Somcan
ayaa galabta dirtay gurmad ciidan waxaana muuqatay in looga gacan
sareeyey weerarkii koowaad, balse ay shirkaddu dooneyso in ay
guulo ka gaarto hadafkeeda, shirkaddu way iska dhega tirtay ammaro
kala duwan oo kaga yimid Golaha Xukuumada, Taliyayaasha Ciidamada
oo uu ka mid yahay Taliyaha Ciidamada Ilaalinta Xeebaha Bootaan
Juu Juule, waxaana jira abaabul ballaaran oo qolooyinka maraakiibta
iska lihi ay iyaguna gurmad ugu dirayaan bad weynta Hindiya oo
maraakiibtoodu taagan tahay.
C/Risaaq Sh.Aduun
Mudugonline.com
