Baydhaba oo laga qabsaday
Shaatiguduud
BAYDHABO, 3 Oct 2002 (BBC) -Wararka ka imaanaya magaalo
madaxda gobolka Bay ee Baydhabo, ayaa sheegaya in maanta gacan-ku
hayntii magaaladaasi ee Colonel Xasan Maxamed Nuur Shaarguduud
uu is-beddel ku yimid.
Dagaal halkaasi ka dhacay oo u dhexeeya dhinacyada Colonel
Shaarguduud oo ah madaxweynaha dowlad goboleedka Koofur-Galbeed
Soomaaliya iyo labadiisii guddoomiye ku xigeen ee xagga RRA-da,
Sheekh Aadan Madoobe iyo Maxamed Ibraahim Xaabsade, ayaa saakay
5:30 aroornimo markii laga soo baxay salaadda subax.
Waxaa mar keliya isku dhacday rasaar aad u xoog weyn, hase
yeeshee, aanan ku baahin magaalada oo dhan sida ay BBC-da u
sheegeen qaar ka mid ah dadka deggan magaaladaasi.
Waxay u muuqataa in ay jirtay farsamo magaalada dhexdeeda lagu
soo geliyey ciidamo fara badan ka hor dagaalka saaka billowday,
taasoo sida ay sheegeen goobjoogeyaasha aad u sahashay in ay
maanta magaalada Baydhabo u dhacdo dhinaca Sheekh Aadan Madoobe
iyo Maxamed Ibraahim Xaabsade.
Lama yaqaanno tirada dhabta ah ee ku dhimatay ama ku dhaawacantay
dagaalkaasi, hase yeeshee, wararka laga helayo ilaha madaxa
bannaan, waxay xaqiijinayaan in ugu yaraan siddeed qof ay dhinteen,
in ka badan 20 kalena ay ku dhaawacmeen.
Dadka ku dhintay dagaalkan, waxaa ka mid ah Aadan Isgow oo
ka mid ahaa taliyeyaasha ciidanka Colonel Shaarguduud sida ay
sheegeen goobjoogeyaasha, iyadoo dhaawacuna uu ku jiray nin
ganacsade ah oo caan ka ah magaaladaasi.
Xiisaddan dagaal waa ay dareensanaayeen dhinaca Shaarguduud,
waxay duhurnimadii shalay magaalada Baydhabo ka gooyeen dhammaan
wixii is-gaarsiin ahaa, waxay magaalada Baydhabo hawada dib
ugu soo noqotay saaka toddobadii subaxnimo, iyadoo ay magaaladana
gacanta ku hayaan ciidamada Sheekh Aadan Madoobe iyo Xaabsade.
Maxamed Isaaq Cismaan oo loo yaqaanno Fanax oo ah guddoomiye
ku xigeenka hoggaanka siyaasadda ee Jabhadda RRA-da oo aan khadka
talefoonka kula xiriiray, isagoo jooga magaalada Baydhabo, ayaa
sheegay in dhinaca Shaarguduud ay ka qabsadeen labo baabuur
oo kuwa dagaalka ah iyo afar kale oo waaweyn iyo hub iyo saanad
fara badan.
Fanax waxaa uu intaasi ku daray in isaga dhinaciisa ay dagaalkaasi
kaga dhinteen labo ka mid ah maleeshiyadooda, iyadoo ay shan
kalena ka dhaawacmeen.
Isbitaalka magaalada Baydhabo, waxaa isagana la geeyey ilaa
toban qof oo dhaawac ah oo ay dad rayid ahna ku jiraan.
Lama yaqaanno halka uu ku dambeeyey Colonel Shaarguduud nafsad
ahaantiisa, waxayse warar lagu kalsoon yahay sheegayaan in uu
u baxsaday tuulada Ceel Doon oo ilaa 20km dhinaca Woqooyi ka
xigta magaalada Baydhabo.
Waxaa sidoo kale aanan la haynin meel uu jaan iyo cirib dhigay
Hilaal Cabdulqaadir Maxamed Aadan oo ahaa madaxii hay'adda UNDP
ee Baydhabo, kaasoo la arkay baabuurkiisii oo ay rag hubaysan
magaalada ku dhex wataan, iyadoo mid ka mid ah raggiisii ilaalada
ahaana meydkiisa laga helay magaalada dhinaceeda.
BBC Somali
Tifaftirihii Wargayska
Al-Siyaasa oo la afduubay
NAYROBI, 3 Oct 2002 (MOL)-Xalay abaarihii 12:30
ayaa tafaftirihii jariiradda al-siyaasa, Dr. Xuseen Cali Cilmi,
waxaa lagala baxay gurigiisa oo ku yaala xaafadda Eastliegh
ee ku taala magaaladda nayroobi oo dalka Kenya. Sida ay sheegeen
dad goobjoog ahaa marka la afduubayay tafaftiraha ayaa waxay
sheegeen in niman u eg askar oo qaarna ku labisnaayeen dharka
shibilka qaarna qabeen labiska boliiska Kenya ay soo galeen
guriga uu deganaa xuseen dabadeedna ay ku bilaabeen garaacis
iyo jirdil. Ilaa iyo hadda lama yaqaan halka uu ku sugan yahay
tafaftiruhu iyo wuxuu mutay.
Laba asbuuc ka hor tafaftiruhu wuxuu ku shaaciyay wakaaladaha
wararka iyo internetka in naftiisu khatar ku jirto kadib markuu
qoray maqaalo lid ku ah kooxda carta iyo shirkaddii albarakat
ee lagu xiriiriyay inay lug ku lahayd argagixisadda caalamiga
ah.
Maaha markii ugu horaysay ee xuseen sababo aan la qeexin loogu
afduubo ama xiraba magaaladda Nayroobi,tanina waa markii afraad.
shillinson
Madaxweynaha Puntland
oo Maanta Booqasho Gaaban uga Bilowmatay Roma
Roma: Sidda uu kusoo waramyo wariye AllPuntland uga soo warama
Talyaaniga Madaxweynaha Dawlad-Goboleedka Puntland Cabdullahi
Yusuf Axmed ayaa maantay 3/10/02 booqasho gaaban ku tagay magaalada
Roma ee dalka Talyaaniga.
Waxaa madaxweynuhu kula kulmay magaalada Rome dad aad u danaynaya
danaha Puntland iyo guud ahaanba Soomaliya.
Waxaa horey madaxweyne Cabdullahi booqasho gaar ahaaneed uu
ku tagay London, xarunta Britan (UK) halkaas oo u kula kulmay
Jaaliyadda reer Puntland iyo kuwa ka socda Soomaalida kaleeto
ee u dhalatay Soomaaliya.
Waxaa kale o madaxweyne Cabdullahi ay is arkeen saraakiil ka
socota Wasaaradda Arimaha Dibadda ee Britan (UK) iyo safaaradaha
shisheeyaha qaarkood ee degan London, kuwaas oo dhammaan ay
iska waraysteen xaaladda Soomaaliya iyo dagaalka lagula jiro
argagixisada caalamiga ah oo haataan usoo wareegay wadamada
reer galbeed ah.
Allpuntland
Contact: webmaster@mudugonline.com
Copyright © Mudug
Online 2001
|