Maalintii
17 ee dagaalka ciraaq iyo sida wax u dhaceen iyo dicaayadihii oo
sii batay.
Ottawa, 05 April 2003 (MOL)-Asbuucaan dagaalka Ciraaq
waxuu ku bilaamay Ciidamada Maraykanka oo difaac kaga jira meelo
u dhaw Magaalooyinka Najaf, Karbala iyo Kut, iyagoo la sheegay
inay sugayaan ciidan kale oo xoojin ah. Waxaa taas ku xigtay maalintii
Jimcaha oo Ciidamadii Maraykanku sheeganayaan inayba haatan u
talaabeen gacantana ku dhigeen Garoonkii dayuuradaha ee Bagdaad
ka dib markii si xawli ah ay ku jiireen difaacii Caraaqiyiinta.
dhinaca ciraaqiyiinta ayaa sheegay inaysan ciidanka Maraykanku
wada qabsan Garoonka ee ay dhuumasho ku soo galeen qaarkoodna
laga yaabo inay ku yimaadeen diyaaradaha qumaatiga u kaca.
Ciidamada Maraykanka ee galay gagida diyaaradaha
ayaa la sheegay in ay isla maantaba bilaabeen inay u soo dhaqaaqeen
dhinaca magaalada walow aysan gaarin meel fog. dagaal aad u ba'an
ayaa la sheegay inuu ka socdo dhinaca Garoonka diyaaradaha oo
magaalada u jira ilaa 20KM, sawaxanka iyo diryaanka hubka culusna
uu sas ku riday dadka rayidka ah, dad badan ayaa ka soo qaxay
dhinaca dagaalku ka socdo. Wasiirka Warfaafinta ciraaq ayaa sheegay
inay ciidankoodu dib u qabsadeen Garoonka diyaaradaha Bagdaad,
waxuu sheegay in waxii ka haray ciidankii soo weeraray garoonka
diyaaradaha ku dhuumanayaan meel u dhow garoonka laguna daba jiro.
dawlada Maraykanka ayaa warkaas ku tilmaantay wax lagu qoslo iyagoo
sheegay in ciidankoodu diyaar u yahay in ay soo galaan bartamaha
magaalada markii ay iyagu doonaan. War kale oo sheegayay in nafti
hure Ciraaqi ah isku qarxiyay bombaano dhinaca gagida diyaaradaha
ayaa Maraykanku beeniyeen.
Waxaa Dagaal Ba'an ka socdaa Magaalada Kerbala.
meel aan ka fogayn Kerbala ayaa la sheegay in Maraykanka looga
soo riday diyaaradaha qumaatiga u kaca. isla shalay Magaalada
Kut-na waxaa shaqadiisa laga cayriyay COL. JOE W. DOWDY oo watay
guutada 1-aad ee Ciidamada Marines-ka, lama sheegin sababta loo
cayriyay ninkaas oo arintaas niyad jab u keenayso ciidankii uu
watay. dhinaca xaduudka Siiriya laba gabdhood oo Ciraaqiyiin ah
ayaa Bomb ay si biimo ah isugu qarxiyeen waxay ku dileen 3 askarta
qaaska ah ee Maraykanka oo joogay Jid isbaaro u taalay. waxaa
habeen hore ciidanka Maraykanku isbaaro meel u taalay ku dileen
dad socaal ahaa oo dhawr iyo toban ah oo Caruur iyo dumar u badan
oo ay sheegeen in ay diideen inay joogsadaan. Ciidamada Maraykanka
oo ka baqaya dad nafti hurayaal oo is qarxinaya ayaa bilaabay
in meelo fog ka toogtaan gaadiidka daweynaha iyagoon hubin cida
la socota gaadiidkaas.
Waxaa asbuucaan aad u sii siyaaday dicaayadaha dagaalka
ee labada dhinacba ka imaanaysa siiba dhinaca isbahaysiga iyagoo
saraakiisha Maraykanku bilaabeen inay warka si hoos ah u siiyaan
warfaafintooda waqti ka dibna markay ka gaaraan ujeedadoodiina
ay beeniyaan warkaas, arintaan oo ka dhacday meelo badan ayaa
waxaa ka mida ahaa war laga helay Ciidamada Ingiriiska oo sheegayay
in ciidamadooda comandoska ah ay dileen saraakiil Ciraaqiyiin
ah oo uu ku jiro gaashaanle sare ay gacantana ku hayaan Janaraal
Ciraaqi ah. dhamaadkii asbuucaan ayaa la sheegay in aan warkaas
waxba ka jirin. Waxay Ingiriisku dhawr jeer horey u faafiyeen
warar Been ah iyagoo adeegsanaya saxaafada Ingiriiska oo ay ku
jito BBC-du.
Dhanka Ciraaqiyiinta ayaa iyaguna aan dab yar shidanayn
iyagoo sheegay shalay in Ciidanka Maraykanka ee soo galay gagida
diyuuradaha aysan nabad ku waabariisan doonin oo ay isticmaali
doonaan wax aan horey loo arag. Saaka wali Ciidankii Maraykanku
waa joogeen meeshoodii waliba waxay ku hanjabayaan inay u soo
socdaan Bartamaha Magaalada Bagdaad. ciraaqiyiintu waxay shaqadii
ka joojiyeen laba beri ka hor wariyaal ka socda Al-Jazeera oo
haddana dib loogu ogolaaday inay shaqadooda bilaabaan. dicaayadaha
ka imaanaya dhinaca ciraaqiyiinta ayaa waxaa ugu kululayd dicaayad
run ah dadka Ciraaqiyiintuna aad ugu farxeen ka dib markii shalay
TV-ga ciraaq laga arkay Sadam Xuseen oo socod ku maraya xaafad
ka mida Bagdaad. Sadaam oo ay ka muuqatay kalsooni badan ayaa
dadka u sheegay inay guul u dhaw dahay. Dadka ayaa aragtida Sadam
siisay kalsooni iyagoo awal ka walwal qabay dicaayadaha reer galbeedka
ee sheegayay in habeenkii u horeysay ee dagaalka gantaalihii Maraykanku
soo riday ay galaafteen Sadam iyo dadkii u dhawaa.
Dagaalkaan ayaa waxaa la aaminsan yahay inuu gaystay
qasaare aad u balaaran oo dad badan oo Ciraaqiyiin ah ku dhinteen,
laguna burburiyay dhaqaalihii Ciraaq intiisu badnayd. dhanaca
Dawlada Ciraaq ciidankeeda ayaa iyadana la sheegayaa in askar
badan ku naf waayeen dagaalkaan. Xulafada dhinacooda ayaa 75 oo
Maraykan ah la hubaa inay dagaalkan ku dhinteen 7-na la haystayaal
yihiin iyo 8 aan la ogayn meel ay jiraan. dhinaca Ciidanka ingiriiska
ayaa laga dilay 27 inta la ogyahay dhaawacooda saxdaana aan la
garaynayn labada dhinac.
Mudugonline.com
