Caato iyo Qanyare
oo shirka Eldoret kala kulmay waji gabax.
ELDORET, 17 Nov 2002 (MOL) -Iyadoo wali Shirkii heshiisiinta
Somalida u xayiran yahay buuq
iyo qalalaase ay dhaliyeen qabqablayaasha Dagaalka lana
filayo in shirku dib u furmo asbuucaan ayaa waxaa ka soo
baxaya magaalada Eldoret oo shirku ka socdo dadaal iyo xodxodasho
hoose oo ay wadaan labada qabqable ee dagaal ee Qanyare
iyo Caato oo ku kali-yoobay iyagu inay carqalad galiyaan
shirka iyagoo illaashanaya hantida ay dhaceen ee ay gacanta
ku hayaan oo haddii Dawlad Somaliyeed oo midaysan la helo
ka cabsi qaba in hantidaas laga wareejiyo. labadaan qabqable
waxaa la sheegayaa markii ay ku guuldaraysteen siyaasadii
iyo qayaamooyinkii hore ay ugu caan baxeen ay hadda wax
ku raadiyaan caadifad qabiil iyagoo isku dayaya inay beerlaxawsadaan
hogaamiyaal dhawr ah oo Muqdishu ka yimid oo ay isku dayeen
inay dhagta wax ugu sheegaan taas oo sida la sheegay ay
kala kulmeen waji gabax iyo diidmo toos ah..Labadaan qabqable
ayaa isku dayayay inay ku qanciyaan hogaamiyaasha Muqdishu
ka yimid inay ugu hiilayaan sadbursiga ay raadinayaan ayna
bay yiraahdeen beesha Hawiye ula soo dhicinayaan ergo dheeraada.
Warka ayaa intaas ku daraya in Caato iyo Qanyareba si toosa
loogu sheegay in aan Beesha Hawiye laga sadbursan ergooyinka
tiro ahaana beesha Hawiye heshay ergooyinka shirka ugu badan
ayna ku qancaan ergada la siiyay kana waantoobaan falfalxumada
iyo dibandaabyada ay ka dhexwadaan ummada Somaliyeed ee
ay qaar ku haystaan qafaalashada.Hogaamiyaashaas ayaa labada
qabqable u sheegay inay haddii ay daacad yihiin Hawiye-nimaduna
daacad ka tahay ay nabad ku soo dabaali lahaayeen goobaha
magaalada Muqdishu ee ay boobka ku hayaan. hogaamaiyaasha
sida aadka ah runta ugu sheegay Caato iyo Qanyare ayaa waxaa
la sheegay inay ku jiraan Al-Xaaji Muuse Yalaxow, Xuseen
Maxamed Caydiid iyo Maxamed Dheere oo dhamaantood ka kala
taliya magaalada Muqdishu iyo deegaanka u dhow.
Ururka IGAD ayaa la soo sheegayaa in markii horeba ay qaybsiga
ergada ku saleeyeen hab qabiil loona kala qaybiyay ururada
kala duwan oo qaarkood iyagoo isku beel ah haddana kala
wata mabda' siyaasadeed oo aad u kala duwan, taas oo keentay
in dhawr qabqable dagaal oo isku beel iyo isku jufo ah la
soo shir tagaan 3 urur oo kala duwan oo mid walba ay ku
rabaan inay ku helaan sadbursi.Labada qabqable dagaal ee
Caato Iyo Qanyare ayaa ku hanjabay inay shirka ka baxayan
haddii aan ergada loo kordhin taas oo madaxa qabanqaabada
shirka Mr. Mwangale uga jawaabay inay xor u yihiin inay
shirka ka baxaan ergada shirkana waxba loogu kordhin doonin
cid kale ergadii la siiyayna aan iyaga la siin doonin. taas
oo niyad jab weyn ku riday labada qabqable oo haatan raadinaya
marin habaabin kale oo ay shirka hordhigaan. dawlad goboleedka
Puntland ayaa iyadu wax cabasho ah ka muujin ergada loo
qoondeeyay iyadoo waliba la siiyay tirada ergada ugu yar
markii laa fiiriyo qabaa'ilada ku nool Puntland tiradooda
iyo baaxada dhulka ay puntland ku fadhido oo ah 1/3 badka
dhulka Somaliya oo dhan.
Mudugonline.com
JUFADA DR C/QASIM SALAAD OO GABI AHAANBA
DHACDAY MUCAAWINADII LAGA HELAY IMARADKA CARABTA
Mucaawino laga keenay dhawaan Imaadka Carabta, looguna
talagalay Masaakiinta ku tabaaleysan Magaalada Muqdisho
ayaa la sheegay iney dhaceen Maliishiyo ka soo jeeda Beesha
Habargidir, iyadoo qaar ka mid ah Mucaawinadaasna ay la
wareegeen Xubno ka tirsan Dowladda KMG ah. Mucaawinadan
oo uu maamulayay Wasiiru Dowlaha Arrimaha Gudaha Maxamuud
Afgooye ayaa la sheegay in Dumar la magac baxay Mujaahidiinta
Habargidir la siiyay Afar Baabuur oo ay ku raran yihiin
Mucaawinadaas, halka C/qaasim ilaaladiisana la siiyay tiro
intaas ka badan.
Ganacsade Maxamed Deylaaf ayaa isagana la wareegay Mucaawinadii
la keenay Maalintii dorraat, taasoo laga soo dejiyay Garoonka
Balidoogle oo ay gacanta ku hayaan Maliishiyo u dhalatay
Beesha Cayr. Mucaawinadaan oo tira badneyd ayaa waxaa loogu
talagalay Dadka Masaakiinta ah ee ku jira Xerooyinka Magaalada
Muqdisho, laakinse waxay isku bedeshay kuwo lagu caawiyo
Maleeshiyida iyo Dumarka Habargidir.
BALCAD.COM
BEESHA HABARGIDIR OO DANAHEEDA SIYAASADEED
KA ARKI WEYSAY SHIRKA ELDORET
Beesha Habargidir oo ka mid ah Beelaha Soomaaliyeed ee
ka qeyb galaya Shirka Elodret ayaa billowday in Shirku marin
haabiso, kadib markii ay ka arki weysay danaha Siyaasadda
ay leedahay, gaar ahaan markii Siyaasiyiinta Beeshaas loo
sheegay iney xoog ku haystaan Dhul aysan laheyn. Maamulka
Kismaayo ayaa Guddiga Farsamada IGAD kala kulmay weji gabax
kadib markii lagu wargeliyay in Deegaanka Kismaayo ay iyagu
laheyn, laguna haysto, sidoo kale waxay Guddiga Farsamada
IGAD gacanta ku hayaan qoraal tilmaamaya in muddadii 12-ka
Sano ee Dowlad laaanta Dalka ka jirtay ay Beesha Habargdidir
xoog ku haysatay Gobolka Shabeelaha Hoose.
Cusmaan Caato iyo Gacmadheere ayaa wada dadaal ay ku doonayaan
iney kaga hortagaan arrimahaas, isla markaasina ay ubuuran
lahaayeen Isbaheysi, waxaana ilaa hadda soo baxaya in Masuuliyiintaas
in ay abaabulayaan Koox falaago ka ah Shirka dib u heshiisinta
Eldoret.
MAXAMED QANYARE: Itoobiya Dagaal ayaan kaga hortageynaa,
haddii ay faraha kala bixiweyso arrimaha Soomaaliya
Hoggaamiya Kooxeedka Maxamed Qanyare Afrax ayaa Dowladda
Itoobiya u jeediyay hanjabaad kulul oo uu ku sheegay in
haddii ay danta ku qasabto weerar ku qaadi doonaan Dalka
Itoobiya, isagoo sheegay in Dowladda Itoobiya faragelin
kulul ku hayso arrimaha Soomaaliya, gaar ahaan Shirka Dib
u heshiisinta Soomaaliyeed ee Magalada Eldoret.
Maxamed Qanyare Afrax ayaa sheegay in aan loo dulqaadan
Karin waxyaabaha ay Itoobiya ku dhaqaaqeyso, wuxuuna caddeeyay
in Itooobiya laba arrimood ku joogto Shirka, midda 1aad
wuxuu ku sheegay in ay aad u daneyneyso in Nin ay iyada
wadato ka dhigto Madaxweyne, gaar ahaan Xubnaha SRRC, midda
2aad-na ay ku bur buriso Dowladda Carta lagu soo dhisay.
Xafiiska Midnimo ee Muqdisho
C/raxmaan Muxiyaddiin Cali iyo
Nuuradiin Macallin Abdirahman10@yahoo.
BALCAD.COM