WAFTI ISUGU JIRA MADAXDA PUNTLAND IYO
XUBNO KA MID AH MADAXDA SOOMAALIDA EE KA QAYB GALAYAY SHIRKA KENYA
OO U DHOOFAY PUNTALAND.
Nayrobi, 20 April 2003 (MOL)-wafti balaaran oo uu
hogaaminayo Madaxweynaha Dawlad Goboleedka Puntland Cabdullaahi
Yuusuf ayaa saaka 8-dii subaxnimo ka duulay gagida Diyaaradaha
Nairobi ee la yirahdo Wilson Airport, iyaga oo u sii jeeda Magaalo
Madaxda Maamul Goboleedka PL ee Garoowe, kadib markii ay Fasax
rasmi ah ka heleen Guddiga dib u heshiisiinta IGAD ee hogaaminaya
shirka haatan loo fadhiyo Dalka Kenya.
wasiirka arrimaha Diinta iyo Garsoorka oo aan wax ka waydiiyay
ujeedada safarka masuuliyiuinta Dawlad goboleedka ayaa sheegay
in ujeedada safarkoodu la xiriiro laba qodob oo kan hore yahay
soo afjaridda khilaafkii Siyaasadeed ee PL dhexdeeda ahaa iyo
kan labaad oo la xiriira dhaqan galinta sharci cusub oo ku saabsan
dhismaha golayaasha degaanada Puntland, wuxuuna wasiirku intaas
raaciyay in madaxda dawlad goboleedka PL oo beryahanba wada hadalo
nabadeed u socdeen dhinaca Janaraal Cadde muuse Hogaamiyo ee ku
sugan Soomaaliland iyo taageerayaashooda, kuwaasoo la filayo in
dhawaan ay wada hadalo rasmi ah isu soo hor fariistaan Masuuliyiin
iyo wax garad ka tirsan PL.
warar kale oo lagu kalsoon yahay ayaa waxa ay intaas
ku darayaan in qorshahani ka dhashay dadaalo is daba joog ahaa
oo ay beryahanba wadeen qaar ka mid ah Isimada Puntland kuwaasoo
laga magacaabay Suldaan Siciid Suldaan Cabdisalaan, Garaad Maxamuud
Cali Shire, Garaad Saleebaan Garaad Maxamed iyo qaar kale.
Waftiga PL ee saaka ka dhoofay Nairobi ayaa waxa ka mid ahaayeen
Cali Ismaaciil Cabdi Giir (Gudoomiyihii ururkii SNDU, kana mid
ahaa Asaasayaashii PL), wasiirka kaluumaysiga PL shaahdoon Cali
Yare, Wasiirka hub ka dhigista iyo dib u heshiinta PL Cabdi Cabdulle
Siciid, la taliyaha Madaxweynaha PL ee xaga Horumarinta Cabdikaafi
Bawdokuus iyo xubno kale.
waftiga ayaa waxa kale oo safarkooda ku wehliyay
Masuuliyiin ka mid ah Madaxda Soomaalida ee ka qayb galaysa shirka
dib u heshiisiinta Soomaalida ee Kenya, kuwaasoo kala ahaa Imaam
Hilowle Imaam Cumar oo ka mid ah Gudoomiyayaasha golaha SRRC,
Cabdullaahi Shekh Ismaaciil oo isna ka mid ah gudoomiyayaasha
golaha SRRC iyo Maxamed Maxamuud Gacma dheere oo ah Gudoomiyaha
Daladda Aragtida Cusub.
masuuliyintan oo aan wax ka waydiinay ujeedada safarkooda ayaa
ku gaabsaday in safarkoodu yahay Booqasho walaalnimo. Cabdullaahi
Sheekh oo aan si gaar ah wax uga waydiinay waxa laga yaabo in
ay qabtaan mudada ay PL Joogaan ayaa Tilmaamay in ay suuro gal
tahay in ciddii ay arkaan ay uga waramaan dadaalka Nabadeed ee
ka socda Nairobi iyo rajo dhismaha Dawlad Soomaaliyeed oo ka soo
carfaya, waxa kale oo uu intaas raaciyay in ay dadka ku boorin
doonaan sidii dhamaan gobolada Soomaaliya nabad iyo is af garad
buuxa loogu soo dabaali lahaa.
Madaxweyne Cabdullaahi Yuusuf oo mudadii uu Joogay
shirka dib u heshiisiinta ahaa Hogaamiyaha Ergada reer PL ee ka
qayb galaysa shirka Kenya ayaa waxa uu haatan xilkaas ku sii wareejiyay
wasiirka arrimaha Diinta iyo Garsoorka Cawad Axmed Casharo.
dhanka kale lama oga mudada rasmiga ee ay qaadan
doonto wada hadalada nabadeed ee PL ka dhici doono iyo qodobada
laga wada hadli doono, madaxweynuhuna waxa uu ka gaabsaday in
uu wax xog ah ka bixiyo qorshayaasha nabadeed ee uu u socdo, mar
uu su'aal arrintaas ku saabsan oo aan wax ka waydiinay ka jawaabayayna
waxa uu yiri "Nabad iyo xal wanaagsan oo lala gaaro cid kasta
oo wax tabanaysa ayaan diyaar u nahay, wax kastana waxaan ka hor
marinaynaa sidii aan dadkayaga u midayn lahayn, laakiin ka hor
dhici mayo wadahadalada Nabadda ee aan u socono"si kastabase
ha ahaatee waxaad moodaa marka la eego guud ahaan wararka ka soo
baxaya Dhinacyada gudaha Soomaaliya in rajadan Nabadeed ay tahay
mid si wanaagsan loogu gogol xaaray lana filayo in wax waliba
ku dhamaadaan is afgarad iyo wadahadal daacad laga wada yahay.
Weriye: Maxamed-deeq Cabdulqaadir.
E-mail: maxdeeq50@hotmail.com
Mudugonline.com
