Riyaale oo xisbigiisu ku guulaystay
doorashadii Somaliland
Hargaysa, 19 April 2003 (MOL)-Ka dib doorashadii
ka dhacday Somaliland ee dhamaatay maalintii Isniintii hore ayaa
waxaa si xiisa leh asbuucan loo sugayay natiijada Doorashadaas
oo la filayay in lagu dhawaaqo Maalintii jimcaha ee shalay ahayd.
dib u dhac yar ka dib oo ay keentay roobab badan oo wadanka ka
da'ay oo daahiyay in sanduuqyada doorashdu ka soo xaroodaan gobolada
ayaa iminka waxaa maanta si rasmi loogu dhawaaqay in Xisbiga talada
haya ee UDUB ay tiro aad u yar ku guulaysteen. gudiga doorashada
Somaliland ayaa sheegay in natiijadaani tahay mid ku meel gaara
oo tirinta codadka dib loogu noqon doono. Maxkamada sare ee Somaliland
ayaa ku dhawaaqi doonta natiijada kama dambaynta ah.
Sidaan ayaa loogu kala guulaystay Doorashadii: Xisbiga
UDUB=205,595 oo u dhiganta 42.80% codadka guud.
Xisbiga Kulmiye= 205,515 oo u dhigma 42.07% codadka guud, Xisbiga
Ucid=77,433 oo u dhiganta 15.85% codadka guud.
Xisgbigba Talada haya ayaa ku guulaystay doorashada
80 cod oo kaliya, Doorashada ayaa la sheegay in lagu guulaysanayo
aqlibiyad oo hal cod lagu kala badin karo. Tiradaan haddii aan
wax iska badlin markii dib loo tiriyo ayaa noqonaysa in sidaas
ay doorashada ku badiyaan Xisbiga hadda talada haya ee madaxweyne
Riyaale.
Waxaa kadib markii natiijada koowaad ee doorashdu
soo baxday lagu arkayay taageerayaasha xisbiga Axmed Siilaanyo
ee Kulmiye oo aad uga caraysan sida doorashadu u dhacday. dhinaca
kale taageerayaasha xisbiga Udub ayaa ku dabaaldagaya jidadka
magaalada iyagoo calamo ruxaya. Ciidamada Poliska Somaliland ayaa
sugaya Amaanka wax dhibaata ahna illaa hada kama dhicin doorashooyinkaas.
waxaa iyana xusid mudan inaan doorashooyinkaasi ka dhacin gobolada
Sool, Sanaag iyo Buuhoodle oo Somaliland sheegato laakiin ka tirsan
Dawlad Goboleedka Puntland.
Mudugonline.com
Warqad Sir ah oo Cabdiqasim
u diray Xasan Abshir
Nayrobi, 19 April 2003 (MOL)-Warqad sir ah oo
uu ku saxiixan yahay Cabdiqasim Salad Xasan Madaxweynaha Dawlada
KMG ah ee Carta oo uu u diray Xasan Abshir oo ah Wasiirka Koowaad
ee Dawlada Carta ayaa nuqul ka mida ah na soo gaaray. Warqadaas
oo sida ku Cad lagu amrayo Xasan Abshir iyo Cabdale Derow inay
ku soo noqdaan magaalada Xamar una hogaansamaan awaamiirta Dawlada
ayaa waxaa meel uga tagay gudoomiyaha Baarlamaanka Carta Cabdala
Derow.
Dhawaanta ayaa Xasan Abshir iyo Derowba cadeeyeen
inaysan Muqdishu dib ugu noqonayn inta uu dhamaanayo shirka
dib u heshiisiinta Somalida ee hada socda iyagoo fahmay qidad
lala damacsanaa oo Cabdiqasim rabay inuu shaqada uga eryo labadaas
nin isaguna waqtiga Dawladiisa Carta ku kororsado taas oo hadda
ay ku adag tahay inuu sharciyan sameeyo maadaama gudoomiyihii
Baarlamaanka iyo ra'iisal wasiirihiiba wadanka ka maqan yihiin.
Dawlada Carta ayaa iminka waxaa u haray wax ka yar 2 bilood
waqitigii lagu soo doortay. Illaa hadda wax la taaban karo oo
Dawladaas Samaysay ayaan la hayn iyadoo haba yaraatee aan ka
hirgalin wadanka wax dhaafsiisan Dhawr Hoteel oo Muqdishu ku
yaal oo lagu waardiyeeyo.
Halkaan Guji si
aad u akhriso nuqulka warqadaas oo uu ku saxiixan yahay Cabdiqasim
Salad.
Mudugonline.com
Hogaanka Ciidanka Daraawishta oo wali
safaro ku jooga Sool iyo Sanaag
Garoowe, 19 April 2003 (MOL)-Sida uu noo soo sheegayo
Wariyaheena Magaalada Bosaaso Sheekhaduun hogaanka sare ee ciidamada
Daraawishta ayaa wali kormeero ku maraya meelo ka mida goboalada
Sool iyo Sanaag. Kormeeradaas oo la xiriira hubinta nabadgalyada
xaduudaha Puntland ayaa la sheegay in ay xasilooni ka jirto deeganada
ay tageen madaxda Ciidanku.
Intii ay joogeen Sool iyo sanaag taliyayaasha ciidanka
daraawishu waxay soo booqdeen goobo taariikhi ah, waxay kaloo soo
siyaarteen qabriyada dad sharaf ku leh deegaanka. Sawirka kore waxaad
ku arkaysaan Taliyaha Carays oo hor taagan Qabrigii allaha u naxariistee
Bulo Cali Shire xaaskii Seyid Maxmed Cabdule Xasan. Isla goobtaas
waxaad arkaysaan sawirka hoose Abaanduulaha Ciidanka Daraawishta
Gorayo Cawl oo isna hortaagan isla googbtaas.
Intii ay waftigaas joogeen gobolada Sool iyo Sanaag
waxay u guur galeen meesha ay marayso xaalada maleeshiyo la sheegay
inay isku aruursadeen magaalada Ceel afweyn oo uu hogaamiyo Cade
Muse, Maleeshiyaas oo u cararay dhanka Xaduudka Somaliland ka dib
dagaalkii deegaanka Qardho aya la sheegay inay taageero ciidan ka
heleen Dawlada Somaliland. Ciidanka Daraawishta ayaa hadda ku jira
heegan sare xuduudka u dhaxeeya xaduudka Somaliland iyo Puntland.
C/Risaaq Sheekhaduun
Mudugonline.com
Ergadii TNG ee Shirka oo ku soo noqotay
Muqdisho
Muqdisho (AllPuntland): Waxaa maanta (Sabti) magaalada
Muqdisho soo gaaray wafdi uu hogaaminayo raysul-wasaare ku xigeenka
maamulka C/qaasin Salaad Xasan oo lagu magacaabo Cismaan Jaamac
Cali Kaluun oo uu ka mid yahay Guddoomiye ku xigeenka baarlamaanka,
maamulka C/qaasin ninka lagu magacaabo Maxamed Cabdi Yuusuf iyo
sidoo kale xubno ku jira maamulkooda NTG-ga.
Wafdigaan oo ka kooban in ka badan toban xubnood ayaa sida la sheegay
uga yimid shirka Soomaaliyeed fulinta amarka C/qaasin Salaad Xasan
oo xubnahaasi ogaysiiyay inay soo xeroodaan.
Sida ay sheegayaan wariyayaasha jooga Muqdisho, waxaa lagu wadaa
inuu dhawaan maamulka C/qaasin u furmo shir ay xilka uga qaadayaan
raysul wasaare Xasan Abshir Faarax iyo Guddoomiyaha baarlamaanka
C/lla Deeroow Isaaq oo ka dhaga adaygay fariin uu C/qaasin horey
ugu diray oo ahayd inay soo galaan magaalada Muqdisho.
AllPuntland
|
