Sidii looga
ciiday Somaliya iyo Magaalada Galkacyo oo la kala
ciiday
Galkacyo, 5 Dec 2002 (MOL) - Wararka
naga soo gaaraya Magaala Madaxda gobolka Mudug ee
Galkacyo ayaa sheegaya in maanta si fiican looga Ciiday
magaalada Galkacyo iyo Puntlandba. Ciida Magaalada
Galkacyo ayaa waxa lagu tukaday garoonka weyn ee kubada
cagta oo dhawaan dibu habayn lagu sameeyay. Ciida
ayaa waxaa isugu soo baxay dad aad u fara badan oo
ka kala yimid magaalada xaafadaheeda kala duwan. waxaa
ka muuqday bilic aad u wanaagsan caruurta iyo dadka
waawayn dharka ay xiran yihiin ee Somalidu dhaqan
diineed u leedahay iyo waliba qalabka caruurtu ku
ciido oo ay warfinayeen.
Ciida Maanta Galkacyo ayaa iyadoo sidaas
qurxoon u dhacday ayaa haddana waxaa dadka maskaxdooda
ku jirtay in masaajida magaalada qaar aan laga ciidin
oo dad wali sooman yihiin. arintaas oo dad badan ka
xumaadeen iyadoo maanta oo kale loo baahnaa isku duubnida
walaalaha Muslimka meel kasta oo ay joogaan. Waxaa
xaflada Ciida hadalo kaftan iyo waanoba isugu jira
ka soo jeediyay Garaadka beesha Cumar Maxamuud Maxamed
Cilmi Shirwac oo sheegay inaan maanta oo kale loo
baahnayn in cidna lagu eedeeyo ama lagu canbaareeyo
kala ciidida lana yareeyo khilaafka, waxuu intaas
ku daray inay adag tahay xal Somaliya oo la gaaro
inta bulshadu sidaas u kala qaybsan tahay iyadoo buu
yiri Garaadku xalku ku jiro diinta alle oo loo noqdo.
Waxuu ku dheeraaday sida dadka Somalidu u dayaceen
ugana fogaadeen Diinta Islamka. Isagoo si kaftan ku
jira u hadlayana waxuu yiri Garaadku in maantay haddii
aad tiraahdid "Illaahay Gaalada ha jabsho"
aad magaalada Galkacyo ku arkaysid dad difaacaya gaalada
oo kugula dagaalaya arintaas. dad badan ayaa kaftanka
Garaadka ku qoslay.
Waxaa kaloo ka hadlay Xaflada Ciida
Galkacyo Maanta Guddoomiyaha Maamulka gobolka Mudug
C/rashiid Cali Xaashi (Dhuubane) oo isna sheegay muhiimada
Ciida, waxaa kaloo ka hadlay musiiliyiin kale iyo
culimo oo dhamantood dadka ku baraarujiyay muhiimada
maalinta ciida iyo in la yareeyo khilaafka diiniga
ah. Waxaa sidaas oo kale looga ciiday Magaala Madaxda
Dawlad goboleedka Puntland ee Garoowe, Magaalada Bosaaso
ayaa iyada si weyn dadku iuigu soo baxeen garoonka
weyn ee ciyaaraha iyo msaajidada Magaalada. Sidoo
kale waxaa laga ciiday Magaalada Qardho magaalada
Laascoonood iyo magaalooyinka iyo tuulooyinka Puntland
oo dhan. dhinaca Koonfurta Somaliya Magaalada Muqdishu
ayaa la sheegay inay dadku ku ciideen Xaafadaha kala
duwan ee magaalada. Hogaamiyaha kooxda Carta ayaa
isagu dadka ugu qodbeeyay Garoonka Ciyaraaha Muqdishu
isagoo sheegay in heshiiskii dhawaan ay dawladiisu
la gaartay kooxaha siyaasada ee Muqdishu uu ku jiro
xalka Somaliya isagoo sheegay inuu aad ugu rajo weyn
yahay xal waara loona baahan yahay in laga wada shaqeeyo
danta guud.
Magalaada Kismayo ayaanba laga maqal
wax dhaqdhaqaaq ciideed ah iyadoo magaaladu gacanta
ugu jirto Mooryaan isa soo bahaysatay oo aan Muslimnimo
iyo arxantoona u galayn ummada masaakiinta ah ee ay
ku kor-nool yihiin. Magalaada Baydhabo ayaa iyana
dadku si weyn uga ciideen iyadoo hadda magaaladu ku
soo noqotay xasilooni ka dib markii lakala fogeeyay
labadii ciidan ee ku dagaalay magaalada. waxaa sidaas
oo kale looga ciiday magaalada Jawhar ee Gobolka Shabeelada
Dhexe oo dadka qudbado u akhriyay Maxamed Dheere oo
ah hogaamiyaha Siyaasada ee maamulka Gobolka Shabeelada
Dhexe.
Guji-Riix
Waa Maxay Macnaha Ereyga Ciid?
Mudugonline.com