Jaamacow
Yaan Lagu Adeegsan Mar Labaad!!!
Cadowga reer Puntland ciidduu ka badan yahay, waxaana
ugu horreeya ururka xaqdarada iyo xaaraanta isku bahaystay
ee la magac baxay Carte oo calooshooda u shaqaystayaal ah.
Waxaa kaloo soo-raaca Isbahayshiga xoogga ku haysta Kismaanyo
oo isugu yeera Walaalaha Galguduud ama Isbahaysiga Dooxada
Jubba oo uu Xasan Bariise ula baxay, waxaana hogaamiye u
ah Barre Hiiraale. Waxaa kaloo la ilaawi karin Caato oo
caloosha ka neceb jiritaanka reer Puntland, had iyo jeerna
jecel jabkooda, asagoon middaan wax qarsoon ka dhigin ee
usoo bandhigay cadaawaan marar badan, sidii burburintii
shirkii lagu qaban lahaa Bosaso iyo waliba asagoo dab ka
shiday oo dagaal ka oogay magaalada Gaalkacyood ee dadka
walaalaha ah ay mudda dheer nabad ku wada noolaayeen, Somalida
kalana tusaale u noqotay inay nabad kuwada noolaan karaan.
Wuxuu shirka Eldoret hogaamiyaasha hortooda ka sheegay in
Gaalkacyo xoog lagu haysto, taas oo laga qiyaasi karo meesha
cadownimadiisu gaarsiisan tahay.
Waxaa kaloo aan meesha ka maqnayn Qanyare oo aanan garanayn
wuxuu ku neceb yahay reer Puntland! Qanyare 1987 wuxuu idaacadda
BBC-da ka sheegay mar uu kasoo hor-jeeday jiritaanka Bosaso
iyo in shir lagu qabto " Arrey xaan ka doonaa Bosaso
qabiilaa dagee, dowladda lagu dhisidoonaana saad Xamar ku
keentaan arkidoonaa". waxaan hubaa inuu Qanyare xusuusto
erayadaa uusan ka fiirsan ee ka dhacay waqtigaa iyo cadaawadnimada
uu dadkaa walaalihiis, Sodogyaashiis iyo waliba seediyaashiis
ah u muujiyey!.
Haddaba, dadweynaha waxgarad ka ahow, ururka Carte, walaalkay
Jaamac Cali Jamaac waxay u isticmaaleen inay ku kala daadiyaan
midnimada reer Puntland, walow aysan u suuroobin sidii ay
rabeen oo reer Puntland ayagoo midaysan meel uga wada soo-jeesteen
midnimadooda iyo inaan la wax-yeelin wada-dhalashadooda,
qoys-qoysna loo kala qoqobin sida ummadda Somaliyeed ee
ku nool Koonfurta ee dhiban oo laysaga horkeenay Jilib-Jilib
oo dad walaala ah qoryo laysigu dhiibay.
Walaalkay, Jaamac muddo badan buu qiiq isku qarinaayey
oo uu lahaa Carte "Iguma shaqaysanayso oo u adeegi
maayo" laakiin, nasiib-darro ugu danbayntii wuxuu qirtay
inuu ka mid yahay ururkaan danaha dhaqaale iyo mid cadaawadnimo
ku bahoobay ee maxaysata ah, aminsan yahayna, lana shaqayn-doono
mustaqbalka, taas oo dadweynaha reer Puntland horey u ogaayeen.
Haddaba, maanta waxaa isticmaalaaya walaalkeen Jaamac cadowgii
reer Puntland oo raba inay danahooda ku oofsadaan, markay
ku fushadaan arimahooda qaabka daran ee ay rabaan inay shirka
Eldoret ku carqaladeeyaan ay barxadda hotelka uga dhaqaaqi-doonaan.
Ayaandaro wuxuu dhex fadhiyaa oo uu la safan yahay Hiiraale,
Qanyare, Caato iyo Carte oo aan hadda sidaas u danaynayn
waayo danahoodii baa uga fuliwaaye ama haddaan si kale u
iraahdo maanta waxba uma qaban karo, sidaa-daraadeed doonimayaan
inay shaqo u dirsadaan.
Waxaa ah wax laga naxo oo laga tiiraanyoodo, waa baaha-nahay
baqtiga looma cuno ee maxaa ku khasbay inuu Qanyare maanta
u hadlo walaalkay Ina Cali Jaamac? ma illoobay sharaftii,
haybaddii, karaamadii iyo nasabnimadii dadkii reer Puntland
ee u ka dhashay? Miyuusan ogayn inay xadaarad dheer leeyihiin
oo ay lahaan jireen Boqortooyo iyo maamul fac weyn oo muddo
dheer soo taxnaa?
Jaamac Cali Jaamacow, darajo kasta oo aad hesho waxa ka
wanaagsan magaca ummaddaada oo aad ilaaliso, wax lagu meel-marana
magac baa ugu wanaagsan ee indhahaaga fur, fiirina meesha
aad fadhido iyo in maalin walba shirka lagaa saaro waa sharaf
daro, haddii aad adigu adareemi-weydey anagay nadanqinaysaa,
kana dheerow Hiiraale, Qanyare, Caato iyo inta xaasidka
u ah Ummadda Somaaliyeed, gaar ahaan reer Puntland.
Cabdulahi waa shaqsi, waana kasoo hor-jeesan kartaa laakiin,
yaanay ku adeegsan cadowga dadkaagu, ummaddaadana magac
uga tag intaad nooshahay.
Walaal, Jaamac Cali Jaamacow, iga raalinoqo haddaan qoray
erayo aadan rabin inaad akhrido ama aad maqasho laakiin,
ogow runtu waligeed waa xanuun badan tahaye, ninkii raganimo
iyo adkaysi leh baana qaadan kara, kuna qanci kara. Waxaa
aan qoray waa xaqiiqdii, waana hubaa inaad sidaas ogtahay.
Raage Jaamac
jamarage@aol.com
USA